Nihin Cu Ka Chuahni A Si

Tlangpar farkung na si khawh lo ahcun,

Tiva kuang a kilhtu hrambur tthabik tal si

law, nelrawn ttha hna hupphengtu ah   

Thingkung na si khawh lo cun bur tal si law. 

Bur na si khawh lo hmanhah, hramhno fate

tal si law, a retheimi hna an zaunak tal si lai. 

Tivapi na si khawh lo zongah, vacek 

tal si law, dong lo in luang. 

Nika na si khawh lo ahcun, arfi si ko. 

Zalam na si khawh lo ahcun, keneh si ko.

Teinak le sunghnak hi a hmet le lianh tahnak

ah a um lo; 

Na sining ah khan a tthabik peng si i zuam ko. 

----------

Ka chuahni, October 13 a phan tthan. Bawipa cungah kai lawm.

Pathian dawtnak thawng in a si, ka chuahcam tuak ni le thla ka phak khawhmi hi keimah tuah khawhmi a si lo. Ka cungah Bawipa a ttha. Mah sunparnak le minthatnak caah sermi ka si nain nitin ka nunnak ah zei thil ttha hmanh ka tuah kho lo. A hmaika ah a tling lomi ka si zungzal. Sihmansehlaw, ka nunnak a zuah i tuni tiang ei awk tirawl, fanhaih le dornak inn a ka pek. Bawipa a ttha.

Caan tawite ka nun chung ah minung hawi caah a tthahnemmi le tthatnak a tuah khomi si ka duh. Minung hawi a lawmhter khotu si ka duh, Bawipa. Na sermi ka si, ka miung sinak si loin nangmah duhnak ah ka hruai ko. Keimah tein cun a tthabik si kai zuam, tthat kai cuh zongah nangmah tello cun pakpalawng a si zungzal ko.

Nangmah nih a tthabik in na ka ser i nangmah sunparnak caah ka dirpi law ka bawm zungzal ko. Keicu minung sasawh ka si lo, nangmah nih sermi ka si.

Salm catialtu nih Salm;139 chung i a ttialmi hi keimah kong a si ve ko, ho ka si a ka hngalhter tthan:

13. Ka pum chung thil vialte hi

nangmah sermi an si dih;

ka nu pawchung i a ka semtertu cu

nangmah na si.

14. Hi bantuk thil thuk le khuaruahharmi

thil ruangah hin nangmah cu kan lawmh:

keimah kong i khuaruahhar a simi thil le 

nangmah nih na tuahmi thil khuaruahhar 

a simi hna kong ah hin kan lawmh.

Nangmah nih na ka hngalh dih cikcek ko;

15. Ka pum hi nang caah cun

khuaruahhar awk a si lo,

zeitindah a thli tein muisam

ka hun ken le ka nu pawchung ah zeitindah

ka hung ṭhan ti kha nang na caah cun khuaruahhar

a si lo.

16. Ka chuah hlan in na rak ka hmuh

diam cang. Ka ca i na sermi ni hna cu na cauk

chungah an rak i khumh diam cang,

hram an i thawk hlan hmanh khan

an i ṭial diam cang.

17. Maw Pathian, na ruahnak cu ka caah

a thuk tuk hringhran, a tam tuk ah

a dongh in a dong kho lo.

18. Rel tim hnik hna ning law thetse

nak tam an si ṭung;

Kai ṭhangh tik zongah,
na sin ṭhiamṭhiam ah ka um ko.

øøø--øøø