(23. August 2014): English Premier League cu august 16. khan an thawk tthan cang. English Premier League (EPL) hi Laimi nih cun kan theihbik, kan zoh bik lawng si loin England phu zong hi Laimi lakah ttanhtu tambik a ngei. Cucaah Spain La Liga zong a um ko nain tutan premier league a dih tikah zei club dah pakhatnak a si lai, champions league chuih kho ding top 4 chung ah hodah ai tel lai i top 10 tiang mizeidah ai tel lai timi ka zumhning in ka phuan lai. Cu zong cu mahhi ca ka ttial tiang i club pakhat cio nih an cawkmi minung zoh in le a zarh hnihnak premier league an chuihmi phichuak le ni kum an donghning zoh in ttialmi a si lai.
Tutan cu "Chelsea nih premier league luchin ai chinh tthan lai," timi ka tlangtar hi Liverpool, Manchester le Arsenal ttanhtu pawl caah a thaw lo ngaimi lakphakti bantuk zong a si kho men ko. Cun club lian pawl nih mi thar tthattha an i cawk cio tikah pakhatnak a si kho ding club pali an um caah nan mawh hnga lo. Thla pa thla kua le thla hra chung a taang rihmi kong hi ka zumhning in dah ti lo cu chim a har. Cucaah na tha chia hlah, na club zong nih maw ai chinh huarte, hodah chim kho?
Zeipaoh si ah Chelsea hi ka zumh caah ka zumhnak a ruang ka chim lai. Chelsea i a chuihtu hna hi anmah le zawnka cio ah leicung mithiam lak i ai telmi an si. Tutan tthal chung ah an cawkmi le zuarmi, an i thlen nawnning a tthat tuk hlei ah manager ttha taktak an ngei. Ni kum kha zoh ulaw, pakhatnak he an rak i hlat tuk lem lo. Ni kum i pakhatnak le pahnihnak a simi Manchester City le Liverpool he an chuihmi paoh kha a rak tei fawn hna. Cuti a si tikah a fimzer ngaimi Mourinho nih hin a biapimi puai pawl hi a teining a theih tuk i ni kum i top 8 chung i club he an chuih ah khin puai 14 ah puai khat lawng a rak sung. Mourinho lungtlinhtu hmaikal an rak um nalo in pakhat he an rak i hlat lo i tutan cu a lungtling hmaikal a cawk cang.
Cawngia tang ah rel chap:
Premier League 2014/15 teitu ding le top 10 chung ah ai tel ding ka zumhmi cu pakhat hnu pakhat in ka zumh hna nak a ruang he ka von ttial:
1. Chelsea
Tutan hi cu ruang, kha ruangah tiawk a um ti lai lo. Ni kum kha a dih lai puai hnih ai duh tiang pakhatnak an rak dawi ve, cun goal tlawmbik a thlahtu an si. Club liandeuh paohpaoh cu an rak tei hna i inntek an tlaihmi chung ah puai tlawmte lawng an rak sung. Hmaikal tthami te ka duh tiah Mourinho nih a sawh i La Liga ah Atletico Madrid pakhatnak a lakpitu Diego Costa a cawk. Cu lawng si lo, Atletico a hlanhmi hna an goalbawh Thibaut Courtois zong a kir tthan cang i Atletico i an hnukham Filipe Luis a cawk chih. Lampard a zuar nain leicung alaikal ah mithiam ti vemi Fabregas a cawk fawn. Drogba nih zeipi a bawm kho ti hna lai lo, nain a herh caan ah thil a thleng khotu a si lai tiah Chelsea nih an lak tthan. Torres zong a zuar hlei lo i World Cup ah a ke chuahpah caah mi thlengtu ttha taktak a si lai.
Goal tlawmbik an rak thlahnak a ruang zong hi hmaikal an rak tthat lo caah hnukham kha fekte in a rak dirter khawh hna caah a si. Hmai nortu an rak baumi cu a thluak tlingaimi Fabregas le a tthawngmi Costa nih ttuanvo an lak cang lai, timi cu premier league an thawk hnu puai hnih an chuihmi chung in a hong fiang put. Hnukham thar Matic zong khi a thiam ngaingai, tthate in a chuih colh. Oscar a puitling chin lengmang pinah Harzard hrim cu Messi le Ronaldo vanhai lo in Mourinho a chih cang. (Mi thar cawk ai tim ti rua lo.)
2. Manchester City
Ni kum ah khan a dihnak puai nga a peh in an tei hnu ah EPL teitu an rak si. A rum tukmi Manchester City cu UEFAs Financial Fairplay nih phaisa tam hman an kham hna, nain mi thar hmuh khawh an si; Arsenal hnu kham Bacary Sagna pinah hnukham ttha takmi Eliaquim Mangala cu Porto ah an va lak i a tthawngtuk mi Kompany bawmtu ttha an si lai. Goalbawh thar Willy zong khi a zabak tiah an cawkmi a si.
City nih a biapimi minung zuar lo in a tlaih khawh dih hna. Hmaikal ah Aguero, Jovetic pinah atu tiang cu Dzeko zong a ke ttha rih. Negredo hi thla tam nawn a chuih khawh lai lo caah an dernak a si kho. Cu lakah Yaya Toure le David Silva cu a biapi taktakmi an si rih lai, i Lampard nih thla zeimawzah a umpi hna lai i an i khawn hna lo paoh cun zoh a nuammi an si tthan ko lai.
3. Arsenal
Ka thlingza pah nain Wenger hi ka zumh tuk. Ni kum kha september in febuary tiang puai 24 chungah 17 a rak teipi hna, nain kum a dih tikah palinak ah an tla. Club liandeuh he an chuih ah a sungh tam caah aa canhdeuh a hau. August thla a dih rih lo i mi cawk a duhmi a um rih, phaisa a hon hmang ngai i Alexis Sanchez cu Barcelona in a cawk caah hmainortu tthadeuh cu zoh a nuam lai. Fabregas cu cawk tthan khawh a si ko nain amah airawltu Aaron Ramsey hi a dam i a tthat saling a si caah Ozil he bochanmi alaikal an si ko lai. World Cup ah England le Uruguay teitu Costa Rica hmaikal Joel Campbell zong Arsenal hmaikal a si cang lai, i Sagna airawltu Mathieu hi a za taktak. Arsenal hi hnukham an zuarmi Vermaelen chawngtu an cawk khawh i Chelsea, City le Liverpool puai ah an tthawng ahcun pakhatnak la kho zong an si ve ko.
August thla a dih rih lo i Wenger nih mi cawk a duhmi tete an um rih, caw kho a si rih caah pathumnak hi cu tlawl lo in Champions League chuih kho a si tthan te ko lai.
4. Liverpool
Caan sau ngai Champions League chuih ti lo hnu ah ni kum kha Liverpool an tthawng taktak, i pakhatnak he ai naihbik an rak si. Asinain an tawh Suarez cu Barcelona ah an zuar cang i tawh a ong khotu ngaingai cawk ding a har cang. Suarez man in Lallana, Lambert le Markovic pinah hnukham ttha ngaimi Dejan Lovren an cawk. Ni kum ah goal tamtuk an thlah i hnukham ttha an cawk khawh caah tampi an i ning kho.
Hi ca ka ttial tiang ah Suarez chawng kho ding an cawk rih lo i Mario Balotelli cu AC Millan in cawk ding a fiang nain an caw tak rih lo. An cawk khawh a si ahcun tamtuk an i thleng lai tiah ka ruah. Eto zong caw kho an si, i ai tlak ngai lai. Cucaah City le Arsenal hmun zong hi a rawlh khawh te men. Sterling cu a thiam chin lengmang ve i Sturridge zong Suarez um lo hnu cun goalsut hi a rian ah ai ruah ve caah le mithar a cawkmi an par ahcun top 4 hin cun an tla lo hrimhrim lai tiah ka ruah.
5. Manchester United
Kum 20 chung ah a voikhatnak bik champions league an i tel lo kum a si. An manager thar Van Gaal nih tampi thlen ai zuam i a thlen cuahmah. Evra ai ah Luke Shaw a cawk, i Paul Scholes ai rawl kho ding tiah ruahmi Ander Herrera a cawk ko nain mi thiam pahnih cu a tlawmbik in a cawk hna a herh. Cucu ka rian a si lo nain august dih hlan ah asilole january-window ahhin a cawk khawh lo ahcun champions league cu an i tel kho rih lai lo.
Juan Mata, Van Persie le captain tharte Rooney hna hi ttha tein an ke a chuah a si ahcun tampi aining fawn lai. Hi ca ttial ni ah Real Madrid akil tli Di Maria cu cawk ding hnatlaknak an ngei ti a len caah an cawk a si i Liverpool nih Balotilli an cawk khawh lo ahcun i thlen te khawh an si.
Sihmanhselaw, thinphan a um ngaimi cu Van Gaal bawlungchuih duh daan le Manchester United minung hi an i tlak khawh lo ngaimi hi a si. Van Gaal nih bawlung-filawsofi thar tiin 3-5-2 in a chuihter hna tikah Man-U hi hnukham ttha ngaingai a ngei lo i a har kho men. A rannak in alaikal tthami te a cawk zazawk a hau ko.
6. Everton
Everton hi top 10 ah an umnak a chan sau cang. Tu kum zong an phu ko, an thiam taktak ve. Gareth Barry le Chelsea nih an hlanhmi hna Lukaku nih ni kum kha 5nk. ah an rak kaipi hna. Tu kum zong an ke ttha rih lai, i England mino Ross Barkley le John Stones zong an tthangcho. Kum 10 leng top 4 chung ah an i tel kho lo, i tutan zong hi an itel lai ka zum kho lo.
7. Tottenham
Tutan tthal cu Tottenham hi an dai taktak, mi thar an caw len rih lo. Ni kum kha Andre Villas-boas nih mi thar paiper khat in a rak cawk hna nain Tottenham a cawisangtu ngaingai an rak chuak lo. A hlei in Bale an zuar hnu cun an der taktak. Cu vial minung cu tutan zong hman rih a timtu manager, kum 11 chung ah manager pariatnak a simi Pochettino cungah ruahchannak a tlawm.
8. Stoke
Ni kum ah 9nk. an rak si. Puai hlei chung ah puai khat lawng an rak sung ve i kum 39 chung ah an tthatcem a rak si. Kum sarih peh in top 10 chung ah an hon i tel khawhnak hi atu an manager Mark Hughes thawng a si ko, i Peter Crouch hi a biapi ngaimi a si. Tu kum cu Barcelona zong ah a rak chuihmi Bojan Krkic an cawk caah Stoke zoh hi a nuam lai i pariatnak hi cu an si te awk ah ai tlak ko lai.
9. NewCastle
Ni kum kha an thawk cu a ttha nain puai 20 chung ah 14 an rak sung. Ni kum kha 10nk an rak si i palinak a simi Arsenal nih 30points in an rak thlau hna. Kum 11 chung hi top 5 chung ah an i tel kho ti lo i a ngeitu nih tthawnter an duh lo mi bantuk a si. Minthang cia a si caah phaisa tamdeuh in chuah hna sehlaw a kai tthan khomi an si ko. Tutan hi pakuanak an si khawh lai a har nain De Jong le Remy Cabella an lak khawh hna caah tampi an i ning ko lai.
10. West Ham
London um club a si nain a rum tuk ve lo. Sihmanhselaw an manager Sam Allardyce hi pa za ngai a si ve, ni kum kha top 10 ah a telpi kho hna lo nain 13nak ah cun a rak chiah khawh. Tutan cu top 10 ah a tli kho ding ah ka ruah, aruang cu World Cup i a lang vemi Enner Valencia (costa rica) le Mauro Zarate timi an lak khawh hna caah a si. Cun Andy Carroll zong cu ai khawnmi damlei a panh cuahmah ko. Ttanhtu (fans) hi an biapi ngai i Sam hi tha an pek khawh ngai caah tu kum cu 10 lakah an i tel ko lai.
Biatlangkawm:
London i ka um lio ah ka innpa taktak a simi Queens Park Rangers (QPR) hi tu kum an hong kai ve i top 10 cu an i tel kho lai lo nain hleinganak tiang tal cu an i telte lai tiah ka zumh. Ferdinand a lakmi hrim khi uar um ngai. Ka class he hmaitonh in a langmi Chelsea stadium Stamford Bridge hi ka mittlam ah a cuang fawn. Champions League an lak kum 2012 ah khan a rak si Chelsea manager thlen a tam lio a si caah an rak zum lo tuk hna. Last 16/(1/8) cu Napoli he an rak chuih tikah zoh ka rak duh ngai nain Napoli nih 3-1 in a tei cia caah an sungh ding zoh cu ka hawile an rak huam lo i ka rak zoh ve lo. Asinain Chelsea nih 1-4 in (azapi 4-5) a rak tei tthan. Mah cu Liverpool le AC Milan (2005) hnu i khuaruahhar thil ah rak ruah a si.
A dang a tangmi 10 cu kong cu ka chim ti lai lo. Ka uar ngaimi club zong an um rih nain hi vial hi august thla mi cawk caan a dih hlan chung i ka hmuhning le ka zumhmi hna kha bawlungchuih thiam huaha lo zong ah a zoh thiam i a uartu hawikom nan kuttlaih can ah ka von ttial. Kum a dih tikah hohmanh i chalh duh lo a si lai. A hnubik ah Chelsea a rak cawtu le Chelsea nih teinak a hmuh ding ahcun phaisa hman ai sum lotu Roman Abramovich, le Chelsea a rak nunh tthantu Mourinho nih Chelsea cu (2009/10 ah Chelsea nih hnubik EPL a rak tei.) siangpahrang luchin a chinh tthan ko lai ti zumhnak he ka ca ka donghter.
----------------------------------------
Theihternak: Mah cabia hi Tthintthang Mekazin, september 2014 caah 23. august 2014 ah ka rak ttialmi a si. Mah lio ahcun primier league transfer-windows an rak khar rih lo i mi thar cawk le zuar a dihdeuh hlan a si. A dih hnu in zeimaw cu ai dang kho ngaimi a si.
Comments
Post a Comment