Minung Thanchoter Hi Kan Rian Lianbik A Si

A luancia kum li lio ah community fate pakhat le biaknak lei i hruainak pakhat ah zaanghlei cawi in rian ka rak ttuan. Ka rianbik cu keimah bantuk mino a simi hna le kanmah nak ngakchia deuh pawl tthanchoter a rak si. Zeitluk in kan rak ttuanchoter hna timi ah si lo in, mah cu hruainak pahnih tang ah ttuan ti hlah hmanh ning law minung tthanchonak ding rian hi cu ka si khawh chung in ka ttuan peng ko hnga timi hi, cu rian ka ttuan ti lo hnu in kai fiang.

Khrih nih ro bang a kan vuih tami rian a muru taktak cu minung tthanchoter hi a si, tiah ka ruah i ka zumh. Mah cu thlarau lei mit, zultu mit asiloah zeibantuk lei paoh in ruat ko, asinain a donghnak ah cun khrihfabu le Pathian rianttuantu hna nih cun minung tthithruai le tthanchoter hi a lianbik Bawipa rian ah an chiah zungzalmi a si.

Khrih a hngal lomi hna nih Khrih an hngalh khawhnak ding ah mission rian kan ttuan. Thlarau tlau kan tlaih tikah nifatin Khrih an zumhnak ah a tthawng i a fekmi an si khawhnak ding caah thlarau rawl pek peng le cawmpeng an herh bantuk i an sining hi tthanchoter le thlen a herh. Kan sining peng in si hi thlarau in siseh pumsa zong in Pathian nih a kan duh piakmi a si lo. A tthangchomi si a kan duh piak.

Cu bantuk in vawleicung kan nunchung i kan miphun le Pathian pekmi ram ca zong hi a si ve. Kan ram i thleng seh ti kan duh ahcun a chung um minung kan ithlen hamsa a herh. Ram uktu an ithlen khi ram thlen a si lo. Uknak thlen hi ram thlen cu a si fawn lo.

Aung San Suu Kyi nih "Media lei cu ai thleng tuk nain ram chung minung kan ithleng rih bak lo." a timi pakhat Salai Lairamthang facebook ah ka rak rel. Media sining le phung cu ai thlen ko zong ah a minung kan ithlen lo ahcun ningcang lo in media rianttuannak a chuak ko. A hmangtu minung kan tthancho lo ahcun hi media hi a thlen lawng ai thleng lai i a tthangcho kho lai lo.

Cu bantuk cu a si. Kawlrampi khi uknak, sipuazi le a dangdang mithmuh kuttongh in ai thleng cuahmah nain a chung minung kan ithlen lo ahcun ram tthangcho kan si kho lai lo. Cu ai thlengmi minung le uktu zong kan tthancho lo ahcun kan ram hi kan thleng kho taktak lai lo, timi hi mi tampi nih an pommi a si.

Robert Gross timi pa Lockheed Aircraft Corporation i president hlun nih a kuttang hruaitu pakhat cu tihin bia a rak ruah; "Chuahmi thil (product) pakhat ser cu thil phun khat a si. Bu (company) ser zong hi thil dang phun khat a si ve, aruang cu bu hi minung sasawh khi a si, zeidang a si lo. Mah cu hna sinin a hung chuakmi thil pawl hi anmah minung lila nakin an tthadeuh lo. Automobiles kan ser lo, vanlawng, radios le kedanhri zong kan ser hna lo. Kan sermi cu minung a si. Minung nih thilchuak (product) an ser."

Nihin i zumtu hna kan rian taktak cu minung tthanchoter hi a si. Zumtu thar hna tthanchoter hi a si i, zultu, hruaitu le khrihfabu kan tthanchoter ahcun vawleipi hi kan thlen khawh.

Aa thleng cuahmahmi kan Kawlrampi chung i a siifak bik le a tthancho lobik Lairam le miphun kan thlen khawh nakding ah Lairam chuak minung kan tthancho hmasat a herh. Ram le miphun a sersiamtu ding minung kan ser le kan tthanchoter hna a herh. Ram chung um minung an mit a au i khua hlapi an cuanh khawh a herh hmasa. Cutin a chung minung kan tthancho hmasa lawng ah kan ram le kan nuning cu ai thleng lai.

Mah cu a si lo ahcun atu thlennak chung i a chuakmi tthanchonak cu anmah minung nakin a ttha deuhmi a si hlei lo caah vokpi hmai lungvar thlak ah a cang kho. A donghnak taktak ah cun zeihmanh ai thleng te hnga lo.