2013 kum thawkka hrawng ah Laimi sin i a rak linsa mi cu Chinmi le CNF a kan leirawi tiah Dr. Ngun Cung Lian nih hmailei caan le amah sining iruat in ai thimmi riang kong rak ceih kha a si. Chin miphun chung in bochanmi pakhat a si pinah cawnnak sang a dihmi zong a si caah le kum 20 leng ram le miphun caah rian a rak ttuan caah CNF in a chuah cu leirawitu ah ruah cu kan mawh pah lo. Kan siang lo cu teh.
Zeibantuk ruang le zei dirhmun in CNF a chuah tak i Kawlram ah um in Cozah he naihniam ngai in rian a ttuannak kong hi fiangte in hngalh cu a si lo. Nain kawlca zong in CNF a chuahtak kong le ram chung i daihnak a duh kong a rak ttial "The Voice Weekly" ah. Atu tiang i a rianttuannak bu chung i rianttuannak ah cun a min langhnak hi a um rih lo. (Hmanthlak khi click)
Myanmar Peace Center aiawh in khual a tlawnnak zong hmuh a si rih lo pinah naite Kachin le Kawl kahdaihnak sernak le chawnhbiaknak zong ah amah ai tel hoi lo. Mah tiang cu ka hmuh khawh tawk a si i Bradly Manning kong le Dr. Ngun Cung Lian kong ka pehtlaih bia si lo. Ka tahchunh hna zong a si lo, hei ruah chih awk lawng a si.
Bradley Manning cu American leirawitu tiah taza an cuai mipa a si. "World Power" tiah vawleicung ah tthawngbik le nawl a ngeibik bantuk in a tlongmi U.S.A nih zeisatdah a tuah timi kong biathup ca/document pawl kha zapi sinah a chuahter caah an tlaih i taza an cuai cu a si. Taza an cuai cuahmah lio a si i a sual ti a si ahcun kum 150 leng thong tla ding a si.
Mah cu a chuahter mi document pawl ah ningcang lo in ral tuknak le hremnak (torturs) pawl an um. Cu vialte lakah mah hi video zong hi ai tel i 12. july 2007 ah USA ralkap nih helicopter cung in minung 11 an thah hna lio a si, cu hna lakah ngakchia 2 an rak itel.
Helicopter cung a ummi ahhin pakhat cu Reuter i hmanthlatu a si. Reuter nih mah hi video an thlakmi hi american cozah nih khawika hmanh ah nan chuah kho lo, an rak ti hna caah chuah lo in rak um a si. Asinain Bradley Manning nih vawleipi hngalh ding in a rak chuah. USA le UK nih leicung media/journalist zong hi an rak tlaih khawh dih, i anmah nih thlah uh timi lawng an thlah ttheo timi cu mah hin a langhnak a si.
Mah cu video chung i ralkap pawl nih an chimmi cu; "Oh yeah, look at those dead bastards.” (Oh yaa, zoh khih mithi bator pawl khi, tinak phun khi si.) Mah hi video chung ralkap pawl nih an kahmi hna lakah ngakchia an itel zong an theih ko i an lak i pakhat nih tihin a chim: “Well, it’s their fault bringing their kids to a battle.” (A ttha, ralram ah an fale an von ratpi hna cu anmah palh a si,....)
Manning nih USA ralkap le cozah biathli le biathup thong tam tuk a chuahter tikah USA thil tining le ral an tukning kha fiang ngai in kan theih khawh cang. Wikileaks nih vawleicung cozah pawl nih a thlithup in thil an tuahmi tam tuk an thlah chih ve. Mah ti cun 2010 thawk in vawleicung cozah pawl karlak ah thil zei maw cu a rak i thleng i journalist pawl rianttuanning zong a hun idang deuh ngai.
Zeitin ka bia ka donghter lai ka hngal lo. Asinain Bradley Manning nih hin USA a leirawi maw? timi biahalnak tu cu tuah ka duh. Vawleicung cozah pawl kar le kan vawleipi caah hi a rak tuah mi hi a ttha ko lo hme maw? Asiloah mahhi a tuah ruangah zeidah a chiatnak a um? I ceih cio khawh a si.
Atu cu nikhua ttha tuk i rili kam ah ka va kal tthan lai. :)
Comments
Post a Comment