ICJ Tazacuainak Kong CNF Le Chinmi Dirhmun

Tu chun in Daw Aung San Suu Kyi cu UN biaceihzung ah a dir cang. Gambia nih Organisation of Islamic Cooperation (OIC) aiawh in miphun pakhat cihmih kong in Myanmar le ralkap taza a cuaimi a si. December 10. hi a luancia kum 28 lio ah Suu Kyi nih daihnak laksawng a rak co ni a si fawn. Hi daihnak laksawng an rak peknak  aruang cu minung covo caah le thisen si lo in daihnak in rian a rak ttuanmi ruang ah a si.

Asinain 2016 in uknak nawlngeihnak a hun tlaih tikah Myanmar ram chung mibu pakhat a simi Rohingya pawl kong ah thisen a chuak. Cu lawng a si lo, a ttuantti hawi ralkap nih an thah i an hrem han pinah an tlaihhrem hna, an dawi hna i 2017 ah minung sing sarih cu Bangladesh lei ah an rak dawi hna. Lampi ah a thimi zong an rak tampi. Mah hi Gambia tazacuainak kong taktak cu a si.

Zeibantuk indah Daw Aung San Suu Kyi, "democracy le peace Icon ka si lo, politician ka si." aa timi nih a leh hna lai i zeidah a phichuak a si lai timi hngalh a si rih lo. Amah belte tutan i ICJ ah an kalmi hi amah theng sawm le auhmi a si lo, Rohingya kong ah amah aa tel caah politik a tuahnak a si, tiah tuzing Mail & Guardian article ah aa ttial.

Hi tazacuainak kong ahhin Dothlennak a tuahmi tlangcungmi hna dirhmun kan zoh a si ahcun ICJ le Gambia dirpinak an langhter cio hna. Chinmi belte cu hlan bantuk in kan aw-aan a chuak lo. Ram chung ah cun cozah siseh NLD party zong nih Suu Kyi dirkamhnak phunphun an tuah i Halkha zong ah lamzawh in dirkamhnak an tuah.

Kum sawmthum leng dothlennak a tuah cangmi Chin National Front (CNF) dirhmun zeidah a si tiah socialmedia ah mipi nih kan cuanh hna caah CNF cu pehtlaihnak kan tuah hna i an party min in cun lehnak an kan tuah kho lo i NCA minthumi hna a hnubik an itonnak ah Statement an chuahmi ca hi kan dirhmun a si ko, tiah an hun kan kuat.

Decemmber 4. 2019 i NCA minthumi hna nih an chuahmi Statement 4.nak ah: "Republic of Gambia nih ICJ ah Ramkomh bu Burma taza a cuaimi cu Myanmar cozah ttuanvo le ttuanvo a ngeihnak, a dikmi le dinnak caah a si. Ramkom bu Burma nih ramkipfonh bu hna he a ngeihmi hnatlaknak, ttuanvo aa khinhmi biakamnak hna le a rannak in caan sau a nguhmi ramchung remdaihnak kan ser lai an timi hna cu vawleipi hmai ah fekte in an dirpi ding a si." tiah an ttial.

CNF nih an party ca chuah dangte in an tuah lo. Cun cu hlan bantuk in ramkip a phanmi Chinmi hna nih Community in siseh CNF rianttuannak zong in an umnak ram le Kawlram Embassy ah aw-aan chuahmi a um lo.

Chin Human Rights Organization (CHRO) zong pehtlaihnak nih biahalnak an kan let rih lo. ICJ kong ah an dirhmun cu hngalh a si lo nain Rohingya pawl kong ah cun an si khawh tawk in an rak chimrel ve ti hmuh khawh a si.

Myanmar nih Rohingya cung i a tuahmi pawl kha UN le covo bu pawl nih an khawmhmi hmang in Gambia nih taza a cuaimi a si ko caah Suu Kyi ttanh le ttanh lo, ICJ ttanh le ttanh lo nakin biadik an hmuh le hmuh lo hi biapi a si te ko lai, tiah CHRO in Salai Sang Hnin Lian nih a chim.