2014/15 I University Tthabik 500

Vawleicung i catang sang phan tambik ram tiin kan hnu ah ka rak ttialmi chung ah USA i sianginn kai man a fahning zong ka rak ttial chih. USA sianginn cu kai man a fah ve bantuk in leicung ah sianginn tthabik an si, tiah tu kum chung i leicung university tthabik thimnak paoh ah a cunglei ah an itel hna. Atu zong kum dih lai ah 2014/15 ah zei university dah a tthabik timi an thanh tthan.

University tthabik thimnak cu UK le US nih an tuah ngai. Media pawl zong nih an tuah len i an zohning aa dang tuk hna lai lo nain a tthabik an thimmi cu aa dang ngai hna. Tahchunnak ah UK in Telegraph nih september ah khan leicung university tthabik 100 a thim i anmah UK in Cambrige le Imperial College London cu pahnihnak veve ah a chiah hna. Guardian he an i khat ngai i top 10 chung ah UK sianginn 4 an telh.

Times Higher Education hi kum tin tiawk in leicung sianginn tthabik thimnak a tuahtu a si i THE thimmi hi an pom khawh bik ah a cang. Guardian le Telegraph nih MIT cu pakhatnak ah an chiah lio ah THE nih cun 6nk ah a chiah, i Caltech tu khi pakhatnak ah an chiah, i UK in pathum lawng top 10 ah a telh.

A hnubik i "Best Global Universities Rankings" timi report a chuahtu hi USNews a si i university tthabik a thimmi ruangah an theihmi media pakhat a si caah sianginn ttha theih duh ahcun a biapi ngaimi cherhchan tlak a si. Tahchunnak ah US i sianginn tthabik le liberal art college thimnak hi biatak tein a tuah, i september ah khan national university thimnak ah Princeton a rak thim nain atu i Best Global Universities Rankings a tuahmi ah Harvard cu pakhatnak ah a chiah i Princeton cu hleithumnak ah a chiah tthan.

Sianginn thimnak an tuahnak ah an zohmi hi aa khat pah cio, i cu hna cu - cachimh (teaching), hlathlainak (research), theihtlei i cheuh khawhnak (knowlege transfer) le vawleicung i huham an ngeih ning (international outlook) tiin an si. USNews nih an zohmi university hna i sianginn a lutmi le a chuakmi pawl zoh chih in le cu sianginn hna nih research an tuahmi kha fakpi in a zoh.

Sianginn ttha timi hna hi a ngeitu an rum caah an si tawn. Cu ve bantuk cun siangngakchia ttha tampi an ngeih caah a si. Sianginn ttha hna ah kai khawh hi a sunglawi lai nain siangngakchia ttha le ca aa zuammi nih cun an kainak sianginn kha an rak cawisan lengmang khawh. Tahchunnak ah tu kum i Nobel Prize in Medicine a ngahmi Norway hna nuva cu THE nih a thimmi top 500 chung ah 270nak hrawng i a ummi Norwegian University of Science and Technology (NTNU) ah thluak-lei research a tuahmi an si i anmah thawng in NTNU cu a min a ttha chin cang lai. Laimi zong a kaimi an um ve cang.

USNews nih sianginn ttha a timi 20: Full cu Kahin Zoh

1. Harvard University
2. Massachusetts Institute of Technology
3. University of California, Berkeley
4. Stanford University
5. University of Oxford (United Kingdom)
6. University of Cambridge (United Kingdom)
7. California Institute of Technology
8. University of California, Los Angeles
9, University of Chicago
10. Columbia University
11. Johns Hopkins University
12. Imperial College London (United Kingdom)
13. Princeton University
14. University of Michigan
14. University of Toronto (Canada)
14. University of Washington
17. Yale University
18. University of California, San Diego
19. University of Pennsylvania

20. Duke University

foto: thecrimson