June thla thawk ah Israel nih Gaza-strip cu rocket in ceilak a rak phomh, i nihin ah Hamas nih rocket cu ruah bang Israel cungah an surter. Israel nih lehrulh lo a duh ve lo, atu hi ca ka ttial lio ah Israel nih rocket le vanlawng in a lehrulh cuahmah. Israel mino an thahmi hna kong he pehtlai in ka rak ttial cang.
Israel nih ral-arlam thang tak in a tuk thawng cu NRK radio in theih khawh a si. Chirchanh pahnih zoh tikah NRK nih cun Israel ralkap sinin theihning ah rocket 40 leng cu Israel ram chungah a puak, a ti i Reuters nih cun suimilam 24 chungah rocket 80 hrawng nih Israel a phomh ee, tiah a ttial. Zeizahset ti kha a biapi tuk lo, Hamas nih Israel a lehrulh timi kha le cu rocket kahmi cu Israel nih a lehrulh tthan i zeicandah an i kah lai, timi thin an i dom cio ko lai.
Israel cu an lau ngai nain Hamas nih hin Israel khualipi Tel Aviv le chaklei khuapawl a phan khomi rocket an ngeih lem lo caah a ttih cu a nung tuk lo, tiah Israel palek nih an chim. A tang hi an i kah a fahnak hmun an si.
Hamas pawl nih 2012 hnu in tutan lawnglawng hi Israel kan kah, tiah pheh lo tein an chim hi a si tiah Reuters nih a chim. Asinain Israel ralkap nih an chimning ah tu kum thawk in Hamas nih rocket 450 hrawng cu Israel ah a kah, ti a si. Nihin 7. june i an kahmi rocket 35 cu minute tlawmte chung ah Gazastrip in Israel ah a lutmi a si, tiah Haaretz, anmah Israel thawngca nih a ttial.
Israel nih mino pathum nan thah hna tiin an kah hna tikah Hamas chungtel le palestinian tam ngai an thi. Mino tete zong an thi ve, cun Israel mino pawl nih Palestine mino te an thah ti a si i, kan thah ko tiah an i phuang ve tak fawn. Mah tikah Hamas nih cun Israel nih a kan kah ahcun kan lehrulh lai, a ti peng ve bantuk in caan rem ah a hman.
- Israel nih Gaza cu tianzan ah a kah i chungtel pakua an thi. Nihin cu kan hei leh ve hna. Ral thawh hi kan duh taktakmi cu a si lo, nain Israel tuahsernak chia hi kan i in-sawh lai lo, tiah Hamas aiawh biachimtu Sami Abu Zuhri nih telephone in Gaza in a von chimmi cu Radio ah an chuah.
Israel thlanglei khua pawl nih an tuar ngai pinah an miphun cheu thum cheu khat caah cun a him lomi a si caah Israel nih atu bantuk thil cu a cohlang kho lo i a lehrulh ve hrimnak a si kong zong an ralkap nih an chim. An hriamnam le tanks pawl pinah ralkap 1500 a chap.
Hamas cu Israel he epchun tikah zeipi an si lo. Chawva, milu le hriamnam ah an der tuk i atu hi international/UN nih tlangtlak ding in an au ve tthan. Sihmanhselaw kan ciam dih lo a si ahcun kan ngeihmi zeizong tein Israel ral i kham le lehrulh ding ah kan i tim peng ko, tiah an hruaitu nih a chim.
Israel nih ral a thawhpi tiah Hamas nih an puh, Israel nih nan thawkmi a si, a ti ve. Ral cu an duh veve lo nain rocket tu in bia an i ruah.
Comments
Post a Comment