Inncungcih Bauh Tu A Rak Herh

Khrihfabu pakhat cu milu 100 hrawng an si i zarhpi zing pumh ahhin 60 hrawnghrang hi an si tawn. Hlacawn le a dangdang khrihfabu cawlcanghnak ah an tlawmdeuh chinchin rih. Cu tikah zarh tin aa pummi le a dangdang cawlcanghnak ah a chuak pengmi chung in cheukhat cu an vuivai. Zarh tin aa pum kho lomi le aa pum ballo mi an member cung biasi phainak a tam. Asinain a taktak ah khrihfabu le zumtu hna nih an tuah awk an rak tuah ve lo. Cucu tahchunhnak pakhat in ka chimmi a si.

A caancaan ah cun Pathian sinah mi dang hruai timi hi inncungcih hawh/bauh tluk in a fawimi a rak si kho. Cucu zeitindah ka chim tiah cun Bible chung i Marka 2: 3-6 ah Jesus nih a zeng mipa a damternak kan rel khawhmi thawng in a si. Cathiang chung ah ai tialmi cu Jesus cu Kapernaum khua ah khan a ra ti thawng an theih tikah a bia ngaih le dam duh ah mibu pi nih an rak zulh. Mi pali nih a zengmi an hawipa pakhat cu an i zawn i Jesus sin phakpi an duh nain mi an khah tuk caah an lut kho ti lo. A zengmi an hawipa a dam ding an duh tuk caah Jesus umnak inncung ah an kai i a cungcih cu an hawh. Mah cu hrih in an hawipa cu Jesus hmai ah an thlak.

Jesus nih "ngaihthiamnak nawl a ngeihnak le damter khotu a si nak." a langhternak pakhat zong a si. Cu bantuk in a caancaan ah cun amah sinah mi dang hruai timi cu inncungcih hawh tluk a si timi - an lam a dawntu tthial piak hi a rak si. Tahchunnak ah; Europe le America kan um tikah hin mawttaw a ngeimi le a ngei lomi kan um hna i mawttaw a ngei lomi cu an i pum lo deuh ngai. Zarhpi ni ah bus a um lo caah le mi nih lak peng kha hmaikhap lo in an um tawn caah a si. Cun a cheu cu sawmtu le pumhpi hawi an ngeih lo caah a si fawn. Cu bantuk harnak a siloah dawnkhantu thil a um le um lo kha zumtu khrihfa ttha a simi nih cun ruah piak lo in an kong rak ceih len ding a si ti lo.

Norway kan phakka i kan ton ciomi cu biakinn a hla, Laimi khrifabu kan dirh kho rih lo. Norway khrihfabu sinah pumh kan duh nain bus a um lo caah an rak kan lak lengmang mi kan tampi. Ziah an caan vialte le gas man dih in an rak kan lak tiah cun Jesus kong thei hna seh, tthangthat kho ve hna seh tiah a si bik ko. Cu bantuk in mawttaw a ngei rih lomi Laimi chungkhar asiloah nan hawile i an fale kha nan mawngh hna le nan sawm pah hna lawng ah biakinn an phan kho lai. Mah ti cun zumhtu ah an cang lai.

Pumh lio biaherh chimnak ah ai pum lomi hna kong chim, hmun dangdang ah bianeng in biasiphai tibantuk nih Pathian sin a phakter hna lai lo.

Cucaah zumtu pakhat sinak in inncungcih hawh khawhnak a lam zoh ve hmanh. Na innpa asiloah naihniam ah a ummi nuhmei pakhat cu biakinn phaknak dingah dawnkhantu a ngeih hna aa thei kho lo men. Dawtnak he pumh sawm law i pum tti uh. Na hawi kom a si lo, na rianttuan tti hawi zong Pathian dawtnak a thei lomi a um kho ko, Pathian velngeihnak cu nangmah hmang in hmu ko hna seh. Pathian zumhnak cung i lung-awttawmnak le biahalnak vialte hi kan chim kho in kan let kho dih men lai lo. Asinain Jesus nih a ruah ko, kan zawn a ruah ko timi an zumh khawh nak ding a dawntu thil zeimawzah cu kan hawh/kan tthial, kan bauh piak khawh ko hna lai.

"Re a thei mi le thil a rit mi vialte hna,

ka sinah ra tuah u; dinhnak kha

kan pek hna lai."

Matthai: 11:28