”Hei, Abawi ka si. Kan kal tawnnak rilikam ah khan hung ra. Na thei ko lo maw?”
”Abawi,… thil poi pang um maw?”…
”………”
Abawi nih phone cu a chiah manh. Zeidah cang hnga? Ka thinphang. Inntang ah ka ttum zok i tlaitawnbik ummi ka angkileng ka lak i ka til. Rilikam, cuka a thli in kan i ton tawnnak tiang din lo in kan tli.
Ka hung phan i kan hmuh. A thinphangmi cu na rak lo lem lo. Na kiu nai doh i these cung ah cun na rak zau. Na zau zawn i nika nih an cerh pah ah khan, nai dawh tuk. Tikam thli nih na sam nem tete an hon dai pah hna. Ka mirh. Zeihmanh tuah khawhmi ka rak ngei lo. Ka rak in duh tuk.
”Hei” kan ti i na pawngte ah ka rak tthu. ”Hei Alen,” na a ka ti i mirh nawn in colgate caw-ngia ding bang na van ka zoh. Coffi rong na mit dum tete nih tleu dildel in an ka zoh. Zeikong dah ruah na ka duh ti cu na ka chim a rak hau lo. Na mit kan zoh in ka rak theih khawh ko. Na mit nih an ka chimh cang.
Na holh pah in a mirhmi ka mithmai a tlau thluahmah khi ka theih. A dih cang, na rak ti. Nungak dang duhmi ka ngei, na rak ti. Kan klass pin i a tthumi Karan nu. Ka duhnak a sau tuk cang, na rak ka ti. Na chimmi bia zei a si zong ka rak in ngaih piak kho lo. Na hmur an cawl len ka rak hmuh, nain ka theihmi dihlak cu ka lu chung i ai nolh lengmangmi, ”A dih cang” ti a rak si ko.
Na hmur an rak dai. Zeihmanh na rak chim chap ti lo. Na tthutnak bon ah na tthu i na ka zoh. Ai dawhtuk mi na mit ttialpumhna he na ka zoh. ”Are you awkhe?” tiah na rak ka hal. ”Yea.. i am fine..” ka ti i ka lu fawite in ka rak suk. ”So, are we awkhei? No hard feelings?” a ti pah in a liang in a von ka hnur pah. ”Nope” ka ti i mirh nawn in ka hei zoh ve. Zeitluk in ka tuar ti hmuhter ka rak duh lo. Zeitluk indah ka rak duh i ka caah zeitluk man ngeidah a rak si. A voi khatnak ka rak hmuh in ka rak duhmi, ka thinlung a rak alt. A rak tling tuk, ka caah.
”Si cun, ka kal rih lai,” tiah a ka zoh pah in a ti. ”Na ra ve lai maw?”
”Eih, kahin ka tthu rih lai i a liam ding nitlang hi ka rak thlah rih ko lai” tiah rili a donghnak, ninu a liamnak horizon lei zoh pah in ka rak leh. ”Si, awkhe. Kan i tong tthan te lai” tiah a dirpah cun a ti, a ke in these cu a von thai pah i kal hram ai thok.
Ka hnulei kai her. Huamsamte in ka mit tang ah a liam tiang ka rak zoh. Ka nunnak, ka thinlung in a liam cang. A chuak cang. Hnulei i mer in hun ka zoh ti hlah, tiah ka lungthli in ka ti. Nai mer ahcun, zeitluk fakin na rak ka tuar ter kha na hmuh sual lai,… Mitthli hna, mitmu cung ah an i dil. Cun, ka biang cung ah luannak lam an hmuh sinah an liam. Dor khat hnu dor khat an i nam hna.
Zeitikhmanh ah na hnulei i mer ti hlah, ka caah man na ngeih tukmi hi na theih le na zumh ding ka duh lo…
----------
Note: "december ka phan tthan cang" timi lenhloi khomhsuat cauk chung in pakhat a si.
Atlawm tuk,ka rel cim lo aa!!Laklawh in na kan chiah ko,hehe
ReplyDelete