October 15. ah Neypyidaw i an tuahmi remdaihnak tonpumhnak "Peace Summit" ah ralkap nih "Tthencheunak/ Union in chuah khawhnak um seh" tiah hriamtlai tlangcungmi nih an chim lengmangmi cu an duh hrimhrim lonak kong in an thawk. Tlangmi hriamtlai pawl nih cun phunghrampi ah ramkomh bu Myanmar in Aung San nih Panglong ah a rak kamh hnami Union in chuah khawhnak nawl hi um seh ti an duh.
State Counselor pi Aung San Suu Kyi tel in hriamtlai phu 10 i hruaitu pawl le ralkap hna cu October 15-18 tiang remdaihnak kong an i caihhmai lai.
"Phu dang nih an chim bantuk in tlangmi kan unau pawl kan zumh hna lo ruang ah a si lo. 'Thencheu lonak' timi kan telh ahcun chan saupi a hmunmi remdaihnak a si. Pakhat le pakhat kuttlai in zumh lonak um lo tein daihnak lei ah kar kan hlan tti a herh". tiah Gen. Min Aung Hlaing nih a chimmi cu Irrawaddy nih a ttial.
Gen. Min Aung Hlaing nih a dirpimi cu 2007 phunghram Article 10nak i "ramkom bu chungtel hna tthen le chuahnak um hlah seh." timi hi a si.
Pi Aung San Suu Kyi nih ta zeitindah a ruah ve hnga? Voi tampi cu ramkomh bu chungtel hna duhnak hi a biapi tuk tiah a rak chim. Asinain tthencheu le chuah tak timi cu a duh lo.
"I komhnak tthen cheu le chuahtak timi hi ramkomh bu chungtel pawl nih an duhmi, an ruahnak le an i timhmi a si lo ding hi hmunkhat te ah ttuan tti cu a herh ko tiah chim ka duh." tiah State Counselor nih a chim.
Hi kong ah Salai Dr. Ngun Cung Lian cu Irrawaddy nih interview an tuah i Part 1 le 2 in an thlahmi 2.nak ah "Thencheu le chuahnak kong ah thinphan ding a si lo." tiin Irrwaddy nih biatlang a tarpiak. Kawlca a rel khomi nih rak rel ve.
Upadi thiamsang a simi Dr. Ngun Cung Lian nih cun 1947 ah i uknak phunghram ah khan kan rak palh cang, "ramkomh bu in kum 10 hnu ah chuahnak" timi ttial a rak si caah nihin i kan buaimi a si tiah a chim. I hruainak phunghram le uknak phunghram in a tthen i hruainak phunghrampi ah tthennak timi a um ding aa tlak lo, "Chuahnak/tthennak" timi biafang cu a khaa tuk mi a si, tiah a dirpi.
Gen. Min Aung Hlaing i "Chuah lo ding." tiah phunghram ah telh ding kong ah Dr. Ngun Cung Lian nih a tenaumi ruahnak ah a chiah piak. Zeica tiah Hriamtlai phu a simi tlangmi pawl nih Union in chuah an duh ahcun NCA timi rampumpi kahdaihnak ah min an thu in bia an i ruah kho ti lai lo tiah a chim. A ruang cu 2008 phunghrampi hi fawite in remh ding a si lo caah a si.
Aung San Suu Kyi nih "ral ttha tein biathlehnak kan tuah a herh cang. Cu ti a si lo ahcun zeitindah kan ram mipi hna hi an hmai kan khah hna lai." tiah biahmai a tthit. "Thencheunak a um lo, a duhmi an um lonak ding caah biatak tein rian ttuan tti le i caihhmai cu kan herh." tiah a chim.
Tlangmi hna nih hi "tthencheunak" ruang theng ah an lung a khon peng a si i, cun ralkap lei nih hi "thencheu lonak" theng an i tlaihpeng ve a si ahcun thil ttha cu a si lai lo.
Foto: Irrawaddy
Comments
Post a Comment