West Point Ah Obama Nih A Chimmi: Terror Hi Ral Lianbik

(Chapmi/updated): President Obama cu Afghanistan ah thawngthanh ta lo in a va tlawng i zahan ah khan USA ralkap vialte 2016 chung, 2017 hlan ah American ah an kir dih lai, tiah a chim. Cu a chim thaizing, nihin ah US i ralkap sianginn, West Point, New York ah aa limmi hna lawmhpinak ah bia a chim tthan. Live in zoh lomi nih von zoh khawh tthan si.

Hi a biachimnak ahhin ramdang pehtlaihnak kong i sawiselnak a tonmi kong ah a leh hna lai, tiah an ruah. Cun ramdang pehtlaihnak, ralkap kong le terrorism kong a chim lai, tiah an zumh. An zumh bantuk in a chim tak ve.

Bia a chim hlan i ka rak tarmi a thar in bia a chim dih hnu ah ka von chapmi a si. 

Nihin i West Point ah bia a chim hlan te ah Syria i Assad cozah a dotu hna hi tamdeuh le tthawngdeuh in bawmh a timh hna kong zong, zahan ah khan amah aiawh biachim kho Jay Carney nih a chim.

Cawnni thumni tthiamtthiam ah ramdang vuanci John Kerry nih a chimmi cu USA nih "terrorism-partnership fund" a dirh i USD 5 billion in ramdang pawl, a hlei in atu islam-extremist pawl bantuk a simi terrorist dohnak caah a bawmh lai, tiah a chim.


Vawleipi hruaitu USA
President B. Obama nih USA cu leicung ah a tthawngbik a si tiah fek tein a chim. "USA nih vawleipi hi bluaktak in a hruai peng awk a si. Cuti a si lo ahcun mizeihmanh nih a chak an tlai lai lo," tiah fiang tuk in Obama nih a biachimnak cu a thawk. Asinain United Kingdom/Britannia he fekte in dirtti ding zong a chim chih.

Cuti a chim bu cun Obama nih USA hi direct in harnak a pe le pek a timmi buainak a si lomi paoh cu ralkap thazaang hmang in kan i thlaak lai lo, tiah fakpi in a chim chih ve.

Nihin i vawleicung USA nih a hrial khawh lo ding buainak (conflicts) pawl pakhat hnu pakhat in a chim i nichuah-thlanglei Tuluk (south-china) kong hi a chimmi ah ai tel. Cutin a chim ko nain USA cu zohchuntlak a si zungzal awk a si, tiah a chim chih.

Tuluk thlanglei-rili kong buainak ah USA tlawmpal ai thlak tikah fakpi in sawisel a tong. Aruang cu hi rili kong ahhin Unites Nations Convention on the Law of the Sea (UNCLOS) timi USA nih an fehter lo caah a si, tiah Obama nih a chim.

- South-China ahhin daihnak um seh tiah USA nih UNCLOS a fehter lo caah kan tlangtla kho hna lo. Kan ralkap hruaitu hna nih kan ram himnak caah a bawmh lai tiah an zumh ko nain nawlngeihnak kan ngei lo, a ti.

Mah cu convention (UNCLOS) cu republican senators nih fehter an rak duh lo. USA hi amah tein aa ukmi sinak (sovereign) he aa kalh an ti caah republican nih an rak fehter duh lomi cu a si.

Terrorist hi ral lianbik a si rih ko
Ralkap sianginn a dihmi hna sinah biachimnak a si bantuk in ralkap kong cu a chim tam ngai ve.
- USA nih ralkap thazang cu kanmah le kan hawi a simi ram pawl kha direct in harnak/fahnak le tlirhkhonhnak a um tik lawng ah kan hman lai. Zeitik hmanhah kanmah le kanmah kan i runvennak ding ah mizeihmanh nawl kan hal hna lai lo. Kanmah cung ah direct in cu bantuk harnak a kan pe lomi paoh cu ralkap thazang hman lo hrim kan i zuam lai. A si hawh chung in bia, hmaiton biaruahnak (aherh cun sanction) in kan itel lai, tiah Obama nih cun a chim.

Vawleicung ram hruaitu hna nih hin ram khat le ram khat i ral le i do hi an duh hrim ti lo. Russia hmanh nih a si khawh chung in daihnak um khawh ding in ral cu a hrial. Asinain vawleicung ah kan ral lianbik cu terrorist hi an si. An karh chin lengmang, i atu hoi hna cu Tuluk ram zong ah terrorist an karh caah Tuluk nih biatak tein terrorist donak ah phaisa le minung hmang in aa zuam cuahmah. Cucu naite i South-east Asian security kong meeting ah a chim i atu zong training an tuah cuahmah ko.

-Atu i USA le ramdang caah ral lianbik cu terror hi a si ko. Al Qaida lawng an si ti lo, hmun kip ah Al Qaida he pehtlaihnak a ngeimi terror-phu an karh chin thluahmah. Mah cu ral donak caah khuakhan thiam kan herh, tiah a chim.

Ralkap rianttuannak langhter deuh ding
- Terror kan do ning cang hi zaran nih theih khawh dingin kan ondeuh a herh. Cuti a si lo ahcun mi lung kan hring lai, tiah Obama nih a chim.

A duhning ah cun ralkap nih terror kong i an rianttuannak kong (info) hi vawleipi theihter lengmang le zeitindah rian an ttuan timi kha mipi theihter lai. Mah ti cun an tuahmi hi fiangtein an theih lai i an dirkamh hna lai. Cun langhngan domi a si tikah terror zong an zor chin lo hmanh ah fawideuh in tei khawh an si hnga.

Mangttha/zingttha hna u.