UN Hnatlaknak Tello In Syria Kah Cu Tihnung Ko

Syria kong hi Bible nih a ttialmi a um ngai. Cu bantuk in Israel he ni ruk (Six-day war) chung an rak i phomh i Syria cu a rak fak ngaingai bal. Asinain atu Syria cozah nih a hrawh mi khua le a thahmi a minung tluk hin cu a rak si rua lo. Bible bia a si an rak ti ve ko, kha lio ah khan. Cucaah vawleicung sining in le ram kip pehtlaihnak mit in cuanh ttheo a hau.

A caan lio a si caah le hi ral an tuk a si ahcun Europe le America um Laimi tiang nih chawva/economy lei in kan rak tuar tuk ve ding (atu hmanh bensin man van a tawng.) a si caah thawng ttha lei panh hnga maw tiin thawngpang ka dawi ve tawn. Zei ka tuah khawh lai tinak cu a si lo.

UN theihpinak tello in USA nih Syria a tuk a si ahcun Syria nih mahte in runvennak nawl a ngeih lai i a naibik ah Iran nih Syria bawmhnak ding rian (duty) a ngeih ve. 

Hika ah ka tial cang bantuk in USA nih a ralkap le hriamnam cu Syria ram pawng ah a toh cang hna. Gas/siivai hmang i rammi a that tiah ruahmi Syria cozah le a ralkap phur ding ah ai timhmi a si. Cuti USA nih UN hnatlaknak tello in ai timhmi cu Russia a lung tling hrimhrim lo i a raltuknak tinbaw he ralkap tamlak te Syria kam ah a chiah colh ve.

President Putin cu USA nih UN lungtlin lo in Syria a tuk ding kong an hal tikah "Si, kan bawmh hna lai. Hriamnam kan icaw, chawlehnak ah kan ttuan tti caah bawmh a haumi Syria rammi (USA le nitlak ram hna nih an kah hna tik i a temtu) cu ka bawmh hna lai, tiah a chim.

P2 (radio) ah NUPI i Russia kong hlaithlaitu Julia Wilhemsen nih "Russia nih atu i Syria rammi chawva/tirawl in a bawmhmi leng hin ralkap thazang cu USA sinah a hman theng lai ka zum lo." tiah a chim. Russia nih USA he ikah kha a duhmi a si lo, a duhmi cu Zinan a si, i a nawlngeihnak kha langhter a duh.

Atu tiang i Syria cozah a him khawhnak cu "International Right" lawng a si. UN theihpinak tello in american nih a tuk a si ahcun international law buar a si lai, tiah International Law and Policy Insititute ah hlathlaitu a simi Cecilie nih fianternak a tuah rih.

Nihin "international law" ning ah ram pakhat nih ram dang pakhat kha UN theihpi/hnatlaknak tello in a chimhring/kap kho lo (dan a tat kho lo.). UN SC i lungtlinnak tello in an kah a si ahcun, Syria nih a duhmi hriamnam phun vialte hmang in siseh a si khawh chung in irunvennak nawl a ngeih. Cuti a si tikah Syria ralkap nih ttanpi hawi an ngeihmi ram bawmh halnak nawl a ngeih. Iran hi Syria nih a naibik hawi le ibawmh ding hnatlaknak a ngeihmi a si i Syria bawmh ding a rian (duty) a si.

Atu kong ah USA hi zei ram hmanh nih bawmhnak nawl an ngei lo, UN phung ning in. USA hi UK maw France maw Canada nih bawm sual seh law, anmah zong UN phung le International Law a buarmi an si, tiah Cecilie nih a fianh fawn.

Cung i kan chim cang bantuk in Russia nih fiangte in a hngalhmi cu Syria an tuk ahcun Iran nih fak tuk in a lehrulh hna lai. USA nih Syria cozah thil tuah kham duh ah tuk a si lai nain thil dang tamtuk a chuahpi lai ti hi Iran aa hrocernak in a fiang "Syria an kah ahcun, Israel nih a tuar hmasa bik lai." tiah Iran i nawlngeitu pakhat nih fiang ko in kan hnu zarh ah a rak chim cang.

Cucaah USA nih Syria a kah ding cu ttih a nung taktakmi a si. Mah hi ral ahhin Syria le USA lawng an itel lai lo, bawmtu le hawikom ngei cio an si bantuk in an i neh* dih hna lai. American pawl bia lawng in bia a tlu kho lo. Syria hi ram tampi nih an ngiat (zinan le a dangdang lei a miak?) caah atu dirhmun hi ttih a nung taktakmi a si, tiah VG-news ah Syria-expert nih a chim.

USA nih Iran le North-Korea hrocernak zong ah cang seh, an timi bia a um fawn tikah Iran lawng a si lai lo, Al-qaida nih Syria hi bawm lo in a um hrimhrim fawn hnga lo. Iran le Syria i bawmh in USA lawng hi phomh hna seh law cu zeidek a va lawh hnga? Nain Iran nih USA i a humzual pengmi Israel phomhnak caan rem tiin Israel cu a kah tak men hnga. Palestine hi teh a um sawh lai maw? Ruah khawh pah a si men lai.

Cucaah UN hnatlaknak itello in Syria tuk hi USA rammi le Europe ca lawngah si lo in "ralpi 3nk" chuak sual lai tiin ttih a nun tukah thin idomh le thlacam tthawn a hau ko hnga.