Italy Nih England A Bawmh Khawh

Si, na relmi a hman ko. Asinain England cungah aa hngat ve tthiam rih. Cu kong zeitin a si ti kan zoh pah in zeiruangahdah England hi puaihnih ning in group ah an sungh timi kan zoh chih tuah lai.

Group D: ah Italy, England, Uruguay le Costa Rica an si i group an tthenmi ai fian ni in mahhi ram pawl caah cun final kai tluk a si, an rak ti hna. Costa Rica cu group in a tla cia ah an rak chiah hna i Italy, England le Uruguay ahhin hodah a tla ve hnga, tiah an rak tuak. Asinain ruah lopi ah Uruguay cu Costa Rica nih 1-2 in a voikhatnak ah a tei tikah phundang piin thil a hon i mer. 

England cu Italy nih 2-1 in a tei, cun Uruguay nih 2-1 in a tei tthan i point ngei lo in an um. Tu hnu puai khat lawng a chuih ding an si cang i mah hi group in an tlak ding cu 90% cu a fiang cang. Cucu ruahchannak ti ko usih, Italy le Costa Rica hi puai khat veve lawng an chuih rih caah thil cu ai tungmer kho a si rih. Zeitindah a si lai ti ahcun; 

Italy le Costa Rica an chuih tikah Italy nih a tei a si ahcun England caah ruahchannak a nung lai i group ah teinak an hmu khawhnak a lam a um lai. Sihmanhsehlaw Italy a sungh lo hmanhah an i tluk a si ahcun England nih Costa Rica a tei zong ah World Cup in an chuak lai. 

Italy nih Costa Rica a tei ahcun an ruahchannak a nung lai i thil phunhnih an i tinhning in a can hau lai. Cucu: 

- England nih Costa Rica a tei hrimhrim a hau. Goal tam an sut khawh ah a ttha chinchin.

- Italy nih Uruguay hi a tei ve hrimhrim a hau. 

A cung i bantuk in a si ahcun Italy nih group D cu 9point in a tei lai i a dang pathum cu 3point cio an si lai. 

FIFA phung ning in point ai tlukmi paoh cu goal in zohpiak an si lai. Goal tambik a ngeimi kha teitu an si lai. Point i tluk pinah goal ngeih zat i khah a si rih ahcun goal a thlah tamdeuhmi kha an sung lai. 

Cu a si caah Italy nih Uruguay le Costa Rica a tei hna zong ah England nih hin Costa Rica hi goal tam khawh chung tam in a gut a herh ve hrimhrim. 

England an tlaknak hi zeisatdah a si? 

England cu "bawlung tikulh" tiah an kawhmi hna, leicung ah bawlungchuih ah min an ngeibik le uarbikmi league (premier league) a ngeitu ram an si. Atu an prime minister David Cameron hoi hna nih cun voi tampi a chim, Football nation kan si, a thawktu kan si tiah. Cu ve bantuk in England cu World Cup asiloah Europe Cup an chuih tinte ttanhtu a ngeibik le zumhbikmi ah ai telmi a si. 

World Cup voikhat te an la bal ve, cucu an ram i an rak tuah lio ah a si. Biatak tein TV kan zoh khawh hna hnu 2002 in nihin tiang World Cup ah England cu laimi nih kan ttanhbik hna. 2006 le 2010 kha leicung ah a thiam timi bawlungchuih thiam hna na rak itel lio a si nain zeipi an rak chuah lo. Cu bantuk in tu kum zong an zumh ngai tthan hna nain group in tlak dawh an si. 

Aruang cu puai hnih an chuih chung ah an derbiknak hi hnukham (defender) bak an si. Ziah an der lai, Cahill, Baines le Johnson te hna cu leicung hnukham thiam ah an i tel si, ti khawh an si ko. Roy nih World Cup le Euro Cup a chuih balmi hnukham Terry le A. Cole a lak hna lo tikah World Cup a chuih ballo mi Cahill, Phil le Baines cu leicung i humham a ngeibik World Cup ah a cawl an cawl kho ti lo. 

Terry le A. Cole ngaih an um hringhran. Terry cu thih a rak ngamh. Uruguay he an chuih lio i a voikhatnak Suarez goalmi kha cu Cahill santlaih lo a si i amah zawn ah Terry rak um seh law, a zuan hnawh lo hmanh ah diving a thut diam hnga, thi le thi in. 

Pahnihnak cu Frank Lampard hmang lo in Henderson an hman peng caah le Jack Wilshere hi Rooney he an i tlak tuk tawnmi a hman bak lo caah a si fawn tiah ka ruah. Sterling cu a rang tuk ve nain a thawktu 11 lakah tel ding ah a no rih i premier league teitu ah ai telmi Milner hna a chuihter deuh awk a si. 

Pathumnak ah hmaikal kong a si i Rooney le Sturrige an chuih ko ahcun Welbeck chuihter lo in alaikal (midfielder) tu tthadeuh in a chuihter hna awk bak ah ka ruah. Gerrad, Lampard le Wilshere hi cu an chuih awk hrim a si. 

Bawlung ahhin alaikal hi a rak biapibik hrimhrim ko. Midfielder ttha na ngaih lo le na hman thiam hna lo a si ahcun hnu le hmai an cat peng lai i a thi peng lai, tiah minthang manager nih an rak chimmi hi a si hrimhrim. 

Costa Rica he an chuih tik cu tihin chuih hna seh law ti ka duh ngai. Formation ah: 4-3-3 asilole 4-3-2-1. 

A thawktu 11: Hart, Johnson, Cahill, Smalling, Luke Shaw - Gerrard, Wilshere, Lampard - Rooney, Milner, Sturrige 

Khah mah ti si cun, a si khawh chung in Italy nih bawmh an i zuam lai, Italy nih puai zapi in tei an i zuam hrimrhiam ve lai i Costa Rica tal cu tei i zuam ve ko uh, ZERO he tlun cu zoh a chia lai.