Tu zing lawng Zalen nih ICJ kong Cheery Zahau intervio ka rel. A hmasa ah amah hi ka vun thangthat: nusal, mi za rori a si. A dirhmun ah fekte in a dir ngam. Pasal aa timi online-tama tamdeuh nih kan tluk bak lo, thlihrannak lei paoh ah a khun lo.
Kawlram ah ralkap nih 25% an ngeih ti khi zapi theih a si ko. Hmailei zong ah theih peng ding a si. Party pakhat 75% bak Union parliament ah an tlin zong ah 1% an bau peng ko lai. Cucaah Suu Kyi cu Authority 100% a ngeih lo kan theih ko i, nain "MORAL Authority" a hman khawhnak hi a lam le a hmun a tam tuk.
Tutan i a kalmi zong amah theng an au lo, asinain Rohingya kong ah Moral Authority a rak hmang lo, aa neh ve ralkap (puhmi) tuahsernak kha, cozah a tlaih caah. Ralkap nih ramri thianhnak asiloah ram an kilnak ah ningcang loin mi thah, mi dawi le hrawhnak an tuahmi kha Cozah a tlaimi nih thlauh le mawhchiat um lo in tha a pekmi fiangte in a lang ko. Cucaah Nobel Peace Prize hmu balmi pasarih nih Suu Kyi hrimhrim hi "Criminal acountable" in ICJ nih sual a phawt ding a si, tiah ca an chuah.
Tu chun hi Nobel Peace Prize an pek ni a si. a luancia kum 28 ah Suu Kyi an rak pek ve. Mah ni december 10. theng ah minung covo a buarmi, thisen a chuahtu le miphun cihmih a zei poilomi hna ICJ ah a dirkamh hna. Norway media NRK le covo/daihnak lei rianttuantu hna nih cun "International i a min cu ruakkuang ah thir aa khenh chih ko cang." an ti ve.
ICJ a rianttuannak ka blog ah ka ttial cang. Suu Kyi pumpak hi taza an cuai kho lo. Cun, tutan ICJ i tazacuainak hi Myanmar rampi le mi vialte cung ah a si lo, nain Myanmar cozah (ralkap cozah lio in) nih international le UN ah min an thutmi ning in rian an ttuan lomi ruang ah a si bik. Cucaah tutan Suu Kyi a kalmi hi an tlaih beh ding zong a si lo, bia an chah colh khawhmi zong a si lo caah Myanmar i zeithei lomi tampi sin ah a politik cawlcanghnak ah bawmtu a si lai tiah ruah a si. Ralkap a bawmh hna timi nakin rampi hruaitu a sinak le nucan-pacan i a dir tiin hmuhpiak (silhnalh) a si ding hi Suu Kyi aa fiang tuk.
Dr. Salai Ngun Cung Lian nih "ICJ hi biaceihnak hi kum 10 leng, theih lo cun kum sawm in a rau khomi a si." a ti. ICJ nih 2005 in biaceih a thawkmi atu tiang bia a chah khawh rih lomi a um ko. Cucaah NLD le Suu Kyi nih ICJ hi anmah hlawknak zong ah an hman khawh ding a lam a um. NLD fans nih Suu Kyi a kalmi an i fian ning le an biameilah in tampi a hun lang cang. ICC tu nih cun pumpak minung a tazacuai in tlaihnak nawl a ngei. Asinain Myanmar hi ICC chungtel a si lo, ka cauk #Politik zong ah a lang.
ICJ nih fiang tein Myanmar a sual biachah khawhnak a um lo hmanh ah International ah Suu Kyi min a nak cang, an zumhnak a dih cang. Cu nih a zulhmi cu Myanmar Boycott le siipuazi phihnak tuahte an si. Atu zong ah Rights Groups nih an hal cuahmah cang.
Myanmar Justice Minister kal loin Suu Kyi tu Foreign minister dirhmun cun aa thawh ko nain a duhnak taktak cu politik a si ko. Amah kal lo in a ngah tukmi a si. NLD nih 2020 hi an i zum tuk ti lo, i cucu Kawl (tlangmi si loin) sinah zeitluk indah ka biapit timi a langhternak a si i Tlangmi cheukhat zong hui khawh chung in hui aa zuammi tu a si. Thant Myint U nih cun "Suu Kyi a kal thengmi hi 2020 thimnak caah politik a tuahmi a si kan ti ahcun kan palh tuk lai lo," a ti. ##
Relchih te: ICJ ah rianttuanmi International Law ah professor zong a simi Michael Becker intervio, BBC ah Myanmar tazacuainak phun 7,
__________
Information le kan theihmi a tlawm caah Halkha te hna, kan Chinmi biaknak lei zong nih Suu Kyi dirkamh an ummi hi a si ko i hopalh hmanh a si ah ka ruat lo.
Comments
Post a Comment