Nau A Pawi

Ka phone a tla sual i a kuai caah phone lo in zarh thum leng ka um cang. Tu zanlei cu ka nu le pa sinah email tial a hau ko, ka naule he cun skype kan hmang i kan i chawn kho. Email ka on i cakuat tial ka thawk ah khin tial kai harh ngai. Aruang cu email cakuat kan hmang theng ti lo, phone peng i chawnh a si i zeidah ka ttial lai ti ruah a har. A luancia kum nga lio ah Nancy Zatu nih "cakuat" kut in tialmi a sunlawi ning a rak tial i email chan si nalak ah kan rak ti, nain atu cu email hmanh in cakuat tial a harmi a van lo.

Mah cu he pehtlai cun tuanbia pakhat kan chim hna lai.


Kum hleinga lawng a si rihmi tleirawlka te pakhat cakuat a ttial. A ruang cu hmaitonh in a chim ngam hna lo. Caminpuai phitmi mark a chiat tuk ruangah a si lem lo, a nu le pa nih man fak takmi phone an cawk piakmi a thlau caah a si fawn lo. Asinain atu a chimh hna ding zong hi a nu le pa nih an rel tikah an thin a tlawh in tlawhter khomi a si ko.

Zei ti tha. Chimh hna lo le a duh lo caah nu le pa sinah tihin cakuat a tial.

Dear ka Pa,

Mah hi cakuat hi i ngaihchihnak le ngaihchia ngaiin ka von tial. Ka nu he nan buaimi hrial ka duh caah ka nungak thar he kan zaam. Stacy hi mi ttha tuk a si, cun ka duhdawt taktak fawn. 

Asinain a pum i aa thlaih luklak mi hnatonh, hmur-tonh pawl ruang ah nan cohlan lai lo ding ka theih tuk fawn. Mortor-sycle thilthuam tet ngaiin aa hruk mi ruang ah le, ka nakin a upat deuh tuk mi ruang ah nan duh lai lo. 

Sihmanhsehlaw ka Pa, i duhdawtnak lawng a si lo. Atu hi nau a pawi.

Stacy nih kan i nuam tuk lai a ka ti ko. Ramtang ah inn-mawtaw (trailer) a ngeih i khuasik chung vialte tih awk thing zong a za in a ngei. Fa tampi ngeih ding kan chunmang a si fawn. 

Stacy nih sechoh (marihuana) hi minung caah zeihmanh a chiatnak a um lo timi a ka hngalhter. Cin zong kan i tim, i Cocaine tlawmpal le Ecstasy he kan thlen te lai.

Caan karlak cu Stacy a damdeuh khawh nak ding caah AIDS damh khawhnak sii hlathlai kan i tim. 

A co awk aa tlaakmi a si.

Ka pa, na thinphang hlah. Kum 15 ka si cang i zeitinddah kai zohkhenh lai timi ka hngalh ko cang. Ni khatkhat cu na tufa le he nan i theih khawh nakding ah ka ra in ka hong in leng te hna lai.

Nan dawt tukmi nan fapa Cody.

PS: Aa, na lungre thei tuk hlah, ka pa, mah vialte hi a si tak lomi a si. Kan innpa ka len lio hna a si. Kan bizu tangbik i a ummi caminpuai-mark a phanmi nakin a tthalo deuhmi thil hi leicung ah an um ko timi na philh sual lai tiah kan theihter le a si. Kan dawt tuk ka pa!

Mah hi cakuat hi a rannak in laiholh rel fawi ding in van lehmi a si i an ttialmi taktak cu tu thla chung internet ah relbikmi a si lai tiah na ruahmi a si hika ah rel khawh a si. A si tak le si tak lo cu hngalh a si lo.

Kan theih ding le khuaruah awk a kan pe men lai tiah ka ruahmi a si caah ka van ttialmi a si.

Facebook ah Teirial Cattialtu Page hi Like le Follow rak tuah ve tiah kan sawm.

Mangtha/zingtha tuk uh.