Germany vs Brazil
Germany le Brazil cu WC tuanbia ah min ngei le a tthawng tuk veve an si nain WC ah voi khat lawng an rak i tong bal i nihin hi avoi hnihnak a si lai. An ram hnih WC chuihmi puai fonh ah 206 a si, tu kum an chuih cangmi he fonh ah. A chuih tambik an si. Final hei siseh law aa dawh tuk hnga.
Tu kum telh lo in Brazil nih WC puai 97 a chuih i Brazil lawng hi 1930, WC an rak thawk kum in kum tin aa telmi ram a si. Germany hi 1930 lio ah a rak i tel lo, nain ai tel hnu kum 1950 thawk in ai tel peng ve tthan i puai 99 a chuih caah Brazil nak tamdeuh WC puai a chuihmi a si.
Mah hna ram hnih hi WC ah goal a sut tambik zong an si, i Brazil nih goal 220 a ngeih i Germany nih 216 a ngeih. Brazil Ronaldo nih WC a chuih chung ah goal 15 a sut i a tambik a si. Germany in Klose nih 15 a sut ve cang.
Brazil le Germnay nih WC ah a lianbik ram an si hnga maw, tiah cun an si theng lo. Italy nih WC a teimi hi Germany nakin a tamdeuh, nain Germany cu 1950 hnu in ai tel peng ve. Italy cu final voi sarih a kai bal i WC voi li a tei, a hnubik kha Germany 2006 ah a si. Brazil le Germany zong final voi sarih veve an kai i Brazil nih voi 5 a tei.
Quarter Final a chuih tambik cu Germany a si i 16 an chuih, i a peh in tu kum tiang voi li tiang quarter a chuih kho. Brazil cu quater-final 15 a chuih i a pathumnak ram cu Argentina le Italy an si i quarter-final 9 veve an chuih.
Mah tluk a thiammi ram hnih hi voi khat lawng an rak i tong, i cu an rak i ton lio zong cu 2002 final kha a si. Brazil nih 2-0 in a rak tei i a voi nganak WC an rak tei a si. Cu goal 2 suttu cu Ronaldo a rak si, i cu lio ah atu Germany ah a chuih rihmi Klose a rak chuih ve.
2002 chan i minung ah Klose a taang rih i cu lio Brazil hruaitu Scolari cu tutan ah Brazil hruaitu a si tthan. Tu zan ah Klose a chuih kho men, mi hlun an itong lai. Klose nih 2002 final teirul cham in Ronaldo zong a lonh khawh men.
A hnubik i hi hna ram hnih an chuih cu 2011 ah a si i traning-match/private-match a si i Germany nih 3-2 in a rak tei. Schweinsteiger, Gotez le Schurrle nih an rak goal i Neymar le Robinho nih Brazil caah an rak goal ve.
Tu zan hi Brazil an zum theng hna lo, a ruang cu:
1.) Brazil hi hlan bantuk in bawlungchuih thiam an chuak ti lo. Tutan ah Neymar lawng rinh in an chuih tikah an bawlung chuih zoh a dawh ti lo. Culio i Neymar a keng a kiah tikah cun an ramningpi in an tha a chia, i an lung a der. An captain Silva cu a cawlchia i yellow 2 a hmuh caah Semi- a chuih kho lai lo. Silva cu an ruangruhpi a si tikah Neymar a kengruh kiah le an team ruangruh pelh he cun an lung hrim a der cang lai i zeitindah a tthawng tukmi Germany hi an celhpi khawh hna hnga?
2.) Brazil an coach hi Luiz Felipe Scolari a si ko ti a theimi nih cun Germany he iton ding an zenh piak lo awk a ttha lo. Brazil nih a hnubik WC an rak tei hi 2002 ah a rak si i avoi nganak an tei a si. Cu lio ah an coach/manager cu Scolari hi a rak si. Cu tlawmpal ah Portugal ram caah an rak lak i EM 2008 ah Germany nih quarter in an rak thlak. WC 2006 ah Germany he pathumnak an i cuh i a rak sung. Germany hi a tei tthan kho ti men lai lo, tiah ruah a si.
Ref: Wikipedia
Comments
Post a Comment