September thla thawk zanlei sang pakhat ah sianginn in ka lawi. Sianginn le ka inn aa hlat ngaingai i minute 40 bus cungah ka to. Chuncaw tthatthi in ka ei lo, ka ba ngai i ka mit zong a ku pah. Bus in ka ttum hnu ah inn tiang a cho ngaimi lam minute 5 ka kal tthan.
Inn tthingpi ah ka lut i ka thil zong ithleng lo in coka ah ka lut colh. Mah cu rawl hmin fawite ka chumh hnu ah innpi cabuai ah tthu in innleng lei i a hei langmi rili ka cuan pah. Mah cun ka lung ah na chuak, kan ruat. Mah tluk aa dawhmi fing le tlang, rili le zanlei nitlak hi zoh tti sih law, ti ka ruat.
Van kil deng khin ninu sen zuai in a liam cuahmah i rili cu thisen bang in a sen ve. Asinain a kiang i tlangcung thinghnah eng hna cu zilthli he rimhmui par phunkip nih a von huai tawn hna. A rauh hlan ah thinghnah an ttil hna lai, khuasik a chuak lai i hi ka hmuhmi fingtlang hna hi vor le horha in a khat cang lai.
Ninu cu a hmai chia, a hmai a sen. Aruang cu nangmah kaltak ding a ruah khawh lo caah a si. Nitlaknak he aa ralkahnak hmun tlangcung pakhat in hmai bialpi pakhat mir nawn in a rak kai ve. Atu caan thawk hin nangmah he zankhuadei caan a hman ding aa ngaih hringhran.
Cucaah ka dawt:
Zanlei ninu a liam khin
Zaangba in nang uai tuk lai maw,
Chun a sau in zan nih
A zual chin tikah
Dawthniang ttap hlah law,
Nang hnemtu ding ah
Zan thlapa rung vang ai hi.
Na duhmi zanriah an chumh
lo tik le rimhmui par an rak
uai zong ah dawtmi,
ttap hlah mu, na caah zilthli nem
hrang riang maang lai.
Thlapa cu venus nih tampi a ngeih cu teh, tiah a ti men lai. Nain amah venus ca lawng ah a vang ding thlapa a si zungzal mi thlapa, thlapa.
Comments
Post a Comment