Christmas hi mi tampi caah lunglawmhnak le a sunglawimi ni a si. Christmas ahhin ahopaoh i lawmh kan duh caan a si. Dawh tukin ttamhmi inn le khua hna, a thawng aa dawhmi ringawn hna he, cun zumtu he zumlotu he zapi dinh caan a si i mi lung chung ah lawmhnak le nuamhnak caan a si.
Duh a nungmi caan a si khawh bantuk in Christmas hi mi tampi caah caan har le lunglen thla zong a si ve. Christmas caan thilri tthattha aa cawk kho lo, Christmas zing thaithawh hmanh lungre thei in a ummi hna caah mah ni cu zeitindah a sunlawi khawh lai? Christmas caan ahhin a liam chungmi nu le pa, nu le nau, le tefa hna hlam le ruah caan an si. Chungtling lomi hna nih Christmas ah lungleng in zeitindah an caah lawmhnak ni cu a si khawh hnga?
Christmas cu mirum hna caah a si tiah a ruatmi zong an um ko lai. Ngakchia caa a si, a titu zong an um ko lai.
Christmas ah hlaan lio caan hna mitthlam ah an cuang. Ngakchiat lio caan hna ruah a si. Kan hung upa i maw a si, Christmas hi rian/zungkhar pakhat bantuk ceo in kan i ngaih cang hna. Hlan bantuk in kan i ngaih in kan i nuam kho ti hna lo tiah kan kum a hun tamdeuh hnu in kan i ruah tawn hna. Hlaan lio caan kha ngaih a si.
Christmas ah kan i lawmh khawh tilo, kan i ngaih khawh tilomi hi kumkhua ruang ah a si lo tiah ka ruah.
Ngakchiat lio ah Christmas kan rak i lawmh khawhmi, kan rak i ngaihtukmi cu kan lungthin a rak thian caah a si. Ngakchia thinlung ah Christmas thawngttha hi lungawttawm ding a um lo bantuk in zeibantuk lungretheihnak hmanh an ngei lo. An ruahchannak cu Jesus a chuahkate i tuukhal hna sinah aa langhmi Vanmi hna bia "Nan khamhtu a chuak cang." timi ah khan an burh khawh dih. Nu le pa thihtakmi hna hmanh nih naute Jesus thawng in kan itong tthan lai tiah lungthiang tein an i ruahchan khawh i Christmas ah lawmte in hawi sin an chuak kho.
Jesus nih a hmasabik a chimmi thawngttha le cawnpiaknak ah "A lungthin a thiangmi cu lunglawmmi nan si, zeica tiah Pathian kha nan hmuh lai." tiah a chim. A lungthin thiangmi hna nih naute Jesus nan hmuh lai, nan chungah a chuak lai.
Christmas caan ah chungkhat rualchan zuun ngaiin, a lilengmi tampi nan um ko lai. Chawlehnak ah an hmanmi Christmas caan ah duhherh hmanh i cawk kho lo in mi sin a chuak lang ngam lomi an tampi men ko lai. A ruang tampi a um kho, Christmas hi huat a tlai, dihzok seh ti a duhmi an tampi kho fawn. Khrihfabu ah i hmuhthiam lonak ruang ah, sang le zawl ah i theihthiam lonak ruang ah mithmai ttha i hmuh khawh lo ruang ah Christmas hna aa lawm kho lomi um khawh a si ko.
Sihmanhsehlaw, Christmas cu zung/sianginn/rian khar ni sawh a silo ti hi kan lung ah chia hna u sih. Mah caan hi ngaihchiat le lilen caan lawng a si tiah ruat lo in Christmas hi ka caah a herhmi a si maw, zeidah a si ti ruat hna u sih. Kan lungthin kutka ong cio hna u sih law, a kan khamhtu naute caah a thiang i a tthami hmun kan pek a si ahcun Christmas hi vawlei thilri lawng in i lawmhnak a silo zia, lunglen thla lawng a silo ning kha Khrih thawng in kan cohlan khawh ko hnga.
Jesus nih "Vancung pennak cu hi ngakchia tete hna bantuk ta hi a si." a ti bantuk in Khamhtu a chuah thla le ni ah ngakchia bantuk in Khrihfa Jesus kha kan lawmh khawh i kan don khawh cio a si ahcun sullam a ngeimi Christmas a si hrimhrim ko lai tiah zumhnak ka ngei.
Christmas cu lungawttawm lo tein le lungthiangte in naute Jesus a cohlangtu hna ta a si ko.
Pathian nih thluachuah in pe ko hna seh. Nan zate cungah Christmas lawmhnak tlung ko seh.
Comments
Post a Comment