Zingka Thawh le Coffee

Good Morning, dawtmi careltu hna!!

"Kawi bawi, CNA ralbawi Solomon khi pa fim bak a si ka tinak kan chim lai. Laitlang khuate ah cun an rak tlong leng tuk i kan khua ahhin saupi an um tawn. Zu an khap nain anmah hi an ding, khua nungak pawl lenkai he pehtlai in khuami tlangval he kan rak i rem theng hna lo. Kei zu ka ding tuk ve. Voi khat cu khua tlangval vialte an kan pumh lio ah kei kan Lo ah zu ka ding i ka rak kal kho lo. An hung ka auh i zan ah ka phan, annih an ri ngai hna le a thaizing ah a riahnak ah va kalte ding ka si.

Ralbawi Solomon cu kan ttih tukmi a si. A thawh hlan arkhuang bak in ka va kal hnawh. A riahnak inn ah ka um i a hung tho, "nangmah maw zahan a ra lomi." tiah a ka hal i "aw" tiah ka leh. "Zingka tuante ah na rat caah na van ttha. Zingka i a thinghung khomi cu mihrut mi ttha lo taktak lawng an si." tiah a ka ti i a thinhun a daih caah a rak ka ruahthiam." tiah upa pakhat nih a luancia kum 15 lio hrawng kong a ka chimh.

"Zing khuan in a thinhungmi cu mi ttha lo taktak/mihrut an si." Solomon. 

Zahan ttim hnu ah ka it. Zinglei 5 hlan ah kai tthang i ka tho. Aruang cu "Na ihnak(ihkhun) in na thawh hlan lo cu nai tthang rih lo." timi bia te hi cauk ka rak rel balmi ah a um. I tthangh hnu i thawh lo nih hin nikhat chung na nunnak tampi a thlen khawh. Cucaah zingka thawh timi cu a biapi tuk. 

Zingka thawh a biapi. Na chunni zeibantuk a si lai timi hi tampi zingka na thawhning nih bia a chimchung khawh. Laimi cu mang kan zum tuk i kan mang hna a chiat sual cun kan zingka a nuam ti lo i chun kan i nuam ti lo. Mang tibantuk pawl hi mi si lo ding le mi si lomi nih an i buaipimi an si. Cucaah mang cu mang ah chia ko. Nangmah kut ah Pathian nih na caan a chiah cang. :) 

Tu zing ka thawh cu a nuam khun. Ka hliphlau. Coffee ka tuah i ka din pah lio ah ka dawtmi ka hawile nih an ka text caah ka zingka a nuam khun. Bia kan i ruah hna. "Cikhat tein, ka zingka ka blog ta lai." ka ti hna i ka von ttialmi a si. 

Coffee hi cancer le adang zawtnak tampi a kham khomi a si, nain zingka i coffee din nih tampi a bawm lo tiah tu zarh chung ah khan hlathlaitu nih an ttial. Asinain ka din, a ka thawt tuk. A ka lem cang. I lemter cu a ttha lo nain coffee din cu kum 20 cung cu kan forh hna. 

Tu tlawmpal ah kai kholh lai, i class ka lut lai. Ka thlalangawng zar ka hawh i khua a ceu deng rih lo, nain van a thiang. Kai hnawh tuk, nidang ah ka zingka kong ka ttial tthan te lai, ka umnak khua hmanthlak tampi he :)

Ka ni a nuam lai. Chuntha tuk cio ulaw.