Ka Naule He Nga Kan Sio

Norway tthal cu july thla canceo hrawng hin dihlei a panh tiah lungthli in khuasik chuah lai zenh a um hringhran. Sihmanhsehlaw, tthal caan tawite chungah sianginn khar hla i ka rak i ngaih tukmi zalong le nuamte in ka tuah khawh caah kai lawm.

Ka naule he Valle khua i tiva lian pakhat ah nga kan rak sio hna. Valle cu kan khua Froland in suimilam 2:30 chung maungh a si.

Kei cu ngasa ka duh bik. Nga hmanh ah a lu ka ei lo cun nga a ei ah kaa ruat tuk lo. Laitlang le Kalay kan rak um liote in ngatlaih le tiva kal cu ka rak huam tuk mi a si.

Ka pate le a chungkhar an umnak khua Valle khuachung ah a luangmi tivapi cu kan hrawn i a sum leiah kan rak ttum. Avoi khatnak kan rak kal zarh ah nga lian ka sio lo caah kai nolh i tihrah khup can le tai cancan ah ka rak thla tthan.

Kan siomi nga hi tiva luang ah siomi a si bantuk in rili nga nakin cun an thawdeuh. Cun a sio hrim an nuam. Lairam le nichuah ram lei hna ah cun a um lo. Norway holh in Ørret an ti hna le a phun tam ngai ve, i mirang nih Trout an ti hna. 

Trout ciocio ah rainbow trout timi phun hi an thaw khun ti a si, nain atu tiang ka sio kho rih lo, man pek in va sio a hauh caah a si. Atu kan siomi hi rainbow trout cu a si lo nain a caar hnu lebang ah a thawtning mak ko. 

Anmah khua hrat cu ka sio zah a sio lengmang ve :)

Zarhpi zing suimilam 9 in siothlak kan i thawh lai a si. 

An chungte in kan khua ah an i tthial cang lai caah hmai kum hna cu ka va kal kho theng ti lai lo. Kum 3 deng an umnak khua ah nuamte in nga kan va sio tti khawhmi hi zungzal ichim awk a si ko cang lai.

Khuasik thla zong a phan deng lai, kan zenh tuk tawn nain philh khawh lomi thil tete a cang ve tawn ko.