"Ngandamnak ah" tiah hawi he zuu an din lai paoh ah Russian pawl nih an chim ta tawn. Vawleicung i dinbik a simi zuu cu Vodka a si, i Russia lei chuak a si. A kih tuk caah Vodka cu an din tukmi zuu phun khat a si, nain a buaktlak in mi tamdeuh nih zuu an rak din.
Asinain an hung fimdeuh, hlathlainak le ngandamnak he pehtlai in thil an hung theihdeuh tikah zuu hi pum caah a ttha lo ti fiang tein a cohlang mi an hung tam cang. Russia ah zuu an din kum khat hnu kum khat in a tlawm chin lengmang. A bik in mino hna cu hlan chan (an pa le, an pu le) nakin zuu an ding lodeuh cang.
Russia Khrihfa Thawknak Le Zuu
988 kum ah Russia siangpahrang fapa Vladimir nih Orthodox Khrihfa biaknak hi an ram biaknak caah a rak i thim. A ruang cu biaknak dang vialte he aa lawh lo caah a si, i cu aa lawh lonak cu zuu din a khap lomi hi a si.
Prince Vladimir nih biaknak phun tampi i an hruaitu pawl cu rung ka tlawng u law nan biaknak kong ka chim tuah u, kan ram biaknak ah kan hmang kho hnga maw a rak ti hna. Muslim aiawhtu nih kannih Islam biaknak nih cun Zuu din hi a thlauh bak, a duh bak lo, tiah zuu a rak ding tuk cangmi Russia pawl a hmuh hna ning a rak chim.
Vladimir cu a thin a rak hung ngaingai i a rammi hna aiawh in Muslim hruaitu pa cu tihin a rak ti: "Zuu din cu Russian vialte caah lawmhnak a si, mahhi tello in kan chuak (exist) kho lo." a rak ti i a rannak in an ram ah a kirter.
Rabbi (Juda biaknak saya) nih an biaknak kong a chim ciammam i Vladimir cu a khuaruah har ngai caah "Okay, Juda biaknak hi cu tluk a tthat a si ahcun, khawika dah nan ram si?" tiah a hal. Rabbi cu khua a ruat, Holy Land an timi atu Irsrael cu minih an kan chuh tiah a leh. "A si maw? Hmm, nan ram hmanh nan thlau a si ahcun zeitindah nan biaknak cu kaa hngatchan ngam lai?" tiah a rak leh.
Vladimir cu Germany Catholic zong nih a lung an la kho lo, "Na ratnak ah khan a va kir tthan ko, na Pa nih an hlawt bantuk in kan nih zong nih kan in cohlang ve lo," tiah a rak ti. Cu tikah a taangmi cu Byzantine in a rami Priest lawng a si, i a chimmi cu Vladimir nih a cohlan diam. Cutikah Constantinople ah mi a thlah hna i Orthodox Church an sining a va zohter i a lungtlin caah 988 kum in tipil a ing i a rammi zong hi biaknak a roh ta hna. Mah cu "Why are Russian people Orthodox Christian" timi capar chung ah hmuhmi a si.
 |
AIDS Nakin Zuu Nih Minung A Thahmi Tamdeuh |
Vladimir lawng hi a rammi zuu din ning a au-kanhtu a si lo. 1700 i Tsar Peter the great nih pasal pakhat bungsai/ zuu dinnak ah a rit tiang diriam tein a din hlan ah a nupi nih a hong auh, a lawiter a si ahcun mah nu cu fungfek in tuk ding a si tiah nawl a rak chuah. St. Petersburg an rak dirh ah khin zuu leiba a ngeimi pawl cu thongthlak lo in man phalh lo rian an rak ttuanter hna.
Zuu hi an ram ngunkhuai ah a sangbik a rak si i cozah a bawmh tuk tiah an rak ruah. 1850 hrawng ah Vodka an zuarmi man zatceo cu cozah ah a lut tiah World Policy Journal nih a ttial. 1970 ah cun cheu thum cheu khat a si. Cozah nih a rammi zuu din kha a poi a rak ti lo, i a hnu cun zuu-tama timi zuu ding pawl an rak tam tuk caah harnak lianngai a rak chuak.
1985 ah Gorbatsjov cu comunnist-party GS a rak si i zuu a rak khappi hna. Vodka, wine le beer man fak taktak in a rak kaiter. Zuu dawr pakhat nih nikhat ah zuu liter cu zat lawng zuar seh ti tiang a rak chuah.
Mah cuti a tuah ruang ah an ram ah misual (criminal) an zordeuh, cun an nunkhua a saudeuh ti an hmuh. Asinain zuu an din tlawmdeuh caah an cozah phaisa lut a zor tuk, rammi le cozah riantuan pawl an thinhung.
Zuu cawk ding dawr hmai aa tlarmi an rak tam ngai caah aa tuar ti lomi tarpa pakhat nih "Khawi Creml ah kal ning law Gorbatsjov hi va that ning," tiah a rak ti tiah capo zong an rak saih ti a si.
Russian pawl an lung a fim tuk cang. Gorbatsjov a tuahmi kha tampi a rak ttha ti an cohlan. Cucaah zuu a dingmi an tlawm chin lengmang i a dingmi zong nih tlawmdeuh an din cang tiah WHO nih a ttial.
Zuu hi a si khawh chung in hrial le din lo ding a si ko timi Russia pawl nih an cohlan chin lengmang i an din lo chin lengmang a si ahcun kannih hi ca a reltu zong khuaruah cu a herh cang ko.
Nai hrawng Lairam i a thimi le Laimi a thimi hi zuu ruang ah tampi aa tel timi philh hlah usih.
Hi cabia hi a ttha tiah na ruah cun, SHARE ve, thei cio hna seh.
Comments
Post a Comment