Liverpool fan taktak ka si lo nain ka rak upat ngaimi club a si caah Premier League ah cun ka dawi ngaimi club a si. Rodgers nih a tlawmbik tu hnu kum khat tal cu Liverpool hi hruai rih ko seh law, Liverpool caah a chuakmi Manager a si taktak maw ti kan hmuhsak seh ti pumpak in ka duh ngai. Cu he pehtlai in a ruang tlawmpal ka van chim lai, i nan ruahning zong van chim cio ve te u.
Pakhatnak:
Liverpool hi hlan kum 10 lio an dirhmun ah an kir cang. Kenny Dalglish rian chawng in Rodgers nih manager tthutdan a lak hnu in Liverpool nih a hlan an sining an langhter khawh ngai. Roy Hugdson kha 2010-11 ah Kenny in an rak thlen zau caah cikhat te an rak tlaunak in an dir, nain Table-ah 8nk in an rak dih. A chia tuk cangmi inn remh cu a har ngai i Rodgers a luh hnu in a ttha colh ve lo. Sihmanhsehlaw, nan hmuh cio bang kan hnu kum kha Premier League ah van an rak tawng deng. Atu belte 5nk. ah an um lio a si i ruang pakhat cu "Tawh" a simi Daniel Sturridge sau tuk chuih lo in a rak i khawn caah a si kan ti cun kan palh lai lo dah. Liverpool hi Premier League i a thiambik pali chung ah aa tel dengte cang caah hruaitu manager hi thangtthat a tlaak ngaingai.
Pahnihnak:
"A thar paoh hi a ttha maw?" Voksa cu a tthing deuhdeuh le a thaw deuhdeuh tiah a duhtu nih an chim tawn. Nungak pawl balte nih "a thar paoh hi an ttha" an ti thilpuan ahhin cun. Liverpool ca belte ah a thar paoh a ttha men lai lo. Club tam tuk nih manager fawite in an thlen hna, a hleiin phaisa a tam hnu mirum pipi nih club an ngeih hnu ahhin a si khun. Cu tikah certual chung ral an tuk lio nakin thilthlen-kholhnak chung an luh ah fekte in an siangngakchia an tlaih khawh hna lo tikah thlen an tong. Cucu Liverpool nih atu hnu puai tlawmte lawng chuih ding a taangmi a hin an manager thleng sual hna seh law, a tangmi puai vialte hi Liverpool manager thar nih Rodgers nakin ttha in a hruai khawh hna lai ka zum lo.
Pathumnak:
Germany club Dortmund i manager Jurgen Klopp cu rian a kawl cuahmah i Liverpool nih an laak te lai tiah an ruah ziar. Zei sihmanh ah Liverpool uktu hna nih Brendan Rodgers hi thlen an duh a si ahcun Rodgers tluk a simi tel khi a hau hnga i Jurgen Klopp nak ttha cu an um hnga lo. Asinain Jurgen cu atu hi leicung Club lian panga hrawng nih an duh, i Manchester City nih Pep Guardiola hi Barcelo lio te khan an rak duh caah man tampi in lak ding an i zuam a si ahcun Bayern Munchen nih an fuh hamsa bik dingmi hi Jurgen a si ko lai dah ka ti. Asilo zong ah a rauh hlan ah Manager pakhat saupi tthutdan pek a duh lomi Real Madrid nih an duh khawh. Asinain Carlo Ancelotti nih tu a dih ding bawlung kum ah Title pakhat hnih a lak a si ahcun an chuah lai ka zum lo. Manchester City ah a kal te ding a fiang bik. England ah voikhat hmanh manager a ttuan ballo, Assis. manager zong a ttuan bal lo caah duak ti in lak cu Liverpool caah ruah a har pah. Amah kong cu za seh, Rodgers a chawng kho ding ka hmu hna lo ti khi a si. Na theih cun, van chim te.
Palinak:
Rodgers nih Liverpool rian a sok lio hi London ah ka rak um lio a si i amah nakin atu Everton manager Roberto Martinez khi ka duh deuh kong London i Lai hawi sinah ka rak chim ngai. Nain Rodgers an pek diam. Kum khat a von rau i an rak pe lo deng ka ti, aruang cu Rodgers nih a siangngakchia cawm a thiam ngai i Liverpool zong a tthanchoter. Rodgers tang ah Liverpool bawlungchuih a van i dawh deuh ngai i hmaikal an hraang ngai. Player cheukhat pumpak in a cawisan, a tthatter khawh ngai hna (Sturridge cu atu ah England ah a thiam pawl ai chuah, Coutinho tiah le amah tang in a kaimi a si i Liverpool hmanh in liam deng lakin cung ah a kaimi Raheem Sterling vawleicung mino ah a tthabik a hong cang.). Cu nakin a biapi deuhmi Gerrard ai dinh tikah Liverpool captain hi England mi a si lai lo ti phan a rak um ngai lio ah Jordan Henderson cu club lina tampi nih an duh tiang in a tthanter ve i Captain a pek, Europe ah a chuih caan a tambik a hong si (ai khawn lo caah).
Panganak:
Brendan Rodgers nih "I don't think there's anyone better. That's the reality of how I see it. Three months ago, I was a tactical genius and performing to a good level. We lost a couple of important games and suddenly you're not so good." tiah april 23. ah khan FA-cup in an chuah kong he pehtlai in an halmi a leh hna. Amah nakin Martinez ka rak duh deuh bantuk in mi thar a rak cawk lio ah tamtuk a cawk hna i ka rak zai pah, ahlei in Rickie Lambert le Adam Lallana a cawk hna ah khan ai fuh lo tuk ka rak ti, nain zeihmanh a si lomi Liverpool ca in a chuih ka hmuh tin ka ai a ka puantertu Mario Balotelli a rak cawk lio ah khan ka rak fak dom, nain Mario nih a kan deuh bak. Tu zanlei West Browmwich he an chuih zong ah a cawlte cawl lo. Sihmanhsehlaw, kan chim ttheo bang manager palh lawngte a si tawn ve lo, i Rodgers hi khi vialte mi cawk kong ah mawhchiat awk a ttha lo.
Foto: www.premierleague.com
Cc: Sky-Sport,
Comments
Post a Comment