Barcelona FC nih Brazil miphun Neymar cu tthal chung ah an cawk tikah bawlung chuih uarmi tampi nih khua a phunphun in an ruat. Lai mino an facebook zong ah linsa ngai in an rak ceih supsap hna. Neymar nih zeitluk indah Barca a bawmh khawh hna lai? Neymar cawk hi a herh taktak maw? Barca ahhin ai nuam lai maw, a tthangcho kho lai maw, tiah pumpak in Neymar uartu hna cu khua an ruat. Kum 21 chung a lutka te leicung mino hna lakah bawlung pahrang a ngei bakmi a si tikah Sui-bawlung kum nga peh in a cohlang cangmi Messi sinah a tlau sual hnga maw, ti a si.
Lionel Messi hi Barca nih an i bochan tukmi, amah hngatchan ngai in 2000kum hnu bawlung tuanbia an ttial. Cu tikah Messi bia hi an el duh lo. Messi lungtlin lai lo hi an phang hringhran. A naibik in zoh ahcun atu an manager thar khi Messi nih Barca caah a ttha bik lai tiah a chim i Barca nih an lak colh ve ko. Zlatan cu Barca nih manfak bik (club record) in an rak cawk le Messi nih a rak rem bak lo caah kum khat fai lawng Barca ah a chuih manh. A dang tam ngai Messi lung an zulhnak hi media nih a chimnak thawngpang dawimi nih nan hngalh khawh lai.
Leicung mino hna lakin bawlung ah pahrang ngeibik Neymar zong hi Messi nih caw ko uh, a ti hlan cu an rak caw lo. Mah cu a si caah si ttheo lai, Barca nih an cawk i avoi khatnak bik press-conference ah Messi kong an halmi cu Neymar nih "Messi hi vawleicung a thiambik a si rih khawh nakding ah kahin ka rat hi a si. A thiambik si ding ka caah biapi a si lo, a thiambik cu ka caah a um cang. Messi a si." tiah fimkhur ngai in a rak leh hna.
Messi hi a duhfak (ego) ngaingaimi a si. Minute pakhat zong hrelh lo in chuih peng a duh, goal sut peng a duh, an ti. Goal a sut lo tikah a chuih tti hawipawl cungah aa lawm kho lo, tiah The Daily Telegraph an rak ttial bal. Goal a sut tikah a hmaipanh kho, asinain duhfahnak "keimah tinak" cu a chungte ah um zungzal.
Barcelona nih Messi aa lawmh khawhnak ding ah pekchanhnak tamtuk an tuah. Messi lungtlinter ding hi champions league tei ding tluk in a biapi. Zlatan an rak cawk thla khat hnu cun Messi nih hmaikal si a duh colh. Cu hlan ah hmaikal taktak a rak si bal lo. Cutin a pu Guardiola cu "Hmaikal (forward) ah ka chuih lo ding a si ahcun chuih lo lawlaw in ka um lai." a rak ti, tiah Guardiola kong ttialtu Guillem Balagues nih a ttial.
Barca manager hlun Pep Guardiola nih "Messi a nih khawh ahhin cun zeidang thil hi cu a tluang, a fawideuh tuk cang." tiah a rak chim. Aruang a um lai cu! Messi bantuk a hmu bal hna lo. Guardiola nih a naule thleidang lo tein a zoh tawnmi hna Messi ruangah a thlen i Messi kha a si khawh chung in bawmh ding in sining a thlen. Messi hmai a kalter le Xavi le Iniesta kha rawlpetu ah Messi hnu a zulhter hna. Asinain kam khatlei in Barca caah a rak ttha tukmi a si ve.
Messi nih din lo in chuih a duh. Barca nih 4-0 in an tei cuahmah hna lio i Messi a dinhter tikah Messi cu a thaizing training a tuah duh ti lo. Champions League ah a thawkter lo a si ahcun ni tampi chung Guardiola le adang trainer pawl a chawn duh ti hna lo. Manager i nawlngeihnak kha a theihthiam ko nain a cohlang kho hrim lo. A hmaichia peng, hingtun in a um peng tiah Guillem nih a ttial.
Zlatan lawng a rak si lo, Eto he zong an rak i rem ziar lo i an zuar. Henry teh? Kehlei ah an rak tlikter i David Villa zong hmaikal ngaingai a tlai kho thai lo. Goal tampi a sut kho ding hmaikal thiam, pahrang a ngeimi mino tampi tahchunnak ah Tello te hna a kam ah an tlikter cang hna. Cu a si caah Messi sinah hin Neymar hi a hlawhtling ngaingai hnga maw, ti ruahnak a ummi cu a si.
Caan cu a hung kal i Neymar an cawk hnu Barca an chuih ka zoh kho ti lo. Zeidah an lawh hnga ka ti. An i tlak ko hnga maw? ti ka ruat ngai ve. Messi he chuih tti khawh ding ah manager a lufak kho men, an chuihning muisam an thlen a hau kho men. Neymar hi akil (wing) ah a tli duh hnga maw? An pahnih in hmai an kal ah a dang hmaikal pawl teh? David Villa hna cu an hei zuar tthan cang ti ka hei ruat.
Neymar hi Santos i a chuih ah arfi bantuk in an zohmi a si. Amah bawm ding ah Messi bantuk in a dang nih an kulh. A ke le bawlung tthen a duh bal lo (goal sut dah ti lo :). Free-kick an chuihter pengmi a si, Messi bantuk in. Penalty zong chuih a duh ve tthiam lai. Zei cu dek an lawh hnga, ka ti.
Asinain tuzan Champions League ah Neymar cu akil ah a tli ai. Kehlei kil ah a tli i aa tlak ngai ko, Santos zong ah khan voi tamdeuh cu kehlei in a luhpi tawn (ka zohmi chung.). An chuihning zoh tik zong ah bawlung an i cuh tuk lo. Neymar cu a bianing tein Messi bawmtu ah a cang ve. Messi tu cu goal sut lawng a rian ti awk in a um ko rih (Ka rem lo tuk cu a si lo). Goal 3 a von sut chinchap le aa ning ngai lai. Kam khat lei in an manager thar zong cu amah nih rian a pekmi a si tikah Neymar hi akil ah tli seh a ti hmanh maw, theih lo a si.
Thawngpang ka rel tawn tikah atu tiang cu an tluang. Messi a um lo tik zong ah Neymar nih Messi ai a rolh khawh tuk. Messi a um lo cun anmah kha arfi a si tthiam kho. Sui a sinak a tlau hlei lo, Messi he an chuih zong tiah ka ruah. Atu tiang ah cun Neymar thinlungput le a cawlcangh duh a nung rih. Barca nih Messi rumro an i hngatchan tiah (messi um lo cun an dih.) an ti tawn. An i hngatchan zia Neymar nih a hun langhter ngai khawh manh.
Asinain Messi cu Messi a si rih ko lai. Neymar a lung sau chung paoh cu Messi + Neymar = Barcelona hlawhtlinnak a si ko lai tiah tu zan Champions League ka zoh in ka ruah.
Careltu nan cungah kai lawm.
Mang ttha hna sih.
Comments
Post a Comment