A Har Tukmi Thimnak [elections] Kum: 2020 hi USA president thim kum a si. American pawl nih Donald Trump hi kan thim ko tiah an fehter lai maw, asiloah lam thar dah an i thim lai? Mahhi a phichuak cu American a si lomi hna ca zong ah a biapi ngaingai.
"POLITIK Fianternak" Laiholh tein Amazon ah eBook in rel khawh a si.
Pumpak in leicung nawlngeihnak sangbik a ngeitu hi Washington DC i White House ah khua a sami USA president khi a si. Vawleicung a thangcho bik Tuluk khi a thancho ning a rangtuk ko, cun Russia zong ralkap thazang le hriamnam aa serh taktak bu ah USA cu a hram fektuk cangmi a sipuazi le a lianngan tukmi ralkap thazang ruang ah vawleicung politik pi cu a duhduh in a tuah khotu a si rih. Cucaah USA thimnak cu a biapi tuk. Lai khuate a ummi siseh khawika kan um paoh ah a tlawm le tam in a kan nawnnok khawh ve.
USA thimnak kong ah biahalnak leh ding a tam ko.
Pakhatnak ah Donald Trump sualphawtnak [impeachment] hi khawizei ti le tlang dah a phanh lai? Senate ah Republican an tamdeuh caah zeihuaha cu si dawh a si lo in ruah a si kum dongh tiang cu Trump hi president a si rih ko lai. Mah nih hin Trump hlawknak a pekdeuh lai tiah zumh a si. Zei a si hmanh ah democracy ram pakhat nih an president sualphawt in tthumh an duhmi hi cu thil sawsawh a si lo tiah Atlantic a ttialmi hi rel a phu ngai.
November 3. i US president thimnak ah ahopaoh nih teinak hmu ko hna seh, a fiangmi cu USA hi fak le fiang tuk in aa tthen lai tiah fimthiamnak le khuaruattu hna nih an zumh.
February in cun biatak tein Democratic pawl an cawlcang lai. Democratic in president aa cuh ding thim an har ngai lai, nain Poll in siseh media nih an zumhbikmi cu kum 30 USA congress a lut i Senate saupi a ttuanmi, Vice president a rak simi Joe Biden (77) hi a si. Cun nu vote tampi a hmu kho tiah ruahmi le Elisabeth Warren le socialist a simi Bernie Sanders zong kum 70 an luan cang. Mino an um lo.
Democratic pawl nih heh tiah president i cuh ding an i zuamcawh lio ah Trump le Rep. party pawl cu zalong tein vote kawl cawlcangh caan an rak ngei lai. USA i company pawl, mirum pawl le chawlehtu pawl caah a har tukmi thimnak kum a si lai.
President thimnak ahhin ram chung nakin International buainak/kong nih lai a rel ngai te lai tiah ka zumh. Biana ah 2020 kum thawk zarh bak ah USA president nawl peknak in Iran ralbawi ngan thah a si. North Korea zong Trump aa ruahning in an um lo. Tuluk nih thlanglei Asia rili cung ah ralkap dinhnak tikulh a ser cuahmah. Russia nih rocket le Atom-bomb a ser tharmi USA caah ralrin a herh taktakmi a hun si tthan. Iran kong nih hin Trump president a tthawngter chin lai maw, a derter lai timi cu caan sinah a lang lai.
USA president thimnak lawng a si lo, ram tam ngai ah thimnak an tuah kum a si. Union of Myanmar caah a biapi tukmi thimnak kum a si ve lai. NLD nih phunghram remh in Vote an kawl lai, asinain thimnak ah 100% an tei zong ah Parliament ah 75% lawng an si lai, i zeiti hmanh in an remh kho lai lo. Cucaah tlangcungmi hna nih an kong an i thlak khawh nakding, an miphun politik an dirpi khawh nakding caah zeitindah kar an hlan lai i Union of Myanmar politik ah zeibantuk thlennak dah an chuahpi lai timi biakhiahnak le duhthimnak kum a si ve lai.
A dang cu:
1.) Madrid i tuahmi a hnubik Climate Conference nih mi tampi a rak deuh hna. Tu kum november, Glasgow ah an tuah tthan lai, i zeibantuk biakhiahnak dah an tuah lai?
2.) December 2019 i Hong Kong buainak cu aa pehzul rih ko. Tuluk nih zeitindah khua a khan piak hna lai? Mah hi Hong Kong buainak nih tu thla Taiwan cozah thimnak zeimaw a hip khawh ngai ti a lang cang.
3.) Vawleipi chawleh le khuasaktintuk a tthancho cuahmahmi hi a dir in a ttum lai maw? Tuluk - USA chawleh ral ruang ah aa ttum khomi a si. Cuti a si ahcun leicung sipuazi thawngbik ram pawl nih khuasaktintuk an i sumren a herh lai i politik/ramkhel kong thlennak a chuahter khawh men, thil/zinan man kai in ram chung buainak tibantuk....
4.) Iran ralbawi thah ruang lawng ah a si lo, Middle East ram pawl ah nawlngeihnak i cuhnak, ram khat le ram khat i ertaunak degree a sang chin lengmang. Turkye nih Syria cozah a luhhnawhmi te hna, cun Syria ram chung ral hrim a dih rih lo. Kum khat chung ah thimnak voi thum tiang a tuahmi Israel zong Iran nih a ngiar ceomo. Cun an prime minister Netanyahu zong eihmuar kut in a luat khawh nakding ah ral thawh zong a ngamhmi a sinak a hun lang.
5.) Brexit hi january 31. ah a cang lai tiah ruah a si. Chuah colh a duhmi Conservative nihfak ngaiin an tei caah a cang kho ko. Asinain UK tthencheunak zong a chuahpi khawh bantuk in EU member a si lomi pawl caah sunghnak a chuahpi khawh fawn tiah an tuak.
6.) Putin nih amah chawngtu ding asiloah a mizumh a thim lai maw? timi hi 2020 vawleipi nih a cuanhmi a si ve lai tiah Aftenposten nih cun a ruah.
Chim ding a um len rih men ko lai. Asinain kan vawleipi hi aa thlen a rang tukmi a hmun lomi a si zia kha kan theih ciomi a si. 2014 ah khan ahohmanh nih ISIS kha mahtluk in an tthawng lai tiah an rak ruat lo. Donald Trump kong ceilak ka hun ttial nain kan hnu thimnak ah khan amah cu president ding ah duh le uarbik a rak si naisai lo.
__________
Down ot Earth nih 2020 i kan ton ding thil pasarih a ttialmi hi relphu ngai a si.
Foto: Zimbio
Cc: Forbes, E24, Nettavisen, Aftenposten
Comments
Post a Comment