A kan huatu an um, i a kan dawtu an um. Cu bantuk in USA president Obama cu american tampi nih an uar i tampi nih an huat tuk ve. Atu hi president a ttuan term hnihnak canceo a hong si cang i Obama a uartu hna nih cun 2016 i thimnak ah Obama an thim tthan te men lai, i term thum a peh khomi president zong maw a si te. Asinain, amah Barack ah silo in amah Obama a lomi pa hmang in hei chimmi a si.
2008 USA president thimnak cu november 4. in a dih i president thar cu american minak Barack Obama a si tiah vawleipi a cul manh. American tuanbia a thlen, i vawleicung tuanbia zong a thlen. American i cuar sen, nak le eng pawl caah ruahchannak zong aa thleng ve i American Dream timi cu a tharchuah. Cu lio caan te ah cun mi pumpak nun zeimaw zong a rak i thleng ve ko lai, i cu hna lakah Louis timi pa nunnak cu chun le zan bang a rak i thleng. (Cung hmanthlak khi Norway a rat lio, Obama a lomi Louis a si, TV2)
President thimnak a dih hlan ni li ai duh ah New York i Bornx ah cun Hallowen-party tuah ding in ttamhmoih le thilpuan phunphun he a cheu nih leicung minthang fidi/fitlaw le ramhruaitu asiloah khuachia le ttihnung in an i thuam cio hna.
Mah cu party ah kal ve ding in rian ngei lo in a ummi pahmei Louis Ortiz (38) cu a kal tawnnak local-pub i hawile nih suits/dress thar te an cawk piak i an i aihter. An sawm i cu hallowen-party ahcun an rak kalpi. Mah cu zan ah cun a nunnak a muimi in a ceumi chun ah a rak i thleng.
- Mah zan nih ka nunnak a rak thlen. Ka tuahmi taktak cu suits i hruk in hawi sinah keimah sinig tein um kha a si, i mah ti cun teinak ka rak hmu, tiah Norway a tlawng liomi Louis nih a chim. (Obama president si hlah seh law Norway hna cu a phan kho lo men.)
2008 president thimnak a dih hnu nili ah Louis cu South-Korea ah HBO film thla ding in a rak kal. "Bronx Obama" tiin Louis nunnak tuanbia le Obama he a caan lio te in an rak i lawh tukning kha director Ryan Murdock nih a thlak i atu hi Europe ah mah cu film kongah khual an tlawn cuahmah lio a si.
- President thimnak a dih nili hnu ah South-Korea ah kan kal i film kan i thla. Cun Japan ah kan lan colh i mi tampi nih an ka don, i ka kir lai ah thlatu tampi ka ngei. Mangttha law, pu president, tiah Japan pawl nih cun an lukhun pah in an ka thlah, tiah Louis nih a chim.
Louis nih cun Hillary Clinton kha preisdent ai cuh lai i vote ka pek te lai tiah tuante in a rak i ruah chihmi a si. Sihmanhsehlaw, amah tu kha preisent a tling ai, amah tu nih a nunnak caah teinak a hmuh. Obama president a tling i president he ai lomi Louis, rian lo in saupi a um cangmi pahmei cu HBO ah rian a rak hmu colh.
President Obama he an itong ballo.
Louis cu ramkip le company kip nih an thil fakthanh (cawngia) tuahpiak ding ah an rak sawm. Chikhat te ah a laar ning a rang tuk. Tv-show cu USA ah an thlak cuahmah i a rian a rak tam ngaingai. Sihmanhsehlaw a fanu zawn ruat i cikhat cu President angki kha bizu ah a rak fim chung i a fanu sinah caan a rak pek ve.
- 2012 president thimnak a hong chuak i manager thar ka hon ngei, mah cun rian fakpi in ka ttuan tthan. USA ahhin Obama lawh ruang i a paw ai cawmmi an um len ko nain keimah nih ka lawhbik. Zeihmanh tuahchom le ser chommi ka si lo, ka sining te a si, i ka hnakhaw zong hi serchom a si lo ee tiah a nih pah in a chim.
Louis Ortiz nih nihin tiang Obama a tong rih lo nain 2012 i president an thim tthan hlan te ah Bill Clinton le Mitt Romney he ai lomim pawl he khual an rak tlawn ttinak a chim. Asinain Obama nih Louis i a hmanmi twitter cu a zulh, i Louis kong a theih ko. Obama hi president pakhat sinak in ka duh/uar, i mah cu khuaruahhar awk a si tuk lem lai lo, tiah Ortiz nih a chim.
President nih bia a chim cang lai tiah cun TV hmai ah to in Obama nih a chimmi kha note a lak peng i Obama cawlcangh le mitau pinah a bia zong a ngiat tawn.
Obama a lawh tuk caah Obama i an ruah hi a tlawm ti lo kong a chim, i selfies/hmanthlak an sawm i an thlakpimi hi a tlawm lo. Mi sasawh lawng si lo in hollywood fidi/fitlaw pawl zong nih an i thlakpi len kong a chim. - Sihmanhsehlaw Obama a rak huatu an tam ve caah Obama nawlcawng in rian a hmumi Ortiz cu a umkalnak ah a rak huatu an rak um lengmang ve. Asinain Louis caah American Dream a simi a rian cu nihin tiang a peh zulh rih. (Atang hi Obama a lomi Louis le Obama taktak.)
Term thum president ttuan ding Obama?
Obama lawh ruang i rian a hmumi pa hi 2016 in Obama president a si lo tikah zeitindah a paw aa cawm lai, timi an hei ruah cio. Amah cu an hal i;
- "He-he he, 2016 ah keimah hi president cuh ding i kai zuam la lo ti chim khawh a si lo, i keimah hmang in Obama nih president term thum a ttuan kho zong a si ko. Mah cu a fiang lo tukmi a si, nain a si kholo ti awk a ttha lo," tiah i capo khin a chim.
"Bronx Obama" timi film cu atu i Bergen, Norway ah an tuah cuahmahmi International Film-festival ah voi li an piah cang.
- Keimah cu mi sasawh ka si ko. Ka pa hi kan chungte pawkhim le nunnak caan rian hnih kemh in a rak ttuan i a lawi tlai tawn, tiah mi har an sinak kong a chim. Ruahlo piin Obama a rak chuah cu vantthat tuk rumro khi a si, i caan tawite chung president si hi ka lawm tuk. Sihmanhsehlaw keimah Bronx i Liuis Ortiz timi pa ka si ko, i mah tihin si peng ding kai tim ko.
Youtube ah Louis Ortiz tiin nan ttial ah cun nan hmuh len lai.
Happy Weekend.
Comments
Post a Comment