Laimi Carel Kan I Hrawt Hnik Maw?

Laimi a tamdeuh i ca kan rel timi aa thawknak hi Laiforum le adang E-mail biaruahnak pawl i bia iel asiloah thil pakhat kong ceih tikah a lang khun. Mi tamdeuh (ram dang chuak) nih carel kan ithawknak zong a si fawn lai, Laica lawng rel khomi ti bia mu. Cucaah mi tampi cu a rak kan tthathnempi, atu tu hi cu a si ti rua lo, forum biaruahnak dirhmun a ngei ti lo tiin ruah a si ko.

Asinain atu ah Facebook kan von hman dih cang tikah ca/cauk kan relmi kong chim kan hmang ngai hna. Cauk kan ngeihmi le kan cawkmi tiang in hmanthlak kan hon itar hna. Ca kan reldeuh ngaingai tinak a langhtertu a si. Asinain cu cauk a tamdeuh cu mirang le kawl deuh an si i Lai ca chuak hoi hna cu a tlawm le a rel zong kan rel tak men ko lai.

United Kingdom ah cauk ka rel a ti i a rel tak ttung lomi, a tlangpi in a kong rak theihmi a chimmi an tam kong The Telegraph nih tu thla thawk ah a phuan. British 2000 an hal hna le 62% nih cauk an rel lomi kan rel an rak ti.

Hawihlei in a fimdeuh, a theideuh le a hngaldeuh mi sinak a langhbiknak cu cauk relmi tam hin a si tawn. Cucaah mi tampi nih kan hawikom, kan theihhngalh le nitin kan tonmi hna nih an kan uar asiloah an kan zohchodeuhnak dingah cauk kan rel lomi zong kan rel, kan ti tawn tiah mah hi british pawl phuanmi nih a langhter. 

An halmi hna lak i 42% nih a cauk rel bak lo in Film siloah Tv in an zohmi (cauk tampi cu film in thlak an si.) kha a cauk kan rel an ti tawn. Cu a silole a cauk kong tlawmpal an ttialmi an rel tawnmi kha a cauk ning rel in an i chim ti a si. 

Ziah cu ticun an rel lomi pi kan rel tiah lih an chim tawn tiah cun 70% nih an lehning ah hawi hlei in a hngal le a fimdeuhmi si kha biapi ah an chiah caah a si, ti a si. Kahin cauk 10 an rel le rel tak lo kong an halmi hna zoh te law, Bible hi cu an rak rel pah cio ko hna. 

Laimi biaruahnak forum pawl ah, cauk an relmi kong an chim tawn. Thilpipa pakhat khat kong an chim tikah a silole bia an iruahmi ah cherhchanh an i lak tawn tikah hin "cu cauk cu ka rel, cu cauk cu a ttha tak si." an timi tete a rak um tawn. Cuti chim tikah, article pipa a si lo tete i an chimmi khi ka chim. "Cu cauk cu a ttha tuk si, cu ticun a cu ticun." ti khi an chim tawn nain cheukhat cu an chimmi cauk i kong a fiang tak lomi an rak um len. 

Sianginn i an cawnmi ah aa telmi, an cawnmi he pehtlai in an reltermi hna cauk hoi hna kha an si tawn ko. Thil kong kan ceih tikah cu thil/tlangtar kong he aa pehtlaimi cauk dang kong an chim khawh tawn lomi zoh tikah a fiang ngai. 

UK te hna cu an fale hi an ih lai ah tuanbia an rak rel piak peng hna (a tam-u) i a hnudeuh deuh cun anmah tein cauk rel hi an rak i theih tuk cang hna. Cauk phuntling an rel. An ttial cang hna. Nain mi tamdeuh nih an rel lomi kan rel an rak ti ve fawn. Laimi nu le pa nih an fale ih lai asiloah dinh caan ah an rel piakmi hna hi a ummi kutdong khiak a si lai sikaw, ti khi ka ruat le hngakchia caah Laica rel awk tampi chuah a herh ning le nu le pa nih ca kan rel piak hna awk a herh hrimhrim kong ka ruat chinchin.