Valentine's Day Thianghlim Tein Hman Ding

Mino Na Si Maw? Valentine's Day Ah SEX Tuah Hlah:

February thawk in kan facebook wall ah, news feed ah Valentine's Day he aa pehtlaimi tete kan hmuh khawh cang hna. Cheukhat cu an i ngaih, cheukhat nih zeiah an rel lem lo i cheukhat nih um hlah seh ti an duh. 

Vawleicung khuapi tampi i Hotel pawl cu tutan innrin ni, Valentine's Day ah innkhaan lawng lo in an um lai. Rawldawr zong an i manh lai lo i condom zong an hlonh cawk lai lo. Nuva hmanh an fale kaltak in hotel an fuh kho, i aa um rih lomi nungak tlangval siseh, mah cu ni ca lawng ah "onenight stand" in misingpi he Sex a tuahmi an tampi lai.

Valentine tuanbia nih a chuahpimi aa duhdawmi hna ni, tiah an sunhlawimi ni ahhin, nungak tlangval, a hleiin mino hna nih pahnih kar duhdawtnak si lem lo in nuamhnak men in caan a hmangtu an tampi tawn.

- Uarmi, duhmi, dawtmi he "Nuam tein zanriah ei tti. Len tti, movie zoh tti," tibantuk in caan hman i "SEX" tuah lo ding in Thailand i Moral Promotion Center nih forhfialnak a aupi: "Have a special meal, but not sex", an ti.

Venezuela ram hna cu condom bawm khat ah 30 a um i a man cu an thla khat hlawhmi zah deng a si cang. Condom company le nitlakram timi hna nih an kua duh ti lo (an ram cozah tthat lo caah). Cucaah Valentine's Day lai cu vava an tum, ti a si. Mah ti a man fahbu in a thlithup in a zuartu an um i condom a um ti theih le cangka in a dih colh peng, an ti.

Tu zarh ah "Fifty Shades of Grey" timi Movie cu ram kip i baisakup(cinema) ah an piah lai. Phaisa hmuh duh hrim ah a si. Mah movie cu SEX a tam i mitthitnak le lungthawhnak a chuahter kho ngaimi, nu pawl pa nih nuamhnak ah a hman hnaning pawl a si caah nu cheukhat le khrihfa tampi nih cun boycott tuah in zoh lo ding mi an forh. Puitling a simi nih cun zoh le zoh lo cun i tuak khawh a si, nain zoh zong ah zeihmanh tthathnemnak a pe lo tiah zoh lo ding forhfial duhmi a si.

Kannih Laimi, mino hna nih teh Valentine's Day hi zeitin kan hman ve lai? Valentine's Day si lo zong ah ni dang ah SEX cu kan tuah ko cu teh, ziah mah ni theng cu kan i sum lai? Condom pei kan hman ko lai cu, zeidah a poi? - Nau pawi lo zong, condom hman ko zong ah Valentine's Day hi hmai kum le a ralaimi kum pawl ah i ngaih ti lo in lung ah a taangmi i chirnak, chuahsualnak le philh khawh lomi ni si sehlaw teh?

Thailand ram ah cun mino nau a pawimi 1000 ah 50 lengmang kum khat ah nu kum 15- in 19 kar an si, tiah an ram ngandamnak lei zohtu cozah nih a chim. Mah ti a si tikah cozah phung tang ah silo in a thli in nau-hrawh a tam tuk fawn, ti a si.

Valentine's Day hi Sex tuah ni a si lo. Cucaah na duhdawtmi he nuam tein zanriah ei tti u, leng in i chawk tti u, laksawng i pe ulaw - SEX cu tuah hlah u, tiah  forhfial kan duh ko hna.

Valentine's Day ah nan lungduh tling hram ko seh.

HAPPY WEEKEND,
Leicung i chakleibik khuapi Tromsø um nan hawi :)