2014 Champions League final ah Spain ram khualipi Madrid i club pahnih, Real Madrid le Atletico Madrid cu Lisboa (Portugal) ah an i cil. Minute 120 an chuih hnu ah honihdah goal a sut ti kha a biapi ti lo. Atletico Madrid cu 1-4 in a sung i Real Madrid nih avoi hranak Champions League hrai cu an i tlunpi khawh.
Atletico Madrid
Tu zan final ah Atletico Madrid cu zeihmanh sungh ding a ngei lomi bantuk in Lisboa certual ah an lut. Sungh ding an ngei lo, Real Madrid he cuai thlai ahcun. Champions League an tei a si ahcun tuanbia thar an ttial lawng a si ko lai. A ruang?
Madrid khuapi ah Real khawh in amah hi a lianbik a si. Real hnupi ah sermi a si bantuk in a club zong a fa i Real nih hngakchia tei cangmi bantuk in a zoh pengmi a si. A hnubik anmah Spain La Liga an tei hi a luancia kum 18 lio ah a rak si. Barcelona le Real cu leicung ah club lian an si caah an i chawng pah peng tikah an club fadeuh cu an rak cawl kho lem lo.
Real Madrid ttanhtu zatceo nakin Atletico ttanhtu hi an tlawmdeuh ti a si. Cu pinah Real i a chuihtu vialte an thlahlawh khi Atletico chuihtu vialte thlahlawh i a let 6 hrawng in a tam ti a si. Mah tluk aa dangmi cu Champions League final ah an i tong, i tuanbia ah avoi khatnak bik khua pakhat in club pahnih an iton a si.
Atletico nih hin leicung minthang bawlungchuihtu a ser hna, i kan theihmi lakah Torres, Aguero, Forlan le Costa pinah Falcao zong kum 2 a rak chuih. A luancia kum 10 chung ah an rak tla ngaingai, nain atu an manager nih a thawhpi tthan hna tikah kum 18 hnu ah La Liga cu anmah nakin a let 10 deng in a hram aa sihmi Barcelona le Real Madrid hmai ah a rak lakpi hna. 2014 La Liga champion in tuanbia thar an ttial.
Chiatserhmi namber 10
Real Madrid cu leicung club ah min ngeibik a si. A hleiin Ronaldo le Bale te hna an chuih tikah zumh ngaingaimi an si caah tu zanlei final zong ah anmah hi zumh an si bantuk in teinak an hmuh. Mah hi Real Madrid caah a sunglawimi le a biapimi teinak a si.
A hnubik Champions League an rak tei hi 2002 ah a rak si. Avoi 9nak an tei zong a si, i cu thawk cun kum 12 chung Champions League final ah Real an chuih kho lo. Semi siloah quarter-final tiang lawng an phan. Leicung minthang le a thiammi an cawk lengluang hna nain an rak ti kho lo.
Real ttanhtu hna nih avoi 10nk teinak hmuh ding hi an hngahhlang tukmi a si, an i ngaih tukmi le an duh tuki a si. Cucaah tu zan i an teimi cu an club caah 2002 hnu i an ttialmi tuanbia lakah a biapibik a si ko.
Real Madrid chuihtu ka ngiat hna tikah namber 10 aa hrukmi an um lo. Atletico nih 1-0 in an hruai hna lio ah ka ruahmi cu 10 hi an angki ah an i lak duh lomi hi ziah a si hnga? An i hruk duh lo caah avoi 10nk an tei khawh lo hi a si hnga maw, ti hna a ka ruahter.
Bia donghnak
Atletico, nan thiam tuk. Nan za tuk. Nan manager uar a um. "Ka caah pathian a si ko," nan timi balte a luandeuh rua, khuazing nih a duh rua lo. Asinain La Liga nan lak pinah Champions League zong pahnihnak nan lak caah nan kum a vui tuk ko, hmai a ralaimi caan tu ah tthawng chinchin in nan dir lai tiah ka ruah chan :)
Champions League an rak thawk kum ah pakhatnak a simi cu Real Madrid hi a si. Teinak voi 10 a hmutu zong anmah an si, i a hun changtu ah AC Milan an si. AC Milan cu atu Real manager Ancelotti chan ah 2003 le 2007 ah pakhatnak an rak lak i a zate ah 7 an tei. AC Milan a hruai lio ah Ancelotti hi final voithum a chuih. Atu Real Madrid he Champions League a tei tthan.
Tu zan i kan hmuhmi hna le kan uarmi bawlung chuihtu a tamdeuh cu a ra laimi World Cup ah kan hmuh tthan hna lai. An kan lawmhter lai, kan lung an kan fahter lai, an kan nihter lai, an kan ttahter tthan te ko lai. Facebook chung in kan chuih ve te hna lai.
Real Madrid, 2014 Champions League teitu kong ka blog i cabia 100nk ah kan ttial hna. Congratulations, Bale and Real!!
Foto: VG
Comments
Post a Comment