Mah hi kahdaihnak cu anmah Syria ram chung i cozah dotu hna le Assad cozah kar lawng ah a si i ram leng in ral a hong tumi muslim pialsual pawl cu an i tel lo. Syria cozah cung ral an thawh hnu in ram kip i muslim tampi cu cozah dotu hna he Assad cozah cu an rak kah ve hna. Phaisa le hriamnam zong in an i bawm.
Relchap: Ca hmaikhat in tu thla thawngpang
Assad cozah nih hin fawite in kahdaihnak a rak hal hna lo. A ka dotu hna hi rawl ei awk an ngei ti lo, minung thazang zong an ngei ti lo i an lungthin a der lio a si lai tiah a ruah caan te ah kahdaihnak hi a rak hal hna.
- Kan tha a ba tuk. A donghnak lei ahcun minung thazang le hriamnam thazang kan ngei ti lo, suimilam 24 chung ral i ven pah in raltuk a si caah kan tlangval pawl nih an chei ti lo, tiah cozah dotu lei i an hotu nih a chim.
Rawl a ttaam le tha a bat hnu ah cun lungthin put zong a tthawng kho ti lo. "Kan buhri. Zumhtlak siding bia kan i kam ko nain a donghnak ah cun kan lungput an kan tei," tiah a chim chih. Mah ti cun Assad mizumh cheukhat hna he an kut an i tlai i an rak itong hna.
Kahdaihnak an tuahmi kaphnih hnatlaknak ning in Assad cozah nih kahdaihnak an tuahnak hmun paoh ah nawl an ngeih (control) lai nain rammi humhimnak cu ttuanvo a lak lai tiah biakamnak a pe kho lo, ti a si. Aruang pakhat a ummi cu Syria rammi lawng si loin Al-Qaida le a dang islam-extremist pawl zong an i tel caah a si.
Syria i Assad cozah duh lonak an rak thawk hi Tunisa le Egypt i ralkap uknak a pur hnu zarh tlawmpal a rauh ah a rak si. Mino tete nih an khuapi i vampang pawl ah "Rammi nih cozah thlen kan duh. Atu cozah hi pur seh ti kan duh." tiah an rak ttial.
15. march 2011 ni ah lam zawh in daihnak he cozah thlennak ding a aumi pawl cu Assad nih nawlngeihnak hmang in a rak kham hna. Cu nih cun cozah dotu hna thin a rak phawh i hriamnam hman an rak i thawk ve. Mah hnu cun Syria rammi lawng an si ti lo muslim tampi nih ram kip in Assad cu an rak phomh ve.
UN siseh innpa ram hna zong nih hi Syria ram chung ral a daihnak ding ah an rak i zuam len, nain an hlawh a tling lo. Russia nih a hawi ttha Assad cu UN ah a dirkamh lengmang i a kong an ceih kho lo. Atu kum linak a luh tiang ahhin 150000 leng nunnak a liam. An ram a chuahtak mi 2.5million an si i 6.5 million cu an ram cia lila ah umnak ngei lo in an vai ko. Ngakchia 2.3million cu sianginn kai lo in kum 3 an um cang hna. Ei awk an ngei lo i khuasik caan ah a lummi i tuah awk zong an ngei hna lo.
Relchap: Na tuah khawh ahcun tuah hrimhrim
Atu ah nitlak lei ram pawl le innpa ram pawl nih Syria refugee i tthen cio ding in khua an khaang i ka theih tawk ah Norway cu 5000 in a lak hrimhrim awk a si, tiah an ti cuahmah. A si khawh chung in tamdeuh lak ding zong in parliament ah kan ceih lai tiah a timi MP an um.
Zei a si hmanhah atu cu kahdaihnak an ser cang. Hmun kip i an cozah dotu hna he zong an tuah rih lai. Kum chung chung an tonmi vialte harnak, rawhnak, thihnak le an thletmi thisen cu tuanbia ah a cang lai. A hram in phur an timhmi cozah cu a fek chinchin i a rauh hlan ah Assad cu thimnak ah zuamcawhtu ngei lo in a dir lai i teinak a hmu tthan lai.
Leicung i bochanmi USA, UK le EU cu Syria kong ah an tuanbia a chia caamcin lai. Kum thum chung ah zei taktak hmanh an tuahmi a um lo i Syria rammi thisen le thlarau nih a dawi peng hna lai. Anmah hlawknak a um lo dingmi ah an i thlak duh taktak lo i an hlawk ding paoh ahcun a buai lomi zong an buaiter hna i an vaa i thlak. An pa nih a nupi le a fale a vuak hna i a zoh sawhmi innpa le khuabawi bantuk an si.
Ref: NRK/ABCnews, Reuters, Redd Barna
Comments
Post a Comment