Avoi 66nak Chin miphun ni zong a hmasabik Chin Miphun Ni an rak tuahnak Mindat khua ah Chinram cozah le CNF ifonh in an tuah tti lai tiah kan hnu zarh chuak The Chinland Post nih a ttial. Mah cu miphun ni tuahnak ding caah minung pakhat nih kyat sing 500? leng a chuah piak hna. Chin ah miphun khat le ram ngeitu kan sinak le lungrual i ttan tti ding a thar in chimrel le kan tuanbia zoh tthannak caah a biapi ngaimi pakhat cu a si lai tiah ka ruah.
Asinain dawtmi careltu, kan miphun ni cu mi pakhat, cozah le party ta a si lo. Thaw a ngei i a hmebik in a thaw cat cuahmahmi tar tiang chinmi a simi vialte i kan ta, kan covo pakhat a si. Cozah kan ngeih a si ahcun kan cozah nih khuakip le peng kip ah hi kan miphun ni hi a tuah awk a si. A bit le kauh kha a biapi lo, chinmi nih kan thimmi hna aiawhtu pawl nih an upat awk a si. Ram leng tu ah cun 20. febuary hmanh ah kan tuah kho lo i philh lonak ah kan tuah khawhmi zong hi a biapi ngaimi a si.
Ram dang ah a ummi chinmi hna nih 15. febuary ah kan miphun ni cu an rak lawmh cang, i 20. febuary hnu zong ah a tuah ding an um ko lai. Holh ai khat dih lomi miphun pakhat sinak ai hrawmmi Lai, Zo, Cho le Asho tibantuk hna hmunkhat te ah a kan funtom khomi ni sunglawi pakhat a si caah khawika kan phaknak paoh ah philh lo in kan tuah awk a si ko.
Kan tuanbia hi a bite, naite chuak kan si nain ca kan rak ngeih lo caah nihin ah kan kawl kho i fiangte in kan chim kho lo. Fing le tlang a rak tam caah i tlawnkai a rak har. Pakhat le pakhat phu i hlam le rak i dawi chan a si tikah kan holh duhsah tein a rak i dang i kan rak i theithiam ti lo timi hi pom awk a ttha ngai. Sihmanhselaw, Kawl pennak le mirang pennak duh lo in hlan pupa hna nih an rak doh hna hnu ah duhsah tein kan i fonh i Chinram an ser, i miphun pakhat ah kan cang. [Cu hlan ah Lairam le Laimi a rak um cang lo maw? tiah Lai aa timi nih a dang vialte kan huap phun khin biahalnak a um men lai, asinain kha lio bawiphun hna nih an ngeihmi khuaram le peng a bimite lawng a rak si i Nation timi pennak pakhat tang ah a rak si lo. Holh ai theimi vialte rak i pehtlaih kha a si ko. Mah lio chan ah kir ai timmi kan um pah i poi ngai.]
Kan holh zong ai khatmi tete a um i kan nunphung le lam zong ai lawhnak a tam tuk hrinhran caah miphun khat in mirang nih a rak kan pom i kawlte zong nih an rak kan pom. Nihin i ramkip le khuakip ah kan i tthek cio tikah kan nunphung le kan sining thisa cu a rak i tthen kho tak tak lo i Chin miphun a si ve timi te nih a kan fonh i a kan dawtter khawh peng. Chin ti tikah hin Lai, Zo le Cho tibantuk hi a cohlang khomi an tampi ve lio ah a cohlan kho lomi zong nih Chin in i cohlan khawhmi hi kan miphun ni thlarau le huham cu a si.
Mirang chan ah kan pipu hna nih an si khawh tawk in an rak i zuam i kan ram an rak ser. An rak humzual i an rak ven. Bawiphun le ram ngeitu sinak an rak hrawh i rammi kut ah an chiah. Rammi thimmi uknak tang ah um ding in thleidannak an rak hlawt i miphun pakhat le ram pakhat an rak sermi ni cu philh in upat lo awk a si lo. Atu chan a fimdeuh mi chan chung tu ah pipu hna nih an rak lim lomi le tuah awk an rak theih lomi rian hi lim le tuah ding kan liang ah khinh a si. Pumpak, peng le khua hlawknak le minthatnak men ah dir ve sual lo ding a biapi ngai.
Fakdeuh in khua kan ruah i kaudeuh le hladeuh pi tiang kan mit kan au a si ahcun Chin Miphun Ni a biapitnak kan hmuh in kan i fiang ko lai. Cu tikah a ni theng tuah le tuah lo ah kan buai lai lo, Lai, Zo le Cho ah kan buai huam lai lo i miphun pakhat kan sinak le ram pakhat ngeitu kan sinak ah kan i lawm kho lai. A kaumi lungput ngeih khawh ding hi ram le miphun a sersiamtu pipu hna nih an kan duh piakmi a rak si hrimhrim lai tiah ka zumh.
Congratulations to the Chin people around the world.
Note: Lai/chin phunpi ni tihi kan hman awk a si lo, "phunpi" ni ka ti ah cun bawiphun le salphun thleidan duhmi ruahnak a si kho i "miphun" tiah a za ko tiah ka ruah. Cu pinah miphunpi ti hi Hitler ruahnak bantuk le Kawl cheukhat ruahnak a si. Lai Miphunpi Ni ti le bang ahcun,... hei tuak ko. Mi national day kong kan chim le ttial tikah "an miphunpi ni" kan ti piak bal hna lo ning tuak in,...
hmanthlak: facebook
Comments
Post a Comment