Manchester khua ah Football Club lian pahnih Man U le City an um i Premier League ah teinak hmuh an i zuam bantuk in anmah pahnih hi ahodah a tthawngdeuh ti le ahodah teinak tamdeuh a hmu lai timi aa zuam cawh pengmi an si. A luancia kum tampi zoh lo in kum 30 chung kan zoh tikah Manchester United nih Premier League ah teinak voi tambik a hmuh i derby an chuih zong ah voi tamdeuh Man U nih a rak tei. Mah cucu kum 27 hrawng tthawng tuk in (Iron hand/thir kut in) Man U a uktu Sir. Alex Ferguson tang ah an um lio a rak si.
Ferguson cu manager ah an von lak tikah a hram in a rak cawih dih i zeizong te a thar in a rak thawkpi hna. A lung a rak tthawng, mi zei hmanh a rak ttih hna lo. Mino tampi a rak cawm chuah hna i thapek le fak a rak thiam. Man U hi kum li-nga ca men in hruai a rak itim lo. A dang thil tampi a rak ruah le a tuahmi a tthami nih Premier League 13? a teipi. A tar tuk cang caah 2012 khan aa din cang i Man U ttanhtu lawng si lo in bawlung a uartu paoh nih an siang lo. Aruang tampi a um lai.
Moyes nih a chawn tikah hin mi tampi an khuaruah a har i Moyes tangah cun Man U a ttumchuk lai tiah ruah a si. Aruang cu Moyes hi Everton ah kum 10 (2002 in) manager a rak ttuan. Premier League nih thla tin manager thiambik thimnak ah voi 10 tiang an thim ve, Ferguson (27) le Arsene Wenger (12) lawng tamdeuh a hmumi an si. Everton hi Premier League ah a chuihpi khawh peng hna lawng si lo in top 10 tiang a telpi peng hna. Bawlung chuih thiam a cawkmi hna aa fuh ngai tawn. Mah cu lawng cu hmuhton (experience) a ngeihmi a si.
Everton cu Champions League ah an chuih balo caah Man U i a ttuan hnu lawng ah Champions League ah team pakhat a hruai cu a si i avoi khatnak ah Man U nih teinak a hmuh ve. Asinain Champions League Semi tiang a phanhpi te hna lai lo tiah an ruah pah.
Manager tthawng tuk le thiam tuk mi Ferguson a um lio ah Man U i a chuihmi tampi cu an thiam tuk ve. 2007 hnu minung a cawkmi hna an zoh tikah minthang lo tete an rak si tthan nain premier league cu an tei lengmang tthan ko. Uknak thlah duh bak lo in tthawng takin a uk hna tikah a huham hrim an zenh tawn rua, Man U ttheo nih 2012 zong an tei hoi. Cu bantuk ralbawi ttha le tthawng pakhat nih a dinh tak hna tikah Man U player pawl hi zeidah an lawh taktak hnga?
Raltuk nakah le bawlung ahhin hruaitu ttha ralbawi le manager a herh hrim an ti ttheo. Asinain Barcelona hi cu zebantuk manager paoh nih hruai hna seh law teinak an hmuh a tampi ve ko lai, an rak ti. Guardiola a thiam an timi nakin a chuihtu pei an thiam tuk cu an ti. Cu bantuk in Man U zong hi Sir Alex um hlah seh law zei an si ve hlei lai lo, an ti ve. [Guardiola nih Barca a chuah tak i Bayern ah zei a lawh lai kan zoh lai. Barca teh atu an manager tang ah zeidah an lawh ve, ti kan hmuh deng cang.]
Premier League an von thawk ciammam i voi-nga an chuih tiang ah Man U cu voi 2 teinak a hmu, voi 2 a sung, voi 1 an i tluk i mark 7 lawng a ngei. Table ah 8nk ah a tla. A hlei tu zan i Man City he an chuih ah an thiam lo tuk. Goal 4-1 in tei cu a tam tuk. Mah tihin Man U nih Ferguson chan ah an rak tei ve ko hna. Asinain atu cu Ferguson a um ti lo. A chuihtu balte an i khat peng rih ko. Chuih ding puai 26? a tang rih nain a fiangmi Man U nakin Man City hi a zeilei paoh in an tthawng deuh ko ti hi a si.
City-manager thar Manuel Pellegrini cu Real Madrid kum tlawmpal a rak hruai hna, Champions League zong voi tam a hruai hna. Villareal kum 5 a hruai i a hlawh rak tling ngai hnu ah RM nih an cawk, cun Malaga ah a ttuan tthan i Champions League a chuihpi tthan hna. Manager a ttuannak club a tam cangmi a si fawn. City chuihtu hna hi atu lio vawleicung minthang an tam. An tthawng. City ngeitu phaisa tampi a ngei. A duhmi minthang a sawh hna i City ah a hruai hna.
Ferguson a min a lianh tuk cang caah le Man U a rak tthawn tuk caah Moyes cungah rian a rit tuk (press tam). A sin in ManU ttanhtu hna nih an i hngah-hlangmi a tam. Ferguson bantuk in mi ttha cawk awk a thei lai lo ti an phang. Ferguson bantuk in a lung tthawngmi a si fawn lo, cu tikah cu bantuk rian rit cu a phur kho tak tak te hnga maw? Caan sau a lak a hau hnga i kum 5 hnu hna ah aa hrim kho te lai maw? Cu kum nga kar ah cun City nih Manchester cu a uk ko lai dah, tiah ka ruah.
Hmai kum thawk lei ah City le ManU cu an itong tthan te lai. Champions League zong ah ai tong kho an si i FA zong ah an itong kho fawn. Cu tikah zoh a nuam khun lai. ManU nih an philh kho hrimhriam lai lo. Asinain City nih Manchester ah uknak a lak cuahmah ko ti cu a fiang ko.
Ka mitku, ka it rih lai. Zarh khat chung zingka thawh nih a ka hngah ko. Mangtha cio uh law.
ka hmuh dan ahcun nizan kha an sung ko nain. Ferguson nih a rak tlaih lio hna ahcun chuih dawi tlik cu lawng ka hmuh eh..Nain Moyes nih a tlaih hnu ahcun tlawm te aa dawh deuh in ka hmuh. Premier league chung si seh Champion league chung zong ah an chuih dan a tha deuh in ka hmuh. Ni zan balte kha cu a chia bak ko..Kei mah ka hmuh dan c ko cu..Kei mah cu Arsenal fan bak ka c.
ReplyDeleteA si kho tak ko, Everton lio zong ah uar a um ngai. Asinain naite ah Ancelotti nih "Goal sutnak ding caah passing 30 tuah hmasanak in passing 3 a tthadeuh ko. Counterattack ka duhbik." a ti. Cu bantuk in Rooney le C.Ronaldo, Tevez an chan kha ManU zoh a nuam an rak ti cio. FErguson le Moyes cu an philo ai dang ko lai, nain Ferguson ruahnak a hal len an ti. Kai lawm mu, hika na comment cu.
Delete