Minung nih hin a hmete in a nganpi tiang nitin kan nunnak ah harnak, buainak le hlawh tlinlonak cu kan ton ciomi a si. Cu kan tonmi buaibainak he pehtlai in mifim hna nih bia an chimmi lakah pakhat te cu;
"Na buaibainak(problems) hi mikip chim hna hlah. Na chimhmi hna lak i 20% nih zeiah an rel lo i a tangmi 80% cu an ilawm."
Mi timi ah na nu le pa, na chuahpi unau cu an itel lo. Mah* an si.
A cung i bia chimtu mifim hi mirang maw a si hnga, minak dah? A biapi deuhmi cu a chimmi hi a si taktak maw? timi a si lai. Laimi nih cun rak chim hna seh law a dik tuk, a si tuk kan ti cio lai. Asinain Laimi lawng si lo in miphun dang zong hi minung sinak cu an ngei kan ngei cio ko.
Nu le pa, unau chuahpi an um lonak hmun le caan te i kan tonmi thil kong ah kan harnak le kan hlawh tlin lonak hna hi aho sinah dah kan chim ne lai? Kan hawikom tthabik tal teh? Si, hawikom ttha hna zong hi an hmun zungzal kho lo. Hnangamnak an kan pe kho peng lo, an kan bawm kho peng lo.
Jesus lawnglawng hi zei bantuk dirhmun paoh in kan kawh le kan auh tikah a kan theihpiak pengtu a si. Kan buaibainak vialte le kan hlawhtlin lonak vialte a kan theihpitu a si caah a sin i kan harnak, kan buainak, kan hlawhtlin lonak le kan chambaunak vialte kan chimh tikah a kan ruah piak zungzal.
Amah lawnghi hnahchuah awk a ngei lomi, mirum, mifim, bawi le siangpahrang, a dingmi a si. Amah hlei in thilti khawhnak le nawlngeihnak a ngeimi an um ti lo.
Minung cu ahohmanh a tlamtlingmi kan um lo caah amah Jesus sinah kan thilrit, kan chambaunak le kan buainak vialte chim ko hna usih. A kan ruah piak zungzal ko.
Comments
Post a Comment