Pastor ka ngei lo. Asinain Khrihfa ka si bantuk in Laimi khrihfabu kip le ka phaknak paoh ah kai pum ko. Cu bantuk in Laimi kan pastorte sining le dirhmun cu ka hmuh khawh tiang khi ka zoh ve ttheo. Cucaah 'Kan pastorte' ka von ti i tulio a lar tukmi Laimi he zong aa tthen kho ti lomi social media ka phanh khawh tawk le kan pastorte tiin ka lung chuak cabia ka von ttial.
Ram tthangcho Europe rampawl, America le Australia i kum saupi tam ngai khua a sa cangmi Laimi tampi hmanh nih social media timi facebook, twitter, skype ti bantuk pawl hi tthatthi in kan hmang thiam rih hna lo, kan i tthathnempi khawhnak a tlawm ngai rih. Khrihfabu chinchin nih cun technology he pehtlaihnak hi a sual ah maw a chiah hnga, vawlei thil a si a ti rua dek a um lo tluk a si.
Kan pastorte zong technology hi an theithiam in an lung a fiang kho taktak theng lo, i kan herhnak nakin a tthat lonak tlawmte theihmi ah an i buaipi deuh ngai in a lang. Technology nih mining sining le nunphung a hun chilh cuahmah kong theih lo zong a palh ngaingai kho.
A tthangcho tuk mi social media kong chim tikah hin kan pastorte hi midang he olzang deuh le kau deuh in i hmu/tong kho hna seh ti duh ah a si bik. Cucu pastor tamdeuh nih cun social media te hna hman ve le caan pek cu zoh a chia, kan limhaang a zor tiah an i ruah ttheo. Social media cu zeiahdek an ruah?
Chan cu aa thlen lengmang bantuk in social media nih hin kan pastor hi atu kan umnak vawlei kong le a chung um minung hna kong theihthiamnak a pek khawh hna. Nan khrihfabu member hna nih zeidah an duh, an i buapi timi siseh an herh taktak mi pawl hi hmuh khawh an si. Tahchunnak ah an facebook status tete zoh zong in ka member nih zeizah a herh timi hmuh khawh a si kho.
Caw-ngia tang ah aa peh
Atu ahcun innkip ah va kal in thla i campiak ti a um kho tuk ti lo. Ahlei in ramdang le khuapi hna um tikah a fawi lo. Cu tikah na member pakhat nih facebook status ah "caminpuai phi ding ka si, ka zenh ngai." ti bantuk a ttialmi na hmuh ahcun "thla ka rak in cam piak lai." tiah na leh i na umnak hmun in na rak campiak khawh cang. Na chimpiakmi a theih hmanh ah a hna ngam kho. Ruahchannak le hnangamnak ngeih hi Khrihfa kan sinak cu a si.
Asinain kan khrihfabu le pastorte nih social media a herhning tluk in an rak dawi duh lo, an i buaipi salam. Mah cu Laimi lawng si lo in vawleicung pastor le khrihfabu tampi zong an rak si ve kong 2011 i Relevantmagazine nih a rak ttialmi "7 Ways Pastors Fail at Socail Media," ah a lang.
Nai hrawng ah kan pastor cheukhat facebook ah hmuh khawh an si cang. Laitlang zong in an rak chuak ve. Asinain a tamdeuh cu an ministry lawnglawng ah an buai khim. An duhmi lawng an ttial i an khrihfabu le khrifa a simi careltu pawl an ruahnak le an dirhmun an zoh bal lo, "carel caan le delete caan kan ngei lo." an ti. An chimrelmi le an cattialmi "Amen" pek le comment pekmi lawng ah an i za ttheo.
Kai pumhnak tete ah siseh, youtube in thawngtha maw phungchim maw ka ngaih hnih khatnak tete ah kan pastorte le evan pawl nih social media hi sawi thlorh in an sawi. Social media hi a tlamtlingmi a si lo. Hmaitonh bia i ruahmi tluk zong in a ttha hlei lo. Asinain a ttha tiah ka ruahmi cu nan khrifabu leng ah a ummi na member le na tuu pawl kong theih hi a si.
Ahnu bik ah "Ka nu ziah kan puantom le kan ihphah he cun pulpit ah kan um?" tiah a fa nih a hal i "Ka fa, kannih chung caah cun biakinn chung lawng ah dawtnak a um." tiah a nu nih a leh tiah phungchimnak ah an chim ttheo tawn bantuk in Pastorte kong hi zarhpi ni chun ah biakinn chung i phung an chim lio bantuk in a leng zong ah member hna nih theih le hngalh piak hi a ttha ve ko hnga lo maw?
Foto: therocketcompany
Comments
Post a Comment