Tuluk pawl hi Africa hrim ah cun company tamtuk an lut cang. Nichuah lei Europe zong ah hmunhma tampi an lak cang i atu Scandinavia ah luhlinh in luh an i zuam. Cozah nih khuaram tthanchonak caah lam, hlei le inn pawl sak ding a timi pawl ah biatak tein an i cuh ve.
2019 demcember 6. ah lim ding in meter 580 a saumi hlei Beistadsundbrua cu min an rak thut, rian an rak i tlaihmi a si i an lim lo caah tu zarh ah khan cozah nih dan an tat hna i an lim hlan lo ni khat ah Kroner 200000 peng in an liamter hna.
Hi hlei ser ding ah company tampi an rak i cuh, i Tuluk company SRBG nih a man tlawmbik in an i hauh caah an pekmi hna a rak si.
A luancia kum hnih khan an rak thawk cangmi rian a si nain atu cu febuary ah lim dawh in a um.
Hi hlei a umnak khua rianttuantu Jo Bert Brønstad nih "Ka ruahnak ah rianhma kalding an i ruah sual ko hih. Cu ruang ah lungtlinnak kan ngeih bantuk in an dih khawh lomi hi a si." tiah a chim.
SRBG nih cun an lim khawh lonak a ruang tampi an chim ko nain an biakam bantuk in an lim lo caah ni khat i kroner 200000 liam ding cu an al lo. A ruang cu hi hnatlaknak an rak tuah lio ah kan lim lai an ti ni i an lim lo a si ahcun an lim hlan lo hi zat phaisa liam ding timi a rak um caah a si.
2018 ah an rak onmi hlei pakhat zong kan lim lai an ti ni nakin kum hnih deng an tlai caah atu hi phaisa an liam awk a si tiah an ceih cuahmah.
Tuluk pawl nih an hmanmi thilri hi Tuluk ram ah an va ser chom i tilawng in an hun phurhmi a tamdeuh. Inn sangsang siseh a dang tlanglawng lam, mawtaw lam siseh a dang sak/ser khawhmi paoh ah Tuluk company pawl luh a cuh in an i cuh lio a si.
Atu Beistadsundbrua sernak caah thilri a herhmi tonn 3000 leng hi Tuluk ram in an hun ratpimi a si. Tuluk company caah cun a hlawk ngaingai ti a si. Rianttuantu zong Tuluk in an hun i ratpimi an um len ti a si. Europe ah biatak tein dir ding an i timhmi NRK ah an rak chim.
Europe le Norway company pawl nakin Kroner million 41 hrawng niamdeuh in an i hauh tikah cun an pek ve ko hna. Asinain an lung a rak hrinmi cu pheh lo tein hi hlei umnak State nih an chim ve.
Chinram cozah zong Chinram tthanchonak ding ah cun fekte in upadi ah dir khawh le, hnatlaknak chung ah a herhning in rianttuan ding hi a biapi tuk. Chinram ah rian tampi lim huaha lo, a phungmen in ser/sakmi inn, Lam le tilaknak tibantuk a um lengmangmi zong hi cozah le parliament tthumi hna rian taktak cu a si ve.
A i tiam ni ah lim ding lawng si lo in an rian ttuanmi a tthat le ttha lo tiang zoh piak an si.
Vawleicung Ah Norway Passport Zeitluk Ttha A Si?
Foto: NRK
Comments
Post a Comment