"Iran nih nuclear a ngeih lonak ding ah a herhmi paoh ka tuah lai." tiah USA president Donald Trump nih a chim lengmang. Mahhi president thimtik ah biapi in aa tlaih ding a bia pakhat ah aa tel. Cucaah Iran nuclear dirhmun tlawmpal in Laica lawng rel khomi caah siaherhnak he ka hun ttial.
2015 Iran Nuclear hnatlaknak an rak tuahmi hi sawsawh a si lo. Hi hnatlaknak ah Iran nih a lungtlinmi thil pawl hi nihin Iran nuclear a ngeih khawh lonak pakhat a si. A ruang cu hi hnatlaknak min an thut kum ah Nuclear sernak ding i a herhmi thilri tamtuk a rak sung, an rak chuh khawh.
Iran nih Nuclear sernak i a biapi bik a simi Uranium cu zat, kha zat lawng ngei seh ti minthut chih a rak si. Iran nih Uranium Kilo 10000 a rak ngeihmi cu 2015 hnatlaknak ning in USA le ram dang nih Iran in an rak chuahpi, phundang in chim ahcun an chuh. Ni kum november i UN nih a chimning ah Iran nih Uranium cu Kilo 551 hrawngte lawng a ngeih cang.
"Iran nih nuclear bomb a ser khawh nakding caah low-enriched Uranium 1050 a herh." tiah The Ploughshares Fund i an president Joe Cirincione nih Foreign Policy ah a chim.
Uranium hi Nuclear a thazang lawng a si. Tamdeuh an hman si le a thatthawngdeuh ve, i kaudeuh, fakdeuh in a puak lai. Asinain a biapi tukmi Iran nih a ngeih rih lomi cu Nuclear a puahter khotu "explosive" thilri hi a si, an ti.
USA president Trump nih 2015 Nuclear Deal in kan chuak a ti khawh tlawmpal ah Iran cu Germnay, UK, France, Russia le Tuluk nih Deal chung um rih ding in an chimh ko nain a ral lianbik a simi USA nih a chuah hnu cun hi Deal cu a caah zeihmanh a si ti lo ah a cang. USA nih hi Deal a hrawh cu a rawk cang tinak a si ko i a rannak in Nuclear kan ngeih lai, tiah vawleipi theih in thawng a thanh ve.
Iran hi a ram chung ah nuclear sernak i a herhmi Uranium a chuak. USA le Israel nih Iranian nuclear scientist tam ngai an thah piak cang hna tiah ka rak ttial cang. Asinain Trump nih zeitluk in phihnak tuah hmanh sehlaw 2020 a dih ahhin cun an ser khawh ko lai tiah Experts nih an zumh ngai.
A ruang cu Iran hi Tuluk sin in thil tampi a hmuhmi a um. Tuluk nih Nuclear cu 1970 in khan a ngeih diam cang i Pakistan i nuclear-expert pakhat sin in Iran nih Atom-lu/par serning kha hmanthlak le ca in an lak khawh cang caah mah nih cun tampi a bawmh hna lai, tiah an ruah.
"Iran nih Nuclear a ngeih cem ah pakhat a ngeih a si ahcun a rauh hlan ah Saudi-Arabia nih a ngeih colh ve lai. Israel nih a ngeih cang caah Iran hi ralkap thazang tthawng a si hlei hnga maw?" tiah tiah American ralbawi hlun John Miller nih Foreign Policy ah biahalnak a tuahmi cu "Naisai" tiah amah lila nih a leh.
USA nih 1945 july ah Uranium in serhmi hriamnam cu an rak hneksak i thla khat a rauh hnu ah Japan i khua ngan a simi Hiroshima ah an rak hman. Cu a si caah a herhmi thilri le a serthiammi hna an um ko ahcun cikhat te ah ser khawh a si ko an ti.
Zohchihmi: NYT & Mehrnews & NRK
FOTO: MOHAMMAD BERNO / AP
Watch dress code Wish
Comments
Post a Comment