Caukhrawl I Chiah Ding Ka Duhmi Cauk

kl.
Happy Sweet December!
2014 cu a dih deng hoi ko. Nithla liam a ran caah maw si, zei ngaipi tuah manh lo in kum khat cu a liam rih ne lai. Asilo, zeihmanh kan tuah lo caah dah a si kum hi a liam tuan in kan ruah? Ei ding ah maw kan nun, nun ding ah dah kan ei? timi biahalnak a lo cang men lai. Minung nih nitin kan nun pawcawmnak rian pinah thinlung lawmh le nuamhnak caah kan huam le duhmi thil (hobby?) hi kan ngeih tikah nunnak hi a nuam in kan ruah khawh tawn. Cucu nih nitin caah ruahchannak a kan pek khawh. Cu bantuk kan duh le huammi kan tuah tikah ni le thla liammi chungah kan diriam, i kan cohlan khawh tawn.

Tu kum cu a liam cang lai. Na rian le cacawnnak leng i na duhmi gym kal, hlasak, hlangaih, ngasio, music tum le zei? a phunphun a um, i caan na pek khawh mi ah na tuah manh hna a si cun zeihuaha lo ah kum a liam na ti lai ka zum lo. Kei zong ngasio ka huam ngai, i tu kum cu nga sio ah ka chuah a rak tam ngai, tamlak zong ka sio. Hmai kum zong ka sio rih lai tiah hi khuasik vur le horha lakah tthal chuah lai iruahchan in ni le thla an liam ko lai. 

Cauk kong chim kai timhmi a si. Carel hi imanh caan tuahmi, kan huam ding a biapi takmi ah mifim a tamdeuh nih an ruah. Kan holh in carel awk a tlawm a si ahcun kan thiammi holh phun in ca tamdeuh kan rel ahhin kan miphun tthanchonnak le lungthin damnak a si lai tiah miphun daw kan ule le kan pale nih an chim ttheo. Kei zong ka banh khawh tawk ka banh ve, i hi ca a reltu tampi zong a ralaimi kum 2015 chung ah ca tamdeuh rel ding in forh kan duh hna. 

Laiholh in naite a chuakmi biazai; Ka Sian Lo Vaurawng, Aidii ttialmi hi cawk le rel cio ding a si. Ka caukhrawl ah i chiah ding ah ka thim. Norway in Dk Te Unau chuahmi Ttahnak Hla le Haiku Biazai hi an chuah aa naih ngai nain cawhpawlh lo in i dang cio in biafang an hman khawh caah ka duh. Tu kum i ka relmi cauk tlawmpal chung in ka uarmi cauk cheukhat le ka caukhrawl ah um hna seh ti ka duhmi pawl ka von ttial hna lai. 

2014 chung ka relmi cauk cheukhat min le ca ttialtu:
  1. The Sleepwalkers - Christopher Clark (ralpi pakhatnak a rak i thawkning a ttialmi a si i tu kum hi ralpi pakhatnak a rak i thawk kum 100 a tlin kum a si caah rel a nuam khun.) 
  2. KING - David Levering Lewis (Martin Luther King kong, third-edition a si.) 
  3. Ram King - Joel Ling (Lairam ka hmuh ti lonak kum 11 a si ah ka relmi a si i va hmuh tthan lai a ka ngaihter) 
  4. Manhunt - Peter L. Bergen (bin Ladin an kawl le thahnak a si i media i kan relmi lawng a rak zat lo ning)
  5. Quran in Conversation - Michael Birkel (ISIS biatak tein an hran hnu in Quran hi rel ve reng ning ka ti i mah hi cauk zuartu nih rel ding ah a ka siaherh i ka rel. Mino tampi nih an relmi a si.)
  6. Vinternoveller - Ingvild H. Rishøi (Norway holh tuanbia tawi pawl) 
  7. Europa - Amalie Kasin Lerstang (keimah tthi te a si, avoi khatnak a tialmi cauk a si)
  8. Norwegian Wood - Haruki Murakami (Murakami hi Japan catial thiam a si i a cauk pakhat tal rel lo cu tiah ka rel, ka duh ngaingai.) 
  9. The Fault in Our Stars - John Green (ka hawinu nih Christmas laksawng a ka pekmi a si, ka rel i J.G ttialmi tthiam Looking for Alaska ka rel chap.) 
  10. 100BigIdeasToHelpYouSucceed - Mark Ridley & Ian Mills ( caan ngeimi nih laiholh in let hna seh ti ka duh ngai.
2013 le 2014 chung ah ka relmi dang um len, Hillary Clinton ttialmi "Hard Choices", Doris Lessig tialmi lenhloi-tawi khomhsuat hi rel an nuam ngaingai, Lainu tampi nih rel hna seh ti ka duh ngai. The Kite Runner le A Thousand Splendid Suns timi cauk rel hnu ahcun cattialtu Khaled Hosseini nih a hnubik a ttialmi And The Mountains Echoed timi rel lo in na um lai ka zum lo, ka naule zong rel ve u tiah ka chiah piak hna. Forums ah ka rak rel cangmi Victor Biak Lian i Ka Philh Kho Lo zong 2013 tthal ah ka rak rel tthan, a cauk i tlaih in rel kha a nuam. Cauk dang kan ttial piak tthan seh ti ka duh ko. 

Kan inn ah a siloah ka caukhrawl ah um peng seh ti ka duhmi Laiholh cauk 10: 
  1. Bible - Laiholh in (Laimi khrihfa kum zakhat tlinnak "1899-1999" indonisian bible society nih an rak printmi a chahpi kha, a tthing cang nain a thar an nammi pawl nakin ka duhbik.) 
  2. Lai Nunphung - Stephen Ni Kio (Laiholh in kan kong i cherhchan awk tthabik ah ka ruah)
  3. Lairam Mi Langsar Pawl le Pathian Kutneh Mawizia - Falam Christian Literature Society, Kalaymyo (Falam in a si, Lairam i mi hmasa hna le minthang fingtlang hna kong rel duh tikah i neih awk a ttha)
  4. Ka Zahpi Lo - Hrang Nawl (rosung pakhat bantuk in i chiah awk ah ka duh.) 
  5. Laimi Phun Thawhkehnak le Khuatlaknak - Ngun To
  6. I Tonnak - Joel Ling (A thimi zong an tampi cang, Laimi ah anih timi hna lawngte an bia hi a hmun ding a si.) 
  7. Lai Tuanbia Khawmhsuat Pawl (Hlanpi in pi le pu nih an rak kan chimh tawnmi Keitlau tuanbia, Phete le Puvom, Ngun Nu, Liando te Unau tibantuk pawl a zate khomh in ichuah kho seh ti saduh ka that.) 
  8. Chin Miphun Thawhkehnak - Chawn Kio 
  9. Fidi Biazai Cauk - Fidi Phu (Catialtu 40 hrawng nih cauk uk khat ah biazai 100 leng an ttialmi a si. Miphun dang zong nih cauk uk khat i catialtu mah zah khomhmi an ngei lai ka zum lo.) 
  10. ??????????
Christmas hmang nuam ulaw, 

Comments

Post a Comment