Holh Lo In Kum Li Chung Na Um Kho Lai Maw?

Democracy cu mi tamdeuh duhnak in iuk a si, ti kan theih. Cu bantuk in zapi caah thil ttha a chuah le a umnak a si ve. Democracy cu a ttha tiah kan theih, i kan duh. Asinain democracy tthatnak le chiatnak fiangte in a theimi cu cacawng lo a si zong ah cu bantuk i uknak ram ah a ummi kha nan si. Cu hmanh ah nan umnak rammi sinak a ngei i cozah ithimnak ah thimfung thlaknak nawl a ngeimi nih democracy thawtnam theih hlei a si.

2013 Norway cozah ithimnak ah thimfung thla kho a simi paoh nih  9. september ah thla cio ding in zapi biaruahnak ah kan chim. Kan ttial. Nihin cu 9. sept. a si cang i Laimi thimfung 150-200 tal cu ai tel ve lai tiah ruahchannak ka ngei. Thimfung thlak timi cu cozah aa cuhmi hna nih ram le miphun caah, khua le chungkhar caah kan tuah lai tiah an i kam le timhmi cung i kan lungtlin deuhmi party thim kha a si bik. 

Thaizing thawk in a ralaimi kum 4 chung hruaitu cozah sawisel, el, duh lonak langhter khawhnak nawl cu cozah ithim lio i thimfung thlaknak nawl a ngei i a thlatu hna lawng hi an si. Nihin i na teltumnak nih mah cu nawlngeihnak cu an pek khawh. 

Thimfung thlak lo = chimrelnak nawl ngeih lo. 

Cucaah mah hi ruat in rian in maw, sianginn zong in na lawi pah ah thimfung thlaknak hmun ah hei kal law va thla ve ta ko. 

Cozah ithimnak ah thimfung thlak ve hi democracy a muru taktak le a biapi bik cu a si. Ram pakhat ihruainak ah le cu ram democracy caah cozah ithim ni cu a biapi tuk i nangmah le na chungkhar nih thimfung nan pekmi an kai a si ahcun, cucu a si ko.

Norway ah phungning tein umnak nawl le anmah rammi sinak na ngeih cang caah ramdang mi sinak dirhmun in tampi (Laimi refugee lak kong le ram dangmi an la ti sual lai lo, ti ruat lem lo in.) ruat lo in hi kan umnak ram ah sianginn, sipuazi le ngandamnak caah kan chungkhar le keimah caah zeidah a ttha lai timi kha ruah chih a herh. Cucaah politics cu kan dirhmun ai dang cio i zei bantuk party a si zong ah na dirhmun in vote rak pe ve. 

Thimfung pakhat te hna cu, ti sawh awk a ttha lo. Thimfung pakhat nih hin kan umnak ram kong zeitluk in kan ruah le hmailei kan caah le tefa caah kan ruahmi kha a langhtertu a si. Cu a si caah thimfung thlaknak nawl a ngeimi paoh nih rak thla ve u, tiah kahin ka von nolh tthan.

Holh lo le zai lo in kum li chung na um khawh taktak ttung lo ding ahcun rak tho ve hrim ko :)

Tu zan ttim hlan ah teitu an thanh te lai. Kei zong thimfung ka thlak ve cang. Pathian nih in umpi hna seh law Norway zong thluachuah pe ko seh.