Prince Charles cu leicung i siangpahrang fa cio ah a kum upabik a si, kum 65 a si cang. Naite Canada a tlawn lio i hawikom he bia an iruahnak ah Hitler le Putin (Russia president) a tahchunh hna caah UK cu ibuaipi awk an hon ngei. Putin hi Hitler bantuk in a um, a cawlcang tiah a chimmi kong cu DailyMail nih a ttial hmasa bik i a thaizing ah UK i politician pawl zong nih an hmuhning an chim cio.
Siangpahrang uknak in uk chan a si ti lo nain siangpahrang a ngei rihmi ram an um rih hna. Saudi Arabia lei an siangpahrang tu khi cu hlan chan siangpahrang uknak bantuk a si nain Europe hi cu ram lu, ram a dawhtertu le hmelchunhnak caah siangpahrang hi an ngeih cang. Siangpahrang te chung nih ram kong, leicung politikk kong i thlak phung a si lo. Politikk ah i thlak an duh a si ahcun siangpahrang siloah siangpahrang chungkhar sinak in idinh awk khi a si, ti a si. Uknak kong ah nawl an ngei lo, aruang cu democracy a umnak ah cun hruaitu hi thim phung a si.
Democracy a si ko nain UK zong ahhin siangpahrang nih politikk kong ah i thlak hi cu a chia ah a ruatmi an tampi rih. Nawl ngeihnak an pek hna lo pinah rammi an aiawh lo. Cucaah tutan i prince Charles nih Putin le Hitler a tahchunmi kong cu an i buaipi ngainak cu a si.
Media ah an chimmi cheukhat:
Putin kong a chim ruangah Mike Gapes, britist parliament member a simi nih Charles nih hi bantuk ram kong le vawleicung kong ah i thlak a duh a si ahcun siangpahrang chung sinak chia seh law politikk ah i cuh ve ko ngat seh, tiah Twitter ah a ttial. Cu bantuk in Russia ah ambassador in a rak ummi Tony Brenton zong nih Charles nih Russia i Ukraine a buaimi kong i Putin le Hitler tahchun cu ttih a nung ngai, tiah a chim ve.
Brenton tu nih cun, atu bantuk in Charles nih a chim ruangah hin Russia nih an ruahnak zong an thlen khawh ngaimi cu a si ve. Atu zong Russia nih zeitindah Crimea kong fakdeuh in iceihnak an ngeih lio a si caah ruahnak cheuhnak zong a si kho ko, nain Hitler he tahchun cu a ti tuk deuh vak, tiah BBC ah a chim.
Atu lio UK i vice-prime minister a simi Nick Clegg nih cun Charles hi sawisel awk ah a ruah lonak kong a chim ve. Mi dang cio bantuk in prince Charles zong nih amah pumpak ruahnak chimrel khawh awk a si kong le pumpak hawikom he zalong tein biaruahnak nawl a ngeih kong a dirhmun a chim. "Siangpahrang chungkhar nih an zumhning le hmuhning chimnak nawl ngeih lo ding hi ka pommi a si bal lo. Ka ruahmi cu amah zong nih a hmuhning chimnak nawl a ngei ve," tiah BBC ah cun zahan ah khan a chim ve. "Pumpak biaruahnak a si caah zeisetdah a chim timi ka hngal lo," tiah a chim chih.
Russia nih fiang deuh in theih an duh:
- Kan ram mipi a tamdeuh nih prince Charles i president Putin nih Ukraine ah a thil tuahmi kong ah a lungre theih le thinphanmi hi nan i hrawm cio lai tiah ka ruah, tiin Sky News ah cun a chim. Cun "Putin thil tuahsernak kong ah hin Charles hi a dik tiah ka ruah i a thinphannak kong chimnak nawl cu a ngei hrimhrim," tiah Israel in England ah pupa chan in a rak peemmi Labours-party hruaitu Ed nih a chim chih.
Mah cucu Moscow-Kremlin nih ningzah thleih le zeirel lo ah an i ruah. Asinain fimkhur ngai in prime minister David Cameron nih cun aa thlak duh lo. Zeihmanh a chim rih lo.
Hmaithla 6. june ah an tuah dingmi D-Day philh lonak ah Prince Charles le Putin cu an itong te lai, an dam ahcun. Cu hlan zong ah Putin he hin an i tong bal i mawttaw pakhat chung zong ah an to tti bal. Zeitindek an i zoh te lai.
Daily Mail i a hnubik a thanh ning ah Russia cozah lei in Prince Charles chimmi bia hi UK cozah nih tthadeuh in fianh ding le a duhnak fiang deuh in theih an duh kong an hal hna.
Ref: Daily Mail, Sky News, AP, NRK (foto: AP/Scanpic)
Comments
Post a Comment