Group in hel hnihnak an chuih ah Spain cu Chilli nih 0-2 in a tei. Mah hi group ahhin Spain le Netherlands kha zumhbikmi an rak si. Sihmanhsehlaw bawlung cu a pum an ti tawn bang Chilli le Netherland tu an kai lai.
Euro Cup 2008, WC 2010 le Euro Cup 2012 ah Spain nih goal lawng an rak luhter, nain 2014 WC ah puai hnih an chuih i goal 7 an luhter. Point ngei lo in WC ah a sung hmasabik zong an si. Mah bantuk hi 98-WC ah pakhatnak a latu France cu 2002 ah group in an rak tla, i 2006-WC teitu Italy cu 2010 ah khan an tla ve, cucah Spain zong ngaihchiat tuk awk cu a si hnga lo.
Zeiruangahdah mah ti an tlak? Zeidah an i palh? Costa an hman ruang ah maw, asiloah Casillas ruangah dah a si? Manager nih ai palhnak bik hi zeidah a si hnga?
Pakhatnak ah Costa kha an zumh tuk nain Spain ah aa tlum lo, Brazil ah khan rak chuih ziar seh law a tthadeuh ving hnga amah ca zong ah. Atu cu Brazil pawl an awi tuk lai. Amah tu cu aa chir tuk lai lo, aruang cu Brazil a si nain kum 19 a si in Spain ah a um cangmi a si. Brazil a um lio ah an sifak tuk i club hmanh ah a rak chuih kho lo, lamlai ah a chuih i mah ti cun minung si hngading cu Spain club ah an rak lak caah Spain ram aiawh in a chuih duhnak hi a si.
Pahnihnak cu Spain manager nih formation a thlen kho lo, an chuih tawnning in an chuih peng caah pumpak in an thiam tuk hna nain ramkip nih an chuih ning kha an rak cawn, an rak ngiat khawh cang. Hmaikal a lakmi hna hi contring football caah a tthami an si, Torres le Costa. Asinain Xavi le Iniesta nih Barcelona chuih in an chuihpi hna. Costa cu Spain caah a chuih tlawm caah Villa le Torres an ke ai thei tukmi a chuihter rih ko hna hnga lo?
Pathumnak cu Casillas hi R. Madrid nih an hman a tlawm, champions league lawng a chuihmi a si. Cu pinah fak ngaiin aa khawn hnu in a ralchia ngai cang. Cu hlan ah a biapi tukmi rak si hmanhsehlaw, manager pakhat nih cun mithmai zoh lo in team caah a tthabik lawng a ruah awk a si i Casillas kha a chuihter ti awk a si hnga lo. Casillas nih a rammi sinah puai a dih khan ngaihthiam a hal hna.
Palinak ah Chilli he an chuih ah khan hmaikal a thlen hna, nain hmaikal cu pakhat lawng a chiah peng. Goal sut an duh a si ahcun hmaikal chap awk a si tiah ka ruah, tei ding in aa celh lomi an lo.
Panganak ah cun bawlungchuih i palh awk a simi vialte an palh dih. Mi hlun tamtuk a hman hnami zong hi palh ngai ah ka ruah i ram dang pawl khi mi thar le mi hlun an cawh hna.
2016 Euro Cup le 2018 World Cup tu ah mino le mi thar tete he Spain cu a nung tthan te lai tiah ruahchannak a um.
Comments
Post a Comment