VISA sok cu hna a hnawk taktak. Ai puang a si chel, a caan ah cun khualtlawn hmanh i let duh tiang in mi a tuah ko. Sihmanhsehlaw, mah cucu international pehtlaihnak ri chung ah a ummi a si caah lungsau a herhmi cu a si.
VISA lak lengmang hau lem lo in fawideuh in khualtlawnnak caah hman khawhmi Passport cu nawlngeihnak sang (powerful passport) ti u sih law, vawleicung ah zei ram pawl dah nawl a ngeibikmi passport an ngei timi a tanglei ah zoh hmanh.
VISA i laak cia a haumi ram a tamdeuh hi cu ram dang (international) he pehtlaihnak a ttha tuk lomi khi an si hna. Visa man zong a fak ngai tawn pinah ca tuah ding le biahalmi a tlawmtam in leh a hau lengmang.
Cucaah USA, Norway le Denmark passport hna i ken ahcun khualtlawn kha a nuam kho taktak i a hleiin hi ram pawl ah a ummi rammi sinak a ngei cangmi caah a nuam khun. Tu hrawng Kawlram a tlawngmi an tam he USA le Norway passport iken cu nuam kho tuk ee, tiah khualtlawng mi nih Thailand ah an ka chimh.
A si cun nawl a ngeibik ram passport timi cu fawite in Visa lak khawh a ngahmi ram pawl khi an si tiah Washington Post ah ca a ttialmi journalist Ana Swanson nih a blog ah a ttial.
American le British passport hi leicung ah nawl a ngeibik an si i nai tlaih cun hlapi na kal kho.
Passport cuai a thlaitu au Arton Capital timi company a si i ram tampi nih VISA sok hau lo in ram tampi ah tlawnkhawh a si a ti. Cu cuaithlainak ah cun US passport le UK passport hi a sangbik an si i VISA i sok cia hau loin ram 147 ah an tlawng kho a ti (ram chung an va luh hnu ah an rak pek hna lai.).
South Korea hi a rak men ve lo, Germany le France he aa ruang in an kal, i ram 145 ah Visa sok cia hau lo in an lut kho. Sweden le Italy cu pathumnak an si i ram 144 ah an lut kho ve. Denmark, Luxemburg, Netherlands, Singapore, Japan le Finland hi an i tluk ve i ram 143 ah an lut kho. Switzerland nih panganak ah ram 142 a tlawn khawh ve.
NORWAY, cu hlan ah a USA le UK khawh in a um tawnmi tutan ning ah cun paruknak a si. Portugal, Spain, Irland le Belgium he an i tluk le visa sok cia lo in ram 141 ah an tlawng kho. Norway khawh in Canada le Greece an si.
Chirhchan: DB
Myanmar passport cu a derbik 5 lakah ai tel i UN ram timi ram 193 lakah a chiabik a si tinak a si.
Norway Ummi Caah Theih A Herhmi
Norway cozah thar a kai 2014 in cun Norway rammi sinak sok tikah hlan bantuk in min, kum, umnak tibantuk men ttial in sok a si ti (lai) lo. Tu kum chung hin an hman le hman cang lo cu Laimi chung in a sokmi nih an theih lai, nain a sok rih lomi nih theih chung awk a herhmi tlawmte ka van ttial.
Norway rammi sinak "Statsborgerskap" hi cu a la kho dirhmun kan si ko ahcun lak ding hrimhrim a si ko. Statsborgerskap lak ruangah Norway i kan umnak ah kan covo, kan tin awk le i tlumtlak khawhnak lam tampi kha a onh (a hman thiammi caah). Cucaah felte in lak khawh i zuam a hau ko lai, tiah keimah pumpak ruahnak a si.
Statsborgerskap lak na duh ahcun hlan ah voksen-opplæring ah Time ngeih a herhmi zah na ngeih, tazacuai tiang siseh a dang thil sual na tuah lo a si ahcun sok i hmuh a rak si. Sihmanhsehlaw, atu cu holh zeitlukdah na thiam, zeitlukdah na fian i na theih timi le an ram sining (samfunn) kha phitter a si cang (lai). Mah zawn ahhin kanmah chuahkehnak holh zong in cu TEST cu phit khawh a si, tiah an rak ti ko (hi kong an ceihka te ah) nain FRP le cozah thar nih an duh ti lo, Norsk zeitluk an thiam timi zong abiapi, an ti cang tiah NRK nih a ttial.
Tahchunnak ah Test tuahmi chung i a halmi cu: Zeitik indah Norway hi amah tein aa ukmi ram a si? A phi: 1814, 1905, 1940 ahhin pakhat thim tibantuk kha a si ko.
HIKA AH HIN TEST CHUNG KHAWH A SI. Asilole NRK ahhin TEST khawh a si lai.
Atang ca hi 2013 Senri Mekazin ah rak ttialmi a si i a rel lomi caah theihtlei a si kho men:
Comments
Post a Comment