Na Tuah Khawh Ahcun, Tuah Ko

Jesus nih "Na innpa va daw hna," a timi kong he pehtlai in thawngttha le cawnpiaknak cu kan hmette in kan theih lengmang. Kan theih lengmang rih lai. Cu ve bantuk in khrihfami tampi nih Jesus cawnpiaknak a si tiin kan innpa cu dawt kan i zuam ve taktak ko.

Kachin pawl an har tuk, kan unau zong an si pinah khrihfa zong an si tiah a ruang phunphun tel in "innpa dawt" timi cu kan tuah khawh ko. Mizo ram ah a vaimi tampi innlo duahpiak an si ruangah an har tiin bawmh kan i zuam ko. Kan khua le ram ah kaang-ut le paam a tongmi zong bawmh kan i zuam ko. Thil ttha tuk a si.

Jesus nih a thawh hna i "Nan innpa cu hodah a si?" tiah a halmi hna kha tu zanlei i thawngpang ka relmi a ka ruahter tthan.

Vawleicung ah a harsami, le rawlei awk kong ah nitin a lungre theimi an tam tuk hringhran ko. Cu vialte lakah nihin Syria rammi an dirhmun zoh le theih ahcun lung a ttha lo, a nuam lo. An innlo a rawk dih i ngeihchiah an ngeihmi a tlau in a vaivuan. Rawl a um lo, i ti zong a um lo. Thaizing ah zeidah kan ei lai, ka fa nih zeidah a ei lai i kip ah zeidah kan ei lai tiah ihnak inn le tonak tthutdan zong ngei lo in minung ting-tamtuk an um.

A ram harning le uknak ruang i mi sasawh tarnu, tarpa, ngakchia, lothlo le amah tein pawcawmnak a kawlhawl komi pawl harnak an tong. Chungkhat an i thlau, an i tthen. Kanmah bantuk an si, ralzam in UNHCR ah Laimi kan rak um ciomi nak a let in an har lio a si. UN le Red Cross nih heh law tiah an bawmh hna i mikip sinah an chim. (Hmanthlak khi naite tak i ei awk a ngei ti lomi pawl kong chimlio an thlakmi a si: gyazo.com)

A luanciami zarh khat ah khan Norway ngakchia nu kum 11 nih Syria bawmhnak caah amah lungtho tein kr. 100 cu Red Cross a kuat hna kong NRK nih a ttial. Mah cu thawngpang nih ka lung a ka suk tuk. Kei cu thla hmanh ka campiak bal ttung hna lo, ka ti. Phaisa he cakuat a ttialmi te khi cabawm in a kuat hna;

To Red Cross, 
Syria i ngakchia hna pek ding caah kahin kr. 100 kan pek hna.Cabawm in kan kuat hna nak aruang cu credit-card ka ngeih lo caah a si. Mah phaisa hi a tthahnem lai tiah ka ruahchan. Syria hngakchia nan bawmh hna mi cu nan ttha tuk. [A fawinak in lehmi.]

Careltu hawikom, zumtu le ram kip i Chin khrihfabu hna Jesus nih a kan hal tthan tiah ka ruahmi cu "Nan innpa cu a hodah a si? Syria ram miharsa caah ahodah innpa a si?" timi a si. Mah le mah i bawmh, phun khat le biaknak khat i bawmh hi innpa bawmh kan ti peng rih lai maw? Kanmah le kanmah kar ah Pathian bia in heh tiah mual i phoh le chimrel hin maw kan caan a liam ko lai?

Bible nih a ka cawnpiakmi hi a fiang tuk i hngalh a harmi thil a si lo. Cucu, "Na tuah khawh ahcun, tuah ko," ti hi a si. 

Nangmah kut chungah ṭhatnak tuah khawhnak kha a um tikah, a hmu hnga ding a simi sinin ṭhatnak kha va kham hlah. Nangmah sinah naa chiah ko nain, "Va kal law ra ṭhan te, thaizing ah kan pek lai," tiah na hawi kha ti hna hlah. Phungthlukbia 3:27-28

Syria ah cun khrifa an um ve nain an tam lo, anmah caah thla fakpi in cam zong kan herh i kan ti khawh tawk pumpak in a si lo zongah khrihfabu min in bawmh khawhnak a lam tampi a um ko i kan tuah khawhmi a si ko caah kan tuah ve hrimhrim awk a si hnga lo maw? 

2 KORIN 8:1-15 tiang kan rel a si ahcun Masidonia ram i khrifabu nih cun harnak an ton cuahmah lio zong ah siang ngaiin thawhlawm an thawh i Judea ram i a harmi hna caah khan bawmh awk ah tinvo an hal. [Relchap te.]