Ngandam Kum

Kum thar don zan ah asiloah kum thar ni ah biakamnak kan tuah i thla kan i cam nenh tawn hna. Kum thar hin cun zu, kuak le rithainak vialte kai phiat cang lai ti te hna an si. Cheukhat cu Pathian leiah kar hlan kum a timi zong an um ko lai i tinhmi phun li-nga pi zong a ngeimi an um ko hna lai. Zeiruangahdah kum a hon thar caan paoh ah mah bantuk biakamnak hi kan ngei tawn hnga, timi cu um ko rih seh. Kum thar biakam tampi a um ko lai, nain ka blog reltu caah tu kum cu ngandam kum si hram seh ti ka duh ve.


Keimah hi siibawi zong ka si lo, i ngandamnak lei sianginn kai le cawnnak a ngeimi zong ka si lo. Social Science cawngmi ka si caah kan miphun asiloah mibu chung ah ngandamnak a biapi tuk tiin ka ruah. Kan ngamdam lo ahcun rian kan ttuan kho lai lo, sianginn kan kai kho lai lo i kan i nuam kho lai lo. Cucaah pumsa le thinlung hrim hi a dam herh. Thlarau lei hi cu nau rawlkheih in kan i kheih ko i aining ko.

Norway ahhin nichuahlei in a hong peemmi chung in a ngandam lomi a tamdeuh cu exercise (eksersai) a ngei/tuah lomi an si, tiah VG Helg December zarh 2nk chuak ah an rak ttial.

Nichuahlei in a rami pawl ah Laimi kan itel ve i Laimi hi a eksersai tuah huam lo ngaimi kan si. Kan tuah huam lo lawng a si lo, ngandamnak lei he pehtlai hrim zong in theihkauhnak kan rak ngei lo ngaingai. Cucaah Laimi siibawite le ngandamnak lei a cawngmi mino hna nih Laiholh te in ngandamnak kong hi tampi ttial le chimrel a herh tuk hringhran. Kan challenge fawn hna.

Norway ummi kum 35 hrawng nutung pahnih cu kengfah, thahri fah phun le ruhkhua fah ruangah siibawi sin an phan. Siibawi nih a rak timi hna cu "Eksersai nan ngei lo tuk i a si. Eksersai va tuah lengmang ulaw a ttha ko lai." ti a si. Siibawi sin i piah ve ko i sii zong pek lo, chun lo in eksersai tuah fial cu an lung a si lo ngai nain eksersai an ngeih bak lomi an i pheh ve lo.

Cun "Overweight" timi a thautukmi pawl kan tam hna. Mahhi dinei zia kan thiam lo caah a si. Cu pin i eksersai tuah kan huam ti lo, sofa ah to in football zoh, Tv zoh i computer zoh cang ahcun ngan a dam kho ti lo. Zeipaoh thawte in din le ei awk a si, nain ralrin deuh cu a herh ko. USA, Arab le UK ah overweight an tambik ti a si i aruangbik cu thau tamtukmi fast food an ei tuk hna caah a si. Kan umnak hi Laitlang bantuk in dinei a harnak a si ti lo ahcun a thlummi, a thaumi le almi pawl hi cu a si khawh chung in hrialpiak ko usih.

Eksersai tuah a hau lo, tiah Laimi tampi nih kan ruah. Aruang cu rian a ttuanmi miphun kan si kan ti. Mah cucu kan ipalhnak a si. Rianttuan timi cu eksersai a si lo, na rethei i rian na ttuan tikah na pumchung i na hmanmi kut, ke le thluak tibantuk lawng kha nitin na hman caah na pum caah a rak ttha lomi a si.

Ni fatin lo ah na kal ko lai, nain lo na kal lo caan ah lamlen (laan-shioh) hi a ttha tuk. Duhsah tein tlik zong a ttha, thawha lengmang in fakpi tlik theng a herh lo. Mah cucu upa ngakchia tilo in ahopaoh nih tuah khawhmi a si, i caan zong pek khawhmi a si.

Eksersai tuah nih zawtnak tampi a kham khawh, a damter khawh caah thathu lo tein tu kum thawk cun eksersai tuah usih. Kan eidinmi kip ah a zatawk cio in vitamin tthattha a tlin caah eidin iralring usih. Ngandamnak hi biapi ah chia hna usih. A ngandammi miphun si usih.