Dr. Denis hi Congo miphun siibawi a si i Belgium ah nuam tein a um kho ding a si. Congo ah mizaw tampi a thlawp hna, a bikin ralhrang, mi tthalo le ralkap nih tlaihhremmi nu pawl an thinlung, tlaihhremnak i an hrawhpiak hnami an chiattha le an zawtnak fihnak le nautatnak um lo tein a thlawp hna i a hnu cun a nunnak tiang tlirhkhonh a rak si caah Belgium ah a rak kir taktak ko. Sihmanhsehlaw, Congo in bawmtu ngei lo nu hna nih ca an kuat, sii-inn le sii thlawpnak caah a herhmi a tlamtlin khawhnak ding caah rian fakpi kan ttuan lai, atu zong kan hlawhmi kan khon i na hung kir ahcun kan i lawm ko hnga tiah an nawl. UN zong ah bawmhnak an halpiak. Cu tikah khua a ruat i ni khat i dollar 1 he lawng a nungmi nu hna nih mah tluk an ka cah cu tiah a nupi le a fale a kirpi hna i atu cu kum 20 hrawng si cang, tlaihhremmi nu pawl thlawp in a caan a dih.
Mah cu caah cun ralram a bikin tu chan ah ral nih nu tlaihhrem hi raltuknak Strategy ttha tuk ah an chiah cang. Cu ti ralram ah a nunnak hmanh thap in nu hna caah rian a ttuannak cu UN siseh siibawi dang le bu tampi nih an theihpi caah Nobel Peace Prize a co hi a si. Hi kong cu Facebook page ah ka ttial pah cang i rel khawh a si.
December 10. i a chimmi bia cu a ropui, hmual a ngei taktak i mitthli tamtuk a tla. Norway siangpahrang te chung an ttap. Mipi an ttap dih ngawt. A tuanbia ruah ah lung a su tuk. Cu lakah Sarah kong a chimmi te cu tihin a si:
,... Upatmi nu le pa, daihnak hawikom hna,
Tunai kan hmuhsakmi hna hmanthlak (a chimmi kong) cu a si taktakmi muihnak cu a si. Nain Sarah tuanbia hi kan chim hna lai.
Sarah cu sii-inn an phakpi ah amah le mah aa hngal lo. Hriamtlai phu khat nih an khua an hrawh dih, mi tamtuk an thah hna i a chungkhat vialte an thahpiak, amah lawng a taang. Sarah cu an tlaih i ramtang ah an luhpi, cun thingkung ah an hren. Taklawng in. Sarah cu an bu ning in chun he zan he an tlaihhrem i a lungfim lo tiang cu an tlaihhrem.
Hriamtlai hna nih ral an tuknak ah tlaihhrem hi hriamnam ah an hman i an ral hrawhnak ding ah an hman. Nu pakhat an tlaihhrem cu an hrawh a si, a chungkhat le a pawngkam zong an hrawh hna he aa khat. A tawinak cun kha zatlang khuasaknak ningpi in an hrawh tinak a si.
Sii-inn a hung phak ahhin Sarah cu lam a kal kho lo i a ke in a dir hrim zong dir kho lo. A zun zunnak zong aa sim kho lo (a control kho lo.), i a zunpi zong a sim kho lo (An tlaihhrem ah hnu he hmai he a si.). Cu tikah a chiatha rawhnak ruang le khawndennak ruang ah a hma cu an por, i hohmanh nih ni khatkhat ah a ke tein a dir in lam a kal tthan lai timi kan rak ruat kho lo.
Cuti cun, ni le caan an liam. Sarah mithmai ah nunnak hi a sung-pe lo in nun peh duhnak a lang. Ni tin hi amah a thlawptu pawl thapetu le hnemtu cu amah lila a hun si, i ruahchannak thlau hlah u mu, tiah a chimtu cu Sarah a si.
Tuchun ah cun Sarah cu aa dawh tuk, a mirh, a thazang tthawng i nu duhnung ngaingai a si.
Sarah nih lungthlehnak a ngeihmi cu amah bantuk harnak in a luatmi hna bawmh ding hi a si. Sarah cu nu hna anmah tein i cawmnak le dir tthan khawhnak caah kan tuahmi Dorcas Transit House bawmhnak nih US dollar sawmnga an pek.
Nihin ah cun Sarah cu amah pumpak chawlehnak fate a tuah cuahmah. Hmun fate a cawk. Panzi Foundation nih camphio an cih piak i inn fate aa sak. Amah te in zalennak a ngei i aa lungsak tuk.
Sarah tonmi nih a kan hmuhsakmi cu zeitluk har si ko seh, cun ruahchannak a um ti lomi dirhmun zong si hmanhseh law, fek tein dir le lungthlehnak a um tikah ruahchannak cu khatlei ral ah a rak um zungzal ko timi a si.
Mah hi Sarah tuanbia cu a si. Sarah cu Congo miphun a si. Asinain Central African Republic, Colombia, Bosnia, Myanmar, Iraq le ram tampi i donak le ral a umnak kan vawlei ahhin Sarah dang tampi an um rih ee.
Sarah bantuk minung nih a sung-khan lo a si ahcun, zeiruang ahdah kanmah pawl nih cun ruahchannak cu kan hlawt lai?
____
Mah ahhin amah he laksawng aa tthenmi Nadia Murad timi Iraq nu a um ve i amah hlan ah bia a chim. Nadia hi ISIS nih an tlaihhrem hnu ah thong ah an chiah i an duh caan paoh ah sualpi mi Sex-sal ah an hman. Cu hnu ah mi dang sinah Sex-sal caah an zuar i ruah lopi in a luat khomi a si.
,... Nadia chimmi kha kan theih cang. Dawtmi Nadia, na lungtthawnnak, na raltthatnak, ruahchannak a kan pe khotu na sinak hna hi keimah pumpak siseh Vawleipi caah zohchuntlak le thazang laknak na si,...
tiah a bia cu a hun peh i a rianttuannak le nihin kan Vawlei, an ram Congo nih a tonmi kong pawl peh thluahmah in minit 25 hrawng Nobel biachimnak a rak ngeih.
A chimmi dihlak cu www.nobelprize.org ah rel khawh a si.
Facebook Page LIKE le FOLLOW tuahmi nih cun rangte in ca nan rel khawh lai.
Comments
Post a Comment