Zinan in a rummi Norway, daihnak min pu in leicung i a sangbik laksawng peknak Nobel Peace Prize petu ram, vawleicung ah mihar bawmhnak le khuacaan siamremhnak caah phaisa tambik a pe lengmangtu Norway ram aa dawhnak hi ram dang i ka hawile nih hmu ve hna seh ti a duh tukmi pa a um. Mah cu pa cu mawttaw chung ah it in kilometer 15000 leng mawttaw mawngh i thla nga chung caan a lak hnu ah Norway zeitluk in aa dawh timi vawleipi a kan hmuhsak. (Cung hmanthlak: Anau/ private. 2011 ah a rak thlakmi a si.)
Cu pa cu Morten Rustad a si. A tang ah a thlakmi video zoh khawh a si.
Norway ah Chinmi 2000 hrawng kan um lai tiah ka ruah. Khua 50 hrawng ah kan i tthek i a tamdeuh cu Norway thlanglei ah kan um. Norway ah miphun kan tling ngaingai fawn. Norway cu khuati pali a ngei i tthal, thinghnah ttilhcaan (autumn), khuasik le thinghnah corhcaan (spring) in a um i anmah le caan cio in an i dawh dih. Vawleicung ah rili-peem (fjord) tambik a ngeimi ram a si i tlang ah tibual zong a thong in a um. Ram pakhat koko ah cun lung a tambiknak a si lai, lung a tam tuk i cinthlaknak a tthami hmun a tlawm. Fingtlang an i dawh i an thingram zong aa dawh, farkung phun hnih thum in a um. Khupkhi zong a um ve.
Lairam he aa lo an ti pah cio, nain a chan saupi cang rua, tupi le thinlung hi an tthing tuk. Fingtlang hna zong Lairam fingtlang he an i dang ngaingai timi video hi nan zoh cun nan hmuh khawh lai. Tlaang tang le rili kam i khua an tlak le inn an sakmi hna nih a dawhter khun.
Morten cu mino te, hmanthlatu a si. Norway ram aa dawhnak tiin video tampi zoh awk le hmuh ding a tampi nain amah tein thlakmi kha a hawile ramdang mi zohter ding ah thla nga rau in caan a pek. Amah tein mawttaw a mawngh i mawttaw chung ah a it. Kilometer 15000 leng hi thla nga chung ah a mawngh hnu ah Norway i aa dawhnak le a rem caan pawl ah a thlak hna. Thla nga chung ah cun khuasik nakin tthal le autumn hi aa seldeuh rua, khuasik a dih lei in a thawk timi hmuh khawh a si.
Keimah ka umnak Tromsø zong ah Northern Lights a hong thla i a khuapi cung i khuadawm bang hring zuai in a zaammi a thlak khawh.
A thlakmi youtube in le DB chung ta tiin ka tar; innrin ni a si ko le caan pe law zoh ve hrim tiah ka sia na herh.
---
--
Comments
Post a Comment