A Rumbik Bawlung Chuihtu Cazin Thar

Pa a simi a tamdeuh nih an chunmang bantuk ah an chiahmi cu bawlungchuih thiam le minthang club hna i chuih hi a si. Laimi tampi zong nitlak ram i kan peem hnu in hrinmi fa pale caah bawlung lei hi chunmang an manh piak ngai hna [keimah hawikom hmuhton chung in.]. A si kho lomi a um lo, a tlawmtu an tlawm taktak i a si ko.

Bawlungchuih a thiammi nih an chuih caan khi maw an i nuamdeuh hnga, hlasak thiam nih hla an sak lio khi dah, tiah hal khi a um ttheo. An i nuam veve ko lai, an uar le an duhmi a si caah. Asinain a hnulei i a ummi cu pawcawmnak hi a rak si i bawlungchuih cu pawcawmnak le phaisa tampi hmuh khawhnak ding in ruahmi a si.

Atu ah leicung ah bawlung a chuihmi hi million tampi an um i cu vialte lakah a rumbik 10 le an ngeihmi phaisa a zat kha goal.com nih a tialmi ka von tar chin.

Real Madrid i an i bochanbik mi Cristiano Ronaldo hi bawlungchuih in aa cawmmi hna lakah a rumbik a si, i Lionel Massi (Barcelona FC) le Samuel Eto'o (Chelsea FC) hna nih an von zulh. Ronaldo hi 2013 kum cu a hlawhtlin kum a si, Portugal cu World Cup ah a luhpi hna i sui bawlung a co kum zong a si fawn. Real Madrid nih hlawh an pek a tam tuk pinah Nike, Armani, Castrol Edge, KFC, Banco Espirito Santo, Herbalife le Jacob & C sin in a hmuhmi hi a tam taktak.

Atu a rumbik tiah ka von tarmi hna hi club a ngei i a chuih liomi lawng an si. David Beckham kha bawlungchuih i din cang hlah seh law, amah kha a rumbik a si hnga. Nain aa dinh cang caah Ronaldo hi tulio bawlung chuihmi hna lakah a rumbik a sinak cu a si.

El Confidencial nih a ttialmi an leh chin ning ah Messi cu Man City nih Euro 200million in cawk an timh ti a si. Bale kha Real Madrid nih Euro 90mill in an cawk i a tambik a si. Ronaldo kha 80mill. Cucaah Messi hi Euro 200mill in an cawk ahcun khuaruahhar taktak a si lai, a khuaruah a har lomi cu nan kut thler te uh. PSG nih khin an duh ve, cawk an ngamh ko nain France cu tax an pekmi a sang tuk i minthang pawl hmanh thial an duh cang caah a fawi lai lo. Man City ngei cu Arab mirum an si i PSG a ngeitu zong Arab mirum an si.

2014 World Cup khawh in City ah Messi ai tthial i a hlawh an kamh ning in an pek tak a si ahcun Messi a rumbik a si te khomi a si.

Bawlungchuih in a rumbik 10 hna le an phaisa Euro million:
1) Cristiano Ronaldo, Real Madird: 148,000,000
2) Lionel Messi, Barcelona; 146,000,000
3) Samuel Eto'o, Chelsea; 86,000,000
4) Wayne Ronney, Manchester United; 84,000,000
5) Kaka, AC Milan; 82,000,000
6) Neymar, Barcelona; 80,000,000
7) Ronaldinho, Atletico Mineiro; 78,000,000
8) Zlatan Ibrahimovic, Paris Saint-Germain; 69,000,000
9) Gianluigi Buffen, Juventus; 63,000,000
10) Thierry Henry 57,000,000