Realchap: Holh Lo In Kum Li Chung Na Um Kho Lai Maw?
Cu vialte lakah Krf vote a petu hna ilawmhbik awk thil pakhat cu sianginn ah Khrihfa biaknak kong tamdeuh in cawn ding hi a si. Mah cu September thla i vote na rak pekmi thawng in Krf cu 5.6% a hmuhter i cozah tlai kho ding dirhmun a rak chuahter. Asinain anmah party he dirhmun aa dang tukmi Frp he cozah tlaih nakcha cun Storting chung tu in tthawng deuh in dir an duh caah cozah ah an itel lonak hi a si.
Krf cu khrihfa party a si bantuk in a biapi bik ah an chiahmi cu Khrihfa biaknak kong hi a si. Høyre le Frp he ttuantti ding hnatlaknak an ngeihmi lakah a biapi cemmi cu sianginn ah Khrihfa biaknak kong cawn tthan ding timi hi a si. Khrihfa hna nih biapi ah an ruah i an izuammi a si.
Tanghra tang paoh nih RLE (Religion, Livssyn og Etikk) timi cawn a si i Khrihfa biaknak kong a tlawmtuk. Cu hlan 2005 tiang ah Khrihfa biaknak hi tamdeuh in an rak cawn, Laimi zong a cawngmi an rak um manh. Asinain 2005 hnu cozah thar nih Khrihfa biaknak hi mission bantuk in sianginn ah chimhter a lo, tiin an rak hnon.
Relchap: Orhlei Ah Nu Nih A Kan Hruai
2005 hlan i rak cawnmi KRLE (Kristendom, Religion, Livssyn og Etikk) kha a thar chuah tthan ding in Krf nih ai zuam pengmi a si. Atu cu an duhnak a tling kho cang i hi cawnmi subject pakhat chung ah Khrihfa biaknak cu 55% ai tel lai i a dang a tangmi 45% kha biaknak dang kong le nuncan ziaza kong an si lai, tiah cozah thar kaimi party pahnih le Venstre party nih lungtlinnak an ngeihpi hna.
Atu cozah thar a kaimi hi Laimi cu tampi in aa hleinak a kan theihter theng lai lo. Rianttuanmi hna nih ngunkhuai tlawmdeuh nan pek ding tu hi a fiang ngai. Cu tikah rian ttuan hi a hlawk chinchin lai. Ro co awk a ngeimi hna caah a hlawk deuh lai, ngunkhuai nan pek ding a tlawmte lai.
Fa ngeih tikah hringtu pale hi zarh 14 rian dinh caan an pek tawnmi hna kha zarh 10 ah an tthumh. Mah cucu a poi bik pakhat a si, an ti. Krf nih a tlawmbik zarh 12 lawng siseh an rak ti nain atu cu zarh 10 lawng in an lungtling.
Zeidang kong ah Norway i phung ning in a ummi ramdang pawl caah a poinak a um lai lo, Frp an kai ruang ah. Asinain dornak a halmi hna le dorhnak an hal lio i a hrinmi fale caah aa hleinak a um lai lo, i an rengh chinchin hna lai. Refugee kong le ramdang in hung peemnak kong ah a har deuh ding a fiang. Nupi icah zong a har chinchin ko lai.
Khrihfa a simi paoh nih cun khrihfa biaknak kong cawn ding cu kan duh cio ko. Cu bantuk in a biapibik tiah kan ruahmi kan dirpi i vote kan pek hna caah atu bantuk in kum 10 hrawng a tlau cangmi khrihfa biaknak cawnnak cu atu a thar chuah a si lai.
Lairam balte ah Kawl biaknak a lut chin lengmang, rammi le MP nih zeihmanh an tuah duh fawn lo. Zarhte le zarhpi hna sianginn kaiter an timh cang hna. Kan duhnak hi chimrel sawh men awk a si ti lo. Thlacam awk a si, ttuan awk a si.
Atu zong Democracy ram ah inn chung in zai sawh ti lo in vote thlaknak nawl na ngeihmi te na hman i vote na pekmi party a tthawn tikah thil ai thleng. Democracy muisam kan keng deuh ngai.
Comments
Post a Comment