Chaklei Lai Tlangval

Chimthli hrang law

Zo tlang a leng kei 

Val sinah dawtmi

Hon chawih vurmar!

  ~~ chimthli ~~

Chimthli timi cafung hmang in 2008 hnu in biazai phun lungchuak ca tawite te ka rak ttial tawn. Kaa chuak bia ah ai tlak ngaimi a si, nain chimthli hi khawika in a hraan timi ka rak i fiang lo. Nitlak lei in a hrang tiah ka rak ruah. Asinain thlanglei in a hrangmi a si tiah Stephen Ni Kio nih a chim i a cauk "Lai Nunphung" zong ah a tial.

Kei hi vawleicung a chak biknak, ahlei in laimi umnak ah a chakbik a simi Norway ram a chaklei, a lu ah ka um caah ka hmang theng ti lo. Ka ttial pah ti lo zong a si. Atu cu zo pa, ti zong in auh khawh  ka si hnga. Zo Lo, timi laiholh ah a um i "chaklei" khi zo kan ti tinak a si.

Kan umnak khua Tromsø hi Norway khuapi a 7nk a si i a chak bik ah a um. Sianginn kaimi pathum kan um i kanmah nak chak ah a ummi hi Norway lawng ah si lo in leicung laimi lakah an um men lai lo, [chung khar pakhat a chakdeuh ah an um bal, i an um ti maw ka thei lo.]. Tu kum cu vur a tlak tuan tuk, october 15 hrawng khan a tla, nain a peh lo caah ai ning. Mah tluk a chakmi ah kan um, hei ti bia khi mu,.. :)

Khuasik caan ah cun nika hi kan van that tuk caan ah suimilam 2 chung kan hmuh, cu lo paoh cu a mui peng i chunlaipi ah electric mei lamcung ah van a si ko. Dah-mei he i chawh a si. Atu hi zing 10 ah ni a chuak i zanlei 2:30 cun a mui. December le March thla thawk tiang a si. Atu hi muih a tuan chin lengmang lai. Tthal ah cun may thla in ugust thawk tiang a mui hoi lo i nikhua a chiat lo paoh cun nika hmuh peng khawh a si. Mah cu a zoh duhmi khual tampi an ra tawn.

Za rih phot seh, na umnak kong theih ka duh a timi an um caah ka von peh vima mi a si :)

Chaklei/zo tlangval hi Laimi cu ka si ve le ka miphun ttheo ka hlam hna. Miphun dang nungak dawh an tor ko nain lainu te ttheo cu thinlung le thisa ah caam kaw, vawleipi hi thlalang-awng ngei seh law thlanglei rumro a von cuan ding khi ka si.

Chimthli a hran caan a si nalo in "chimthli hrang law," tiah Lai lengnu sinin zeital a phan lai ti bang a hauh in ka hauh. Ruah a sur sual lai ti cu ka phang pah, chimthli a hran ahcun ruah a sur an ti. Hi khuasik lio i ruahsur zong cu minung a thla ngai lai. Nain khika thlanglei sang i a ummi lengnu he ipom ahcun ruah a sur vurmar le aa huai len ko khi nuam hnga, meipung toh pah in... [Seihkuyin cio khawh si ko.]

Ka tial cuahmahmi hi ngol ka siang lo nain keimah nan ka lawh ahcun an simh sual hna lai, hla ka uarmi pawl ka ca he aa pehtlaimi hi rak ngai ve te hna u law, lungkil thli talin nan ngaih le nan dawtmi hna rak ruat ve cio u <3

"I Pheh hlah i pheh hlah" timi hla hi Vapual Thawng nih a tialmi a si. Hla ttha pakhat, a ziam kho lo mi a si, i SP nih a sak nak zawn hi a ttha khun tiah ka von tar.

"Thought of You" by Ryan Woodward hi a hla le a hmanthlak an tuahmi aa rem tuk.
"Britain's got talent 2013" chung i ka uar bikmi hna hi zoh an phu tuk:

Spotify ka on cang lai, zau pah in hla nih a ka thlim khawh si ahcun tuan ah kai hngilh te lai.
Mangttha in zingttha tuk hna u law. Dawtnak he