USA Cu Syria Theihpinak Tello In Syria Ah Ral A Tu

Zahan zan i USA nih Syria ah bomb a thlak ruang ah IS 200 deng an thi. Syria i Assad cozah cu chimh chung an si lo, i tu zing (DC time) ah Obama nih IS donak ding le dawinak ah a herhning in thil kan tuah lai, ti a chim. Mah hi USA ral lawng a si lo, timi aa tlaih. Cucu a rak i tinhmi a si.

Mah hi bomb thlaknak ahhin USA, Saudi-Arabia Bahrain, Qatar le Jordan an i tel i IS cu rocket 160 leng in an kah hna kong Pentagon nih a thanh. "Ram ngeitu Syria hnatlaknak kan rak hal lo pinah hi kong ahhin Syria cozah he kan ttuantti lo," tiah Pentagon i biachim kho Jen Pesaki nih a chim.

Relchap: OBAMA RAL

Syrian Observatory for Human Rights (SOHR) nih a chimning ah Islamist-jihadish 120 le IS chungtel 70 an thi.

Zeisihmanh ah Syria cu cozah tling le ram pakhat a si i UN hnatlaknak tello (UN SC ah ceih lo in) mah ti an kahmi cu a si caah Syria kong ahhin US cu sawiselnak a tong chin lengmang rih lai, tiah ka ruah. Syria he IS do tti a duh lo nain IS hi Syria cozah dotu tapung USA nih a rak bawmhmi hna chung in a rak tthang i hriamnam le thilri a ngeimi an rak si. Syria i zinaan an hngilhnganhmi khi atu tiang an hngah huam rih. I Syria ram kong taktak cu an buapi lem lo.

UK nih atu tiang cu vanlawng in bomb thlak ding a cohlang kho rih lo, nain a rauh hlan ah David Cameron nih bia khiahnak a tuah lai. A taktak ah cun ke-ralkap tu lut in hi ral cu teiding ah zumhnak an ngei cio. Cu a si lo ahcun ram mi sasawh kha bomb thlak hnawh zong a fawi caah an duh lonak hi a si pah. Cu pinah Syria cozah theihpinak tel lo in a ram chung ah mah ti ral a thawhmi hi ram kip (RUssia, Tuluk le a dangdang) nih an i cawn lai, i UN hi zeihmanh holhnak nawl a ngei ti lai lo ti zong an ruat.

Ralthawhnak hmun ah ralkap le hriamnam kuat ti lo ding tiah phunghrampi ah fehternak a tuahmi Germany nih cu phung buar riangmaang in Kurdish pawl sinah hriamnam a kuat ve. Turkey nih ralkap le hriamnam cu hmang lo in IS ruang i ralzam thong tam tuk caah innka a on i tuni lawng hmanh ah 7000 hrawng a luhter hna i an karh chin thluahmah lai tiah ruah a si.

US nih zeidah a tuah, a ruah timi fiang tak in IS donak i aa bawmmi ram pawl nih an hngal taktak lo. Syria cozah nawl hal lo le theihternak tuah lo in Syria ah an duhduh in bomb an thlakmi cu a palh tiah a bawmtu le NATO ram pawl lila nih an chim cang. Iran tu nih cun bawmhnak a hal bantuk in hriamnam zong an bawmh.

Middle East i ram tthawng Saudi-Arabia le Jordan, le Qatar nih an von bawmh tikah USA cu a hnangam khun. Mah hi a rak i timhmi, bawmtu le dirpitu kawl hmasa in IS hi den ding a si. Cucu lungsau lo in Obama an rak sawinak kha a si. Mah nih tampi a kan cawn piak. Cu ve bantuk in IS hi phur le ciamhter a duh taktak a si ahcun Syria cozah zong a chawnh awk a si tiah an mawhchiatnak cu a si. IS maw US nih hin ai buaipi hmasa awk a si Syria?

Relchap: ISLAMIC STATE KHAMTU DING

Atu ah Russia cu US le EU nih lam an phih, sipuazi an phih piak cuahmah lio a si i cawl kho lo deng in an tuah lio ah caan ttha hmang in Syria cu tihin a tuahto khawh. Sihmanhsehlaw hi caan te ahhin Tuluk le Iran pehtlaihnak a rak tthawng chinchin ve. IS hi Iran nih do ding ti an ruah ve nain an caah thil fadeuh a rak si, i US he hmaitonh tu kha an rak duhdeuh mi a si caah IS hi an rem lo bu in IS kong ah US cu mi ralchia (ke ralkap thlah ngam lo.), Syria cozah upat lo le international phung buar tiin an den ve.

Syria i bomb an thlak lio ahhin rammi (civil) ngakchia 3 le upa 8 an thi chih, tiah SOHR nih a chim. Mah cucu an duh lomi a si, i atu hi Iraq kong ah cun bawmhnak kan si khawh tawk kan i zuam nain Syria cozah theihpinak tello in Syria ah ral thawh cu tha kan pe lo, amah tein USA nih aa phisin a herh tiah EU ram cheukhat nih an chim.