England Siangnuhrang Nih Gay Thitumnak A Cohlan

Nihin ni ah siangnuhrang Elisabeth nih England le Wales ah nu le nu, pa le pa ium khawhnak cu a theihpi, a cohlan piak hna. Mah cu House of Commons zong ah fakpi in ceih le phunglam/law ah fehter ding a si kong BBC nih a ttial.

England cu vawleicung ah a fimbik le a tthawngbik ram a rak si. Pathian a rak i bochanmi ram an rak si. An siangpahrang te chung hmang in England cu vawleipi teitu an rak si lengmang. Nihin ni tiang ah UK i politician pawl nih mah hi chiattha aa khatmi tthit-umnak hi phung ningte in an onh rih lo.

Asinain hmai kum a tu tikah ahhin England le Wales ah chiattha aa lomi tthit-umnak cu phung ning tein biakinn le cozah zung ah tuah khawh a si lai. Atu tiang cu 2005 i an rak onhmi civil partnership tiin umtti khawhnak cu an ngei i cu bantuk in civil partnership a simi pawl kha tthit-umnak ah thlen khawh a si lai.

England cu siangpahrang uknak a si i siangnuhrang an ngeih ko bu ah hi bantuk kong hi cu politician pawl nih bia an khiah ding khi a si. Bia an khiah ciami cungah Elizabeth nih a lungtlin pi hna khi a rian a si bantuk in tutan i chiattha aa khatmi tthit-um khawhnak a lungtlinpi i "a ngah ko." a timi hi cozah hruainak phungning te cu a si.

Politics sining tein Underhouse i conservative a tamdeuh nih cun an duh lo i, an doh len. Asinain conservative party hruaitu le UK prime minister David Cameron nih cun chiattha aa khatmi tthit-umnak cu tha a pek, i a dirpi.

Scottland zong ah june 26 ah khan an rak chuahpi tiah The Guardian nih a rak tial. Mah cu phunglam/law ah cun biakinn ah lehthahnak nawl a um hrim lai tinak cu a um lo, ti a si. Aa ning deuh ngai?

UK lawng an si lo, USA le France zong nih chiattha aa khatmi tthit-umnak cu midang nu le pa itthit-um bantuk tein i khahnak pek ding le biakinn ah lehthah hna ding an rak onh ve. Mah hna lakah USA cu an phaisa hmanh ah "In God We Trust" tiah a ttial i Lairam a ceutertu ram zong an si. Baptist an tthawnbiknak ram zong an si. France? RCM an tthawnnak lawng si loin khrihfa tthawnnak ram a rak si.

29 may 2013 ah France nih "gay" tthit-umnak cu a rak onh ve, asinain rammi ting tam ngai nih duh lonak an rak langhter. Atu an president thar François Hollande hi chiattha aa khatmi tthit-umnak onh hna awk ah fakpi in tha a pemi a si.

Barack Obama cu american president vialte lakah "gay" tthit-umnak tha a pek in a dirpi tu hmasa bik a si. Cu lio ah USA i state 13 lawng ah "gay" tthit-umnak cu rak onh a si.

«Pa le pa, nu le nu tthit-umnak cu hnathiang tein ka cohlan khawh ko. Nu le pa, i tthit bantuk in pa le pa, nu le nu aa ummi hna zong hi zalennak le covo an ngei. Fiangte in chim ko ahcun an i dannak ka hmu kho hrim lo, tiah Obama nih ni kum ah khan ABC news ah a rak chim.

Obama nih Africa a va tlawn lio zong ah biapi in a rak chimmi cu Gay covo kong hi a rak si. Cu a tlawn lio bak ah California ah gay tthit-umnak cu onh a rak si ve.

New Zealand zong nih gay tthitumnak cu an parliament ah chuahpi in tu kum april ah khan phung ning tein an onh ve caah vawleicung i ram 13nk gay tthitumnak a cohlangtu ah an rak i chuah ve.

England le Wales cu gay tthitumnak cohlangtu a ram 14nk, 15nk an hung si.

Norway zong 2009 ah khan 2008 i an rak ceihmi gay tthitumnak cu cozah nih a fehter ve.

Pathian tthawnnak le thilti khawhnak, a biaceihnak hi 1600 hlan tiang ah fakpi in minung hna nih an rak zumh. 1700 hnu in minung thilti khawhnak, khuaruah khawhnak le covo te hna a thar in a rak chuah bu ah Pathian a rak i bochan tukmi hna USA, England, France, Norway, Danmark le Sweden ti bantuk ram hna nih Pathian duhnak kal tak in minung zalonnak an le fimnak khuaruah khawhnak an i tlaih cang.

Cu ram pawl ah a ummi Laimi teh, zeidah kan ithim awk a si hnga?