Obama cu US president chan hnihnak ttuan ding in 2012 dih lei ah an rak thim i atu hi kum khat leng a hong si cang. President biakamnak a tuah ni i bia a chimmi ah chun-mang tampi a rak ngei. Asinain 28. january 2014 zanlei ah kum khat chung i president caah a biapibik a simi biachimnak "STATE OF THE UNION" ahhin a hmai hngal kho lai lo. A ninghngal ngam lai lo. Toidor ngai in bia chim a hau lai.
Aruang cu 2013 kum chung hi Obama nih ai ruahning bantuk si lo in fak tuk in ttumhchuknak a tong i a min a langh lo tuk kum a si. American mipi chung in Obama a ti ttha a titu minung 57% chung in 41% ah an ttum ee, tiah CNN nih an website ah a chim. President a ttuan kum nganak hi cu a cawl kho bak lo i healthcare reform a tuahmi a nun lawnglawng ah ai lungsak khawh ding khi a si. Cu zong cu republican nih hrawh an duh.
Tu zan i State of Union biachimnak a ngeih hlan ah 2013 chung i a tlaknak, a min chiatnak tlawmte in ka von ttial lai.
- December 2012 i Newtown khua sianginn i ngakchia tam tuk meithal kah in an rak thih lio ah Obama nih meithal hmanning zoh tthan le phungphai thlen ding in a rak i zuam. Asinain Congress nih an rak cohlang lo i a sung.
- 11. september 2012 ah Benghazi i USA embassy cu terrorist nih an rak phomh hna. USA ambassador a thi i a dang american a thimi zong an um. Mah cu kong ah Obama cozah nih an rian an daithlanh tiin fak tuk in sawinak le a hnu cun rianttuantu tiang thlennak a rak chuak.
- 2013 chung vawleicung tuanbia ah a biapibik pakhat a simi Edward Snowden nih USA National Security Agency (NSA) nih a thli in a rammi pumpak Email le telephone a rak ngaih piakmi hna pinah US hawikom a simi Europe ram pawl zong a thlite in an rak ngiatmi hna a phuanmi cu Obama caah ningzak le mualphonak pakhat a rak si. Europe cozah lutlai hna nih fak tuk in an rak chalh i holh awk thei huaha lo in a rak um.
- USA president le Obama caah ningzak tuk pakhat a simi 2013 laifang i Syria kong ceihnak kha a si. American hlathlaitu hna nih an chimning ah Syria cozah le an president Al-Assad nih hriamnam ttha lo a rammi cungah a hman. Obama nih hin Siivai (Chemical) hi cu a chiabik le ttihnung bik tiin a rak chim bal caah Syria cu ralkap hriamnam hmang in luhhnawh ding timhnak a rak ngei. Asinain Congress le a hawile a simi Europe ram tampi nih an rak hnatlak pi lo. Cu a si caah amah lawng cun a rak dir i Congress hnatlaknak tel lo in le hawi ngei lo (Danmark, UK le France nih bawmh an timh.) in luhhnawh a timh lio ah chawnhbiaknak in hi buainak cu kan daihter lai tiah Russia nih a rak ti. Russia president nih a khamh kan ti khawh. [Kahin Obama nih Congress tello in Syria a kah khawh le kah khawh lo kong.]
- October 2012 ah USA cozah tampi an rak khar. A ral simi republican nih phaisa hman ding kong a chuahpimi an hnatlak pi lo caah a rak si. Ni tam lakte an rak khar i Obama nih a minthut ciami budget-thlak ciami catlap cu a hnupi lawng ah republican nih an rak cohlan.
Cucaah tu kum hi president Obama caah cun a biapi tukmi kum a si lai. A taang rihmi kum 3 chung ah a min chiat lo ding le min ttha tein a rian a chuah tak khawh nakding ah fakpi in rian a ttuan kum a si lai. Cu vialte lakah sipuazi lei hi fakpi in an zoh tthan a herh kong USA fimthiam hna nih an chimmi ABCnews ah rel khawh an si.
State of the Union biachimnak cu USA zanlei ah a si lai i rak zoh cio te ulaw, a kong le zeitluk indah a biapit timi ttial ka hon i zuam te lai.
Ref: CNN, NRK. ABCnews le Wikipedia
Comments
Post a Comment